ഐ.എ.എസ് പരിശീലകൻ വോട്ടു തേടിയുള്ള ഓട്ടത്തിലാണ്

കോലഞ്ചേരി: ഐ.എ.എസ്സുകാരെ സൃഷ്ടിക്കാനുള്ള നിയോഗം തല്ക്കാലം മാറി നില്ക്കട്ടെ. ഇവിടെ പരിശീലകൻ സ്ഥാനാർത്ഥി കുപ്പായമണിഞ്ഞു.വടവുകോട് ബ്ലോക്ക് പഞ്ചായത്തിലെ പുത്തൻകുരിശ് ഡിവിഷനിൽ മത്സരിക്കുന്ന ഇടത് മുന്നണി സ്ഥാനാർത്ഥി ജൂബിൾ ജോർജാ (30)ണ് അപ്രതീക്ഷിതമായെത്തിയ പുതിയ നിയോഗവുമായി തിരഞ്ഞെടുപ്പ് ഗോദയിലിറങ്ങിയത്.
പു​റ്റുമാനൂർ പൂപ്പനാൽ കുടുംബാംഗമാണ് ബിടെക് ബിരുദധാരിയായ ഈ യുവാവ്. സ്ഥാനാർത്ഥിയാകാൻ ബിരുദധാരികളായ പുതുമുഖ യുവാക്കളെ തേടിയുള്ള അന്വേഷണമാണ് ഇടത് മുന്നണി നേതാക്കളെ ജൂബിളിലേക്കെത്തിച്ചത്. ആദ്യം വൈമനസ്യം തോന്നിയെങ്കിലും പിന്നീട് നിയോഗം ധൈര്യ സമേതം ഏ​റ്റെടുത്തു. വടവുകോട് രാജർഷി സ്‌കൂളിൽ പ്ലസ്ടു പൂത്തിയാക്കിയ ശേഷം തമിഴ്‌നാട്ടിലായിരുന്നു ബി.ടെക് പഠനം. തുടർന്ന് ടോക് എച്ച് കോളജിൽ എം.ബി.എയും പൂർത്തിയാക്കി. രണ്ട് വർഷം കണ്ണന്താനം അക്കാഡമിയിൽ സിവിൽ സർവ്വീസ് പരിശീലകനായി. ശേഷമാണ് കിൻഫ്രയിലെ സ്വകാര്യ സ്ഥാപനത്തിലും സിവിൽ സർവീസ് പരിശീലകനായത്. ഈ ജോലി തുടരുമ്പോഴാണ് സ്ഥാനാർത്ഥിത്വം. തൊടുപുഴ അൽഅസ്ഹർ കോളജിലെ ലക്ചറർ മെർലിനാണ് ജൂബിളിന്റെ ഭാര്യ.