SignIn
Kerala Kaumudi Online
Monday, 10 August 2020 2.46 PM IST

ഭീകരവാദത്തിനെതിരെ നടപടിയെടുത്ത് ഇന്ത്യ , അഞ്ച് രാജ്യങ്ങളിൽ നിന്നുളള ഒമ്പത് തീവ്രവാദികളെ നിരോധിച്ചു

pic

ന്യൂഡൽഹി: ഭീകരവാദത്തിനെതിരെ ശക്തമായ നടപടിയെടുത്ത് ഇന്ത്യ. ഖാലിസ്ഥാനുമായി ബന്ധമുള്ള അഞ്ച് രാജ്യങ്ങളിൽ നിന്നുളള ഒമ്പത് തീവ്രവാദികളെ നിരോധിച്ചു.കഴിഞ്ഞ വർഷം ഭേദഗതി ചെയ്ത ഇന്ത്യയുടെ ഭീകരവിരുദ്ധ നിയമപ്രകാരം പഞ്ചാബിൽ ഭീകരവാദത്തെ പ്രോത്സാഹിപ്പിച്ചതായി പറയപ്പെടുന്ന ഒമ്പത് പേരെ ഭീകരവാദികളായി പ്രഖ്യാപിച്ചു. കഴിഞ്ഞ സെപ്റ്റംബറിൽ ജെയ്ഷെ മുഹമ്മദ് സ്ഥാപകൻ മൗലാന മസൂദ് അസ്ഹർ, ലഷ്കർ-ഇ-തായ്‌ബ സ്ഥാപകൻ ഹഫീസ് സയീദ്,ഓപ്പറേഷൻ കമാൻഡർ സാക്കി-ഉർ-റഹ്മാൻ ലഖ്‌വി, ദാവൂദ് ഇബ്രാഹിം എന്നിവരെ ഇന്ത്യൻ നിയമപ്രകാരം തീവ്രവാദികളായി പ്രഖ്യാപിച്ചിരുന്നു.

ഐക്യരാഷ്ട്രസഭയുടെ സുരക്ഷാ സമിതി നാലുപേരെയും ഇതിനോടകം തീവ്രവാദികളായി പ്രഖ്യാപിച്ചിട്ടുണ്ട്.വിദേശ രാജ്യങ്ങളിൽ താമസിക്കുന്ന ഖാലിസ്ഥാന്റെ പ്രൊമോട്ടർമാരെ അടിച്ചമർത്താൻ തീവ്രവാദ വിരുദ്ധ നിയമത്തിന്റെ ഈ വ്യവസ്ഥ നടപ്പാക്കുന്നത് ഇതാദ്യമാണ്.തീവ്രവാദികൾ പ്രവർത്തിക്കുന്നത് വിദേശ രാജ്യങ്ങളിൽ നിന്നായതിനാൽ ഇന്ത്യയിലുളള ഇവരുടെ ആസ്തികൾ പൂർണമായും പിടിച്ചെടുക്കുകയും വിദേശ രാജ്യങ്ങളിലുളള സർക്കാരുകളോട് നടപടിയെടുക്കാൻ ആവശ്യപ്പെടുകുയും ചെയ്യും. ഇതിനോടകം തന്നെ പഞ്ചാബ് പൊലീസ് ഒരാൾക്കെതിരെ കേസ് രജിസ്റ്റർ ചെയ്തു. ഗുർപത്വന്ത് സിംഗ് പന്നുവും അമൃതസറിലെയും കപൂർത്തലയിലെയും കൂട്ടാളികളും ചേർന്ന് രാജ്യദ്രോഹത്തിനും വിഘടനവാദത്തിനും വേണ്ടി പ്രവർത്തിച്ച് വരികയായിരുന്നു.കഴിഞ്ഞ വർഷം തീവ്രവാദ ഗ്രൂപ്പായി നിയോഗിക്കപ്പെട്ട യുഎസ് ആസ്ഥാനമായുള്ള സിഖ്സ് ഫോർ ജസ്റ്റിസിന്റെ നിയമോപദേഷ്ടാവാണ് പന്നു. മൂന്നാമത്തെ കേസ് ദേശീയ തലസ്ഥാനമായ ഡൽഹിയോട് ചേർന്നുള്ള ഗുരുഗ്രാമിൽ ഹരിയാന പൊലീസ് രജിസ്റ്റർ ചെയ്തു.


