എം.പി ഫണ്ട് വെട്ടിക്കുറച്ചതിനെതിരെ പ്രതിപക്ഷം

ന്യൂഡൽഹി: കൊവിഡ് സാഹചര്യത്തിൽ എം.പിമാരുടെ പ്രാദേശികവികസന ഫണ്ട് രണ്ടുവർഷത്തേക്ക് മരവിപ്പിച്ചതിൽ രാജ്യസഭയിൽ പ്രതിപക്ഷ പ്രതിഷേധം. നടപടി പുനഃപരിശോധിക്കണമെന്ന് സർക്കാരിനോട് പ്രതിപക്ഷ നേതാവ് ഗുലാംനബി അടക്കമുള്ളവർ ആവശ്യപ്പെട്ടു. എം.പിമാരുടെയും മന്ത്രിമാരുടെയും ശമ്പളം വെട്ടികുറച്ചുള്ള ബില്ലുകളുടെ ചർച്ചയിലാണ് പ്രതിപക്ഷം വിഷയം ഉന്നയിച്ചത്. നടപടി പുനഃപരിശോധിക്കണമെന്ന് ചർച്ചയിൽ സി.പി.എം അംഗം കെ. സോമപ്രസാദ് ആവശ്യപ്പെട്ടു. രണ്ടുവർഷത്തേക്ക് ഫണ്ട് മരവിപ്പിച്ചത് തെറ്റായ നടപടിയാണെന്നും കൊവിഡ് കാലത്ത് പ്രയോജനപ്പെടും വിധം പുനഃക്രമീകരിക്കാമായിരുന്നെന്നും അദ്ദേഹം ചൂണ്ടിക്കാട്ടി.