എല്ലാ ബില്ലുകളും എടുത്തു വയ്ക്കുന്ന ജോർജുകുട്ടിയുടെ ദുരുദ്ദേശ്യത്തിന് പിന്നിൽ ഇതായിരുന്നു കാരണം

കൊച്ചി: 'ദൃശ്യം' സിനിമയിലെ മോഹൻലാലിന്റെ കഥാപാത്രമായ ജോർജുകുട്ടിയെ ഓർമ്മയില്ലേ?​ ചെറിയ വരുമാനമുള്ള കുടുംബത്തിന്റെ സാമ്പത്തിക പ്രതിസന്ധികളെ, വലിയ വിദ്യാഭ്യാസമൊന്നും ഇല്ലാതിരുന്നിട്ടും ജോർജുകുട്ടി ബുദ്ധിപൂർവം നേരിട്ടു. വരുമാനത്തിനൊത്ത് ചെലവു നിയന്ത്രിച്ച് ജീവിതം ആസ്വാദ്യമാക്കുന്നത് എങ്ങനെയന്ന പാഠം കൂടിയാണ് ജോർജുകുട്ടിയുടെ ജീവിതം.

ഇടത്തരം വരുമാനക്കാരനായ ജോർജുകുട്ടി വീട്ടുകാര്യങ്ങൾ ഭംഗിയായി നോക്കുന്നു; കുട്ടികളുടെ വിദ്യാഭ്യാസ ചെലവുകൾ ഉൾപ്പെടെ വഹിക്കുന്നു. ബസ് ടിക്കറ്റ് ഉൾപ്പടെ എല്ലാ ബില്ലുകളും ശേഖരിച്ചു വച്ച് ഓരോ മാസത്തെയും വരവും ചെലവും നോക്കി ചെലവ് നിയന്ത്രിക്കുന്നു.

സിനിമയിൽ,​ കോൺസ്‌റ്റബിൾ സഹദേവൻ ''ഇങ്ങനെ എല്ലാ ബില്ലുകളും എടുത്തു വയ്ക്കുന്നതിൽത്തന്നെ എന്തോ ദുരുദ്ദേശ്യമില്ലേ സാറേ?" എന്നു ചോദിക്കുമ്പോൾ ജോ‌ർജുകുട്ടി നൽകുന്ന മറുപടിയുണ്ട്: ''വരവും ചെലവും കൂട്ടിമുട്ടിക്കാൻ പെടാപ്പാട് പെടുന്നൊരു കുടുംബമാ ഞങ്ങടേത്. എല്ലാ മാസാവസാനോം ഈ ബില്ലെല്ലാം എടുത്ത് കൂട്ടിനോക്കും- അധികച്ചെലവ് എവിടാന്ന് കണ്ടുപിടിക്കാൻ!"

ഈ 'ഫിനാൻഷ്യൽ മാനേജ്‌മെന്റ് ' ആണ് ജോർജുകുട്ടിയുടെ ജീവിതവിജയം.

സാമ്പത്തിക അച്ചടക്കം

ജീവിതത്തിൽ എങ്ങനെ സാമ്പത്തിക അച്ചടക്കം പാലിക്കാമെന്ന് ജോർജുകുട്ടി കാണിച്ചുതരുന്നുണ്ട്. ആ ജീവിതത്തെ മറ്റൊരു രീതിയിൽ സങ്കല്‌പിക്കുക:

 ₹ 25,000: ഇതാണ് ജോർജുകുട്ടിയുടെ ഇപ്പോഴത്തെ മാസ വരുമാനം.

 വീട്ടുചെലവ്, കുട്ടികളുടെ ട്യൂഷൻ ഫീസ്, മറ്റു ചെലവുകൾ എന്നിവ ഉൾപ്പെടെയുള്ളവയ്ക്കായി വരുമാനത്തിന്റെ 50 ശതമാനം പ്രതിമാസം ചെലവാക്കുന്നു.

 25 ശതമാനം തുക ലോൺ അടയ്ക്കാൻ വേണം.

 15 ശതമാനം തുക പ്രതീക്ഷിക്കാത്ത ചെലവുകൾക്ക്

 മാസം മിച്ചം പിടിച്ചത് : 10% തുക; അതായത്, 2500 രൂപ. ഇത് അദ്ദേഹം ചിട്ടിയിൽ നിക്ഷേപിച്ചു.

 ജോർജുകുട്ടി തൊട്ടടുത്ത മാസം ചെലവുകൾക്കായുള്ള നീക്കിവയ്പ്പ് 50 ശതമാനത്തിൽ നിന്ന് 40 ശതമാനമാക്കി കുറച്ചു.

 ലോൺ ചെലവിൽ മാറ്റമില്ല

 അനാവശ്യച്ചെലവ് 10 ശതമാനത്തിൽ നിയന്ത്രിച്ചു

 അപ്പോൾ മാസം മിച്ചം പിടിച്ചത് : 25% തുക = 6250 രൂപ.

 ഈ പണം ചിട്ടിയിലും മക്കളുടെ വിവാഹം ഉൾപ്പെടെ ഭാവിയിലെ മറ്റു ചെലവുകൾക്ക് സഹായകമാകുന്ന നിക്ഷേപ പദ്ധതിയിലും അദ്ദേഹം നിക്ഷേപിച്ചു.