ഇന്ത്യക്ക് പുറത്ത് ഒരു പരമാധികാര ഖാലിസ്ഥാൻ കെട്ടിപ്പടുക്കുന്നതിന് വോട്ടുചെയ്യാൻ ജനങ്ങളോട് ആവശ്യപ്പെടുന്ന "റഫറണ്ടം 2020" എന്ന പേരിൽ ഒരു കാമ്പയിൻ ഗ്രൂപ്പ് ആരംഭിച്ചു. ഇന്ന് മുതൽ രജിസ്ട്രേഷൻ ആരംഭിക്കുമെന്ന് ഗ്രൂപ്പ് അറിയിച്ചു. പഞ്ചാബിലെ ഭീകരതയെ പുനരുജ്ജീവിപ്പിക്കാൻ വർഷങ്ങളായി പ്രവർത്തിച്ചുകൊണ്ടിരിക്കുന്ന പാക്കിസ്ഥാൻ ഐ.എസ്.ഐയാണ് ഈ പ്രചാരണത്തിന് പിന്തുണ നൽകിയിട്ടുള്ളതെന്ന് പൊലീസ് പറഞ്ഞു.

ഗുർമീത് സിംഗ്

ജർമനിയിൽ താമസിക്കുന്ന ഗുർമീത് സിംഗ്(50) പാകിസ്ഥാൻ ആസ്ഥാനമായുള്ള സിഖ് റാഡിക്കൽ രഞ്ജിത് സിംഗ് എന്ന ആളുടെ അടുത്ത അനുയായിയാണ്. മുൻ ഖാലിസ്ഥാൻ സിന്ദാബാദ് ഫോഴ്‌സ് (കെസെഡ്) തീവ്രവാദിയാണ് ഇയാൾ.തീവ്രവാദ ആക്രമണങ്ങൾ നടത്താൻ പാകിസ്ഥാനിൽ നിന്ന് പഞ്ചാബിലേക്ക് വൻതോതിൽ സ്‌ഫോടകവസ്തുക്കൾ കയറ്റി അയച്ച മൂന്ന് കേസുകളിൽ പ്രതിയാണ് ഇയാൾ. പാകിസ്ഥാനിൽ നിന്ന് ആയുധങ്ങൾ കടത്തുന്നതിൽ ഇയാൾ പ്രധാന പങ്കുവഹിച്ചിട്ടുണ്ട്.

രഞ്ജിത് സിംഗ്

ഖാലിസ്ഥാൻ സിന്ദാബാദ് ഫോഴ്‌സിന്റെ തലവനാണ് രഞ്ജിത് സിംഗ്. കൊലപാതകം, ആയുധകടത്ത്, വ്യാജ കറൻസി എന്നീ നിരവധി കേസുകളിൽ ഇയാൾക്ക് പങ്കുണ്ടെന്ന് കേന്ദ്ര ആഭ്യന്തര മന്ത്രാലയം അറിയിച്ചു. പാകിസ്ഥാനിലെ സിയാൽകോട്ട്, കസൂർ പ്രദേശങ്ങളിൽ നിന്ന് പ്രവർത്തിക്കുന്ന വ്യാജ ഇന്ത്യൻ കറൻസി കള്ളക്കടത്ത് ശൃംഖലയുമായി ഇയാൾക്ക് അടുത്ത ബന്ധമുണ്ടെന്ന് കരുതപ്പെടുന്നു. ഡ്രോണുകൾ വഴി പഞ്ചാബിലേക്ക് തോക്കുകൾ കടത്തുന്നതിന്റെ സൂത്രധാരൻ ഇയാളാണെന്നും ആരോപിക്കപ്പെടുന്നു.

രഞ്ജിത് സിംഗ് ലഷ്കർ-ഇ-തായ്ബ തീവ്രവാദികളുമായി സമ്പർക്കം പുലർത്തുന്നുണ്ട്. ഐ‌എസ്‌ഐ പിന്തുണയുള്ള ഖാലിസ്ഥാനി ഘടകങ്ങളും ഇന്ത്യയെ ലക്ഷ്യമിടുന്ന പാകിസ്ഥാനിലെ മറ്റ് ജിഹാദി സംഘടനകളും തമ്മിലുള്ള ബന്ധത്തിന്റെ പ്രധാന പിന്തുണക്കാരനാണ് രഞ്ജിത് സിംഗ്.ഇന്ത്യയിൽ ഇന്ത്യൻ വിരുദ്ധ പ്രചാരണത്തിനും തീവ്രവാദ പ്രവർത്തനങ്ങൾക്കും ഇയാൾ നേതൃത്വം നൽകി.

