തമിഴ്‌നാട്ടിൽ നിന്ന് കൂത്താട്ടുകുളത്തെത്തിയ ലോറി ഡ്രൈവർക്ക് കൊവിഡ്

കൊച്ചി: തമിഴ്‌നാട്ടിൽ നിന്ന് മുട്ടയുമായി എത്തിയ ലോറി ഡ്രൈവർക്ക് കൊവിഡ് സ്ഥിരീകരിച്ചു. മേയ് മൂന്നിന് രാവിലെ ആറുമണിക്കാണ് തമിഴ്‌നാട്ടിലെ നാമക്കലിൽ നിന്ന് കൂത്താട്ടുകുളം മാർക്കറ്റിലെ മുട്ടവ്യാപാരകേന്ദ്രത്തിൽ ലോഡുമായി എത്തിയത്. തുടർന്ന് കോട്ടയം ജില്ലയിലും ലോഡ് ഇറക്കിയശേഷം നാലാംതീയതി തിരികെപ്പോയി. തമിഴ്‌നാട്ടിലെ വെണ്ണണ്ടൂർ ചെക്ക് പോസ്റ്റിൽ വച്ചെടുത്ത സാമ്പിൾഫലം പോസിറ്റീവ് ആണെന്ന് സ്ഥിരീകരിച്ചതോടെ രോഗിയുമായി നേരിട്ട് സമ്പർക്കം പുലർത്തിയ രണ്ടുപേരോട് വീടുകളിൽ നിരീക്ഷണത്തിൽ കഴിയുവാൻ നിർദേശിച്ചു. കൂടുതൽ പേരുമായി സമ്പർക്കം ഉണ്ടായിട്ടില്ലാത്തതിനാൽ ആശങ്കപ്പെടേണ്ട സാഹചര്യമില്ല. ഡ്രൈവർ നാമക്കൽ സർക്കാർ ആശുപത്രിയിൽ ചികിത്സയിലാണ്.