പ്രകാശൻ വക തെറ്റു തിരുത്തും നിഘണ്ടു

കൊച്ചി: വായനയ്ക്കിടയിൽ തെറ്റുകൾ കല്ലുകടിയായപ്പോഴാണ് വാക്കുകൾ തിരുത്തിയേ പറ്റൂവെന്ന് മുൻ പത്രപ്രവർത്തകനും സ്ഥലനാമചരിത്രകാരനുമായ പി. പ്രകാശിന് തോന്നിയത്. പിന്നെ തീരുമാനിച്ചു. ഒരു നിഘണ്ടു ഇറക്കുക തന്നെ. തെറ്റായെഴുതി പ്രചാരം നേടിയ വാക്കുകളുടെ ശരിയായ രൂപം. അതൊരു ഭഗീരഥ പ്രയത്‌നത്തിന്റെ തുടക്കമായിരുന്നു.

ആദ്യമായി ചെയ്തത് ദൃശ്യ, അച്ചടി മാദ്ധ്യമങ്ങളിൽ വരുന്ന തെറ്റായ വാക്കുകൾ നോട്ടുബുക്കിൽ കുറിച്ചുവയ്ക്കുകയായിരുന്നു. ഒരേ പിഴവ് ആവർത്തിക്കുമ്പോൾ പ്രത്യേകം ശ്രദ്ധിക്കും. കഴിഞ്ഞ അഞ്ചുവർഷമായി കുറിച്ചുവച്ച ഇത്തരം വാക്കുകൾ വഴികാട്ടിയായി. ഭാഷാശുദ്ധീകരണത്തിന്റെ ആദ്യപടിയായി 'പദശുദ്ധികോശം, വാക്കുകളുടെ തെറ്റും ശരിയും' എന്ന പേരിൽ രചിച്ച നിഘണ്ടു അടുത്തമാസം പുറത്തിറങ്ങും.

സ്‌കൂൾ, കോളേജ് വിദ്യാർത്ഥികൾക്കും അദ്ധ്യാപകർക്കും തെറ്റില്ലാതെ മലയാളം എഴുതാൻ ആഗ്രഹിക്കുന്നവർക്കും പ്രയോജനപ്പെടും. ശബ്ദതാരാവലിയും വ്യാകരണഗ്രന്ഥങ്ങളും അടിസ്ഥാനമാക്കിയാണ് ഭാഷാശുദ്ധീകരണത്തിന് ഇറങ്ങിപ്പുറപ്പെട്ടതെന്ന് പ്രകാശ് പറഞ്ഞു.

• നാലായിരത്തിലേറെ മലയാളം വാക്കുകൾ. ആയിരത്തിലധികം ഇംഗ്ലീഷ് വാക്കുകളുടെ മലയാളപരിഭാഷ. ചില വാക്കുകൾക്ക് പ്രത്യേക കുറിപ്പുകൾ. അനുബന്ധമായി വിദേശഭാഷകളിൽ നിന്ന് മലയാളത്തിൽ എത്തിയതും നമ്മൾ ശുദ്ധമലയാളമെന്നു കരുതുന്നതുമായ വാക്കുകൾ.
• നമ്മൾ ഉപയോഗിക്കുന്ന തെറ്റായ രൂപങ്ങൾക്ക് അർത്ഥമുണ്ടെങ്കിൽ അത് ഉദാ: പ്രസഹിക്കുക = അനുഭവിക്കുക. തടസ്ഥം = തടത്തിൽ സ്ഥിതിചെയ്യുന്നത്. ഖാതകൻ = കഴിക്കുന്നവൻ..ചില വാക്കുകൾക്ക് ഓക്‌സ്‌ഫോഡ് ഡിക്ഷ്ണറിയിലെപ്പോലെ ചെറുചിത്രങ്ങൾ.
• തെറ്റും ശരിയും

ആസ്വാദ്യകരം - ആസ്വാദ്യം

ആശാസ്യകരം - ആശാസ്യം

സ്വാദിഷ്ടം - സ്വാദിഷ്ഠം

ഫലഭൂയിഷ്ടം - ഫലഭൂയിഷ്ഠം

നിഷ്ഠൂരം - നിഷ്ഠുരം

സായൂജ്യം - സായുജ്യം

ഗുമസ്ഥൻ - ഗുമസ്തൻ

മുഖാന്തിരം- മുഖാന്തരം

മുഖദാവിൽ - മുഖതാവിൽ

• നിഘണ്ടുവിന്റെ ഘടന

200 പേജുള്ള പുസ്തകത്തിൽ 4000 മലയാളം വാക്കുകളും ആയിരം ഇംഗ്ലീഷ് വാക്കുകളുമുണ്ട്. അക്ഷരമാല ക്രമത്തിലാണ് അവ കോർത്തിണക്കിയിരിക്കുന്നത്. ആദ്യം ശരിയായ വാക്ക്, തുടർന്ന് തെറ്റായ പ്രയോഗം, വാക്കിന്റെ അർത്ഥം, പ്രയോഗത്തിന്റെ അർത്ഥം എന്ന ക്രമത്തിലാണ് പദങ്ങൾ ക്രമീകരിച്ചിരിക്കുന്നത്. 20 വിവർത്തനഗ്രന്ഥങ്ങൾ ഉൾപ്പെടെ 30 കൃതികളുടെ രചയിതാവാണ്. ഇടപ്പള്ളി അമൃത ഹോസ്പിറ്റൽ റോഡിൽ രാജാങ്കണത്തിലാണ് താമസം.