ഹാർദീപ് സിംഗ് നിജ്ജാർ

ഖാലിസ്ഥാൻ കടുവ സേനയുമായുള്ള ബന്ധത്തിന്റെ പേരിൽ ഹാർദീപ് സിംഗ് നിജ്ജാർ വർഷങ്ങളായി ഇന്ത്യൻ സുരക്ഷാ ഏജൻസികളുടെ നിരീക്ഷണത്തിലുണ്ട്. ഇന്ത്യയിലെ ബോംബ് സ്‌ഫോടനങ്ങൾ ഉൾപ്പെടെ നിരവധി ഭീകരപ്രവർത്തനങ്ങളുടെ സൂത്രധാരനും ഇയാളായിരുന്നു. പ്രതിഭകളെ കണ്ടെത്തുന്നതിലൂടെയും റിക്രൂട്ട് ചെയ്യുന്നവർക്ക് പരിശീലനം നൽകുന്നതിലൂടെയും ഇന്ത്യയിൽ തീവ്രവാദ പ്രവർത്തനങ്ങൾ പ്രോത്സാഹിപ്പിച്ചതായും ഇയാൾക്കെതിരെ ആരോപണമുണ്ട്. നിലവിൽ ഇയാൾ കാനഡയിലാണ്.

ഭൂപിന്ദർ സിംഗ് ഭിന്ദ

പാകിസ്ഥാൻ ആസ്ഥാനമായുള്ള ഖാലിസ്ഥാൻ സിന്ദാബാദ് ഫോഴ്‌സിലെ രഞ്ജിത് സിംഗ് നീതയുമായി ഭൂപിന്ദർ സിംഗ് ഭിന്ദയ്ക്ക് ബന്ധമുണ്ട്. രഞ്ജിത് സിംഗുമായുള്ള പതിവ് ടെലിഫോൺ ബന്ധം തുടരുന്ന ഭിന്ദ പഞ്ചാബ് ആസ്ഥാനമായുള്ള സിഖ് തീവ്രവാദികളുമായി സമ്പർക്കം പുലർത്തുന്നുണ്ട്.

വാധവ സിംഗ്

ബബ്ബാർ ഖൽസ അന്താരാഷ്‌ട്ര മേധാവിയാണ് വാധവ സിംഗ്.ലുധിയാനയിലെ ദാഹെരു ഗ്രാമത്തിൽ ഒളിത്താവളത്തിൽ റെയ്ഡ് നടത്തിയ ഇൻസ്പെക്ടർ പ്രീതം സിംഗ് ബജ്‌വയെയും കോൺസ്റ്റബിളിനെയും വെടിവച്ച് കൊലപ്പെടുത്തിയ ആറ് അംഗ ബബ്ബർ ഖൽസ ടീമിന്റെ ഭാഗമായിരുന്നു വാധവ സിംഗെന്നും പൊലീസ് രേഖകളിൽ പറയുന്നു. കാനഡയിൽ നിന്നും ഡൽഹിയിലേക്കുളള എയർ ഇന്ത്യ യാത്രാ വിമാനം തീവ്രവാദ സംഘം തകർത്തിൽ വാധവ സിംഗിന് പങ്കുണ്ടെന്നും ആരോപണമുണ്ട്.

ലഖ്‌ബീർ സിംഗ് റോഡ്

ലഖ്‌ബീർ സിംഗ് റോഡ് ഇന്ത്യയിലെ നിരവധി ഭീകരാക്രമണങ്ങളുമായി ബന്ധപ്പെട്ട ഒരു ഹാർഡ്‌കോർ തീവ്രവാദിയാണെന്ന് പൊലീസ് രേഖകളിൽ വിശേഷിപ്പിച്ചിട്ടുണ്ട്. കാനഡ ആസ്ഥാനമായി പ്രവർത്തിക്കുന്ന ലഖ്‌ബീർ സിംഗ് റോഡിന്റെ മകൻ ഭഗത് ബ്രാർ ഇന്ത്യ വിരുദ്ധ പ്രവർത്തനങ്ങളിൽ സജീവമായി ഏർപ്പെടുന്നു. വിദേശത്ത് ഇന്ത്യാ വിരുദ്ധ പ്രവർത്തനങ്ങൾ സംഘടിപ്പിക്കുന്നതിനും ഏകോപിപ്പിക്കുന്നതിനുമായി ഐ‌എസ്‌ഐ ഉദ്യോഗസ്ഥരെ കൂടാതെ തീവ്ര കമ്മ്യൂണിറ്റി നേതാക്കളെ സന്ദർശിക്കുന്നതിനായി അദ്ദേഹം പതിവായി പാകിസ്ഥാനിൽ പോകാറുണ്ട്.

