മദ്യലഹരിയിൽ യുവാവ് വാഹനങ്ങൾ തകർത്തു

ഫറോക്ക്: മയക്കുമരുന്ന് ലഹരിയിൽ അക്രമാസക്തനായ യുവാവ് വാഹനങ്ങൾ തകർത്തു. ചാലിയം നടുക്കണ്ടി പറാഞ്ചേരി പാടം നൗഷാദലിയാണ് മണിക്കൂറുകളോളം ഭീകരാന്തരീക്ഷം സൃഷ്ടിച്ചത്. ഇന്നലെ വൈകീട്ട് 4 നാണ് സംഭവം. ചാലിയം കരുവൻതിരുത്തി പാലത്തിനു സമീപമുള്ള കരീം ഹാജിയുടെ വീട്ടിൽ അതിക്രമിച്ചു കയറിയാണ് യുവാവ് അക്രമാസക്തനായത്. ഇരുമ്പ് പൈപ്പ് കൊണ്ട് സെക്യൂരിറ്റിയെയും വീട്ടുകാരെയും ആക്രമിച്ചു. നിറുത്തിയിട്ട 3 കാറുകൾ അടിച്ച് തകർത്തു. തൊട്ടടുത്ത വീട്ടിലും കയറി അക്രമം നടത്തിയ യുവാവ് റോഡരികിലെ 2 ബസുകൾ, കാർ, ബുള്ളറ്റ്, ബാറ്ററി എന്നിവയും അടിച്ച് തകർത്തു. ഇയാളെ നാട്ടുകാരും പൊലീസും ചേർന്ന് പിടികൂടി ചികിത്സയ്ക്കായി ബന്ധുക്കളെ ഏൽപ്പിച്ചു.