കാസർകോട്ട് ഇന്നലെ 453 പേർക്ക് കൊവിഡ് സ്ഥിരീകരിച്ചു, 424 പേർക്കും സമ്പർക്കം വഴി

കാസർകോട്: ജില്ലയിൽ 453 പേർക്ക് കൂടി കൊവിഡ് 19 പോസിറ്റീവായി. ജില്ലയിൽ ഇതുവരെയുള്ള ഏറ്റവും ഉയർന്ന പ്രതിദിന രോഗ നിരക്കാണിത്. സമ്പർക്കത്തിലൂടെ 424 പേർക്കും ഇതരസംസ്ഥാനത്ത് നിന്നെത്തിയ 13 പേർക്കും വിദേശത്ത് നിന്നെത്തിയ 16 പേർക്കുമാണ് കൊവിഡ് സ്ഥിരീകരിച്ചത്. 120 പേർക്ക് കൊവിഡ് നെഗറ്റീവായി.

10,466 പേർക്കാണ് ജില്ലയിൽ ഇതുവരെ കൊവിഡ് സ്ഥിരീകരിച്ചത്. ഇതിൽ 720 പേർ വിദേശത്ത് നിന്നെത്തിയവരും 548 പേർ ഇതരസംസ്ഥാനത്ത് നിന്നെത്തിയവരും 9198 പേർക്ക് സമ്പർക്കത്തിലൂടെയുമാണ് രോഗം സ്ഥിരീകരിച്ചത്. 7777 പേർക്ക് കൊവിഡ് നെഗറ്റീവായി. വീടുകളിൽ 1207 പേരടക്കം നിലവിൽ 2607 പേരാണ് ചികിത്സയിലുള്ളത്.

വീടുകളിൽ 3233 പേരും സ്ഥാപനങ്ങളിൽ 1100 പേരുമുൾപ്പെടെ ആകെ നിരീക്ഷണത്തിലുള്ളത് 4333 പേരാണ്. പുതിയതായി 212 പേരെ കൂടി ഇന്നലെ നിരീക്ഷണത്തിലാക്കി. സെന്റിനൽ സർവ്വേ അടക്കം പുതിയതായി 1558 സാമ്പിളുകൾ കൂടി പരിശോധനയ്ക്ക് അയച്ചു. 399 പേരുടെ പരിശോധനാ ഫലം ലഭിക്കാനുണ്ട്.