പരംജിത് സിംഗ് പഞ്ജവർ

ഖാലിസ്ഥാൻ കമാൻഡോ ഫോഴ്‌സ്-പഞ്ജ്‌വറിന്റെ തലവനാണ് പരംജിത് സിംഗ് പഞ്ജ്‌വർ. 1988-1990 കാലഘട്ടത്തിൽ ഒന്നിലധികം ഭീകര കേസുകളിൽ ഉൾപ്പെട്ട ഇദ്ദേഹം പെഷവാർ ആസ്ഥാനമായുള്ള അഫ്ഗാൻ മുജാഹിദീനുകളുമായി ആയുധങ്ങളും വെടിക്കോപ്പുകളും വിതരണം ചെയ്യുന്നതിനും സിഖ് തീവ്രവാദികളെ പരിശീലിപ്പിക്കുന്നതിനും വേണ്ടിയുളള ചർച്ച നടത്തിയിരുന്നു. മയക്കുമരുന്ന് കള്ളക്കടത്തിലും ഇയാൾക്ക് പങ്കുണ്ട്.

ഗുർപത്വാന്ത് സിംഗ് പന്നുൻ

ഗുർപത്വന്ത് സിംഗ് പന്നുൻ നിരോധിത സംഘടനയായ ‘സിഖ്സ് ഫോർ ജസ്റ്റിസു’മായി ബന്ധപ്പെട്ടിരുന്നു. 2014 ജൂണിൽ ന്യൂയോർക്കിൽ നടന്ന റാലിയിൽ ആരംഭിച്ച “ഖാലിസ്ഥാന് വേണ്ടി പഞ്ചാബ് റഫറണ്ടം 2020” എന്ന പ്രചാരണത്തിന് പന്നൂൻ നേതൃത്വം നൽകിയിരുന്നു.യു‌എസ്‌എയിലും സിഖുകാർ കൂടുതലുള്ള മറ്റ് രാജ്യങ്ങളിലും മീറ്റിംഗുകൾ നടത്തി സോഷ്യൽ മീഡിയയിൽ ഉൾപ്പെടെ വളരെ വലിയ രീതിയിൽ ‘റഫറണ്ടം 2020’ പ്രചരിപ്പിക്കുകയാണെന്നും റിപ്പോർട്ടുണ്ട്.

പരംജിത് സിംഗ് പമ്മ

യുകെ ആസ്ഥാനമായുള്ള ബബ്ബർ ഖൽസ ഇന്റർനാഷണൽ ആക്ടിവിസ്റ്റാണ് പരംജിത് സിംഗ് പമ്മ. 2009 ജൂലൈയിൽ പാട്യാലയിൽ രാഷ്ട്രീയ സിഖ് സംഗത് തലവൻ റുൽദ സിംഗിനെ കൊലപ്പെടുത്തിയ സംഭവത്തിൽ അന്വേഷണത്തിനിടെ അദ്ദേഹത്തിന്റെ പങ്ക് പുറത്തുവന്നതിനെ തുടർന്ന് റെഡ് കോർണർ നോട്ടീസ് നൽകിയിരുന്നു.

JOIN THE DISCUSSION
ഇവിടെ കൊടുക്കുന്ന അഭിപ്രായങ്ങൾ കേരള കൗമുദിയുടെതല്ല. സോഷ്യൽ നെറ്റ്‌വർക്ക് വഴി ചർച്ചയിൽ പങ്കെടുക്കുന്നവർ അശ്ലീലമോ അസഭ്യമോ തെറ്റിദ്ധാരണാജനകമോ അപകീർത്തികരമോ നിയമവിരുദ്ധമോ ആയ അഭിപ്രായങ്ങൾ പോസ്റ്റ്‌ ചെയുന്നത് സൈബർ നിയമപ്രകാരം ശിക്ഷാർഹമാണ്.
TAGS: NEWS 360, NATIONAL, NATIONAL NEWS, INDIA
KERALA KAUMUDI EPAPER
TRENDING IN NEWS 360
VIDEOS
PHOTO GALLERY
TRENDING IN NEWS 360
X
Lorem ipsum dolor sit amet
consectetur adipiscing elit, sed do eiusmod tempor incididunt ut labore et dolore magna aliqua. Ut enim ad minim veniam, quis nostrud exercitation ullamco laboris nisi ut aliquip ex ea commodo consequat.
We respect your privacy. Your information is safe and will never be shared.