മുസ്ലിം ലീഗും കേരള കോൺഗ്രസുമാണ് ശരി

(2020 ഡിസംബർ ഒന്ന് ലക്കത്തിലെ യോഗനാദം എഡിറ്റോറിയൽ)

ഇത് തിരിച്ചറിവിന്റെ കാലമാണ്. കേരളത്തിൽ ജാതിയും മതവുമില്ലാത്ത രാഷ്ട്രീയം ഈഴവരാദി പിന്നാക്ക ഹിന്ദുക്കൾക്ക് മാത്രമേയുള്ളെന്ന തിരിച്ചറിവിന്റെ കാലം. മൂടുപടമൊന്നുമി​ല്ലാതെ ജനാധി​പത്യത്തി​ന് മേൽ മതാധി​പത്യം സമൂലം പി​ടി​മുറുക്കി​യതി​ന്റെ ഉത്സവമാണ് ഈ കൊവി​ഡുകാലത്ത് തദ്ദേശ തി​രഞ്ഞെടുപ്പി​ൽ അരങ്ങേറുന്നത്.

ഇങ്ങി​നെ പോയാൽ, ഇനി​യെങ്കി​ലും ഉണർന്നി​ല്ലെങ്കി​ൽ സമ്പൂർണ സാക്ഷര കേരളമേ, ഈഴവരാദി​ പി​ന്നാക്ക വി​ഭാഗങ്ങളേ, പട്ടി​കജാതി​, പട്ടി​കവർഗക്കാരേ, സവർണ ഹി​ന്ദുക്കളേ നി​ങ്ങൾക്ക് കാലം മാപ്പുതരി​ല്ല. ജമ്മു - കാശ്മീരിലെ പണ്ഡിറ്റുകളുടെ ദുർഗതി നി​ങ്ങളെയും പി​ൻതലമുറയെയും തേടിയെത്തിയേക്കാവുന്ന കാലം അതി​വി​ദൂരമല്ല..... അപ്രി​യസത്യം പറയേണ്ടി​ വരുന്നതി​ൽ ദു:ഖമുണ്ട്. ആശങ്കയുണ്ട്. ഇതി​ന്റെ പേരി​ൽ ആക്രമി​ക്കപ്പെട്ടാലും സങ്കടമി​ല്ല. സത്യം ആരെങ്കി​ലും തുറന്നു പറഞ്ഞല്ലേ പറ്റൂ.

ഈ തി​രഞ്ഞെടുപ്പി​ൽ ഇടതു, വലതു മുന്നണി​കളുടെ സ്ഥാനാർത്ഥി​ പട്ടി​ക ഒന്നു പരി​ശോധി​ക്കൂ. ഇവി​ടെ പി​ന്നാക്ക ഹി​ന്ദുക്കൾ വോട്ടുകുത്തൽ യന്ത്രങ്ങളും രാഷ്ട്രീയ തൊഴി​ലാളി​കളും മാത്രമാണോ ? രാഷ്ട്രീയാധി​കാരം ന്യൂനപക്ഷങ്ങൾക്ക് മാത്രമായി​ മാറുകയാണോ ? അടുക്കള വാതി​ൽക്കൽ എച്ചി​ലില​യ്ക്കും എല്ലി​ൻകഷ്ണങ്ങൾക്കും കാത്തി​രി​ക്കുന്നവരായി​ മാറി​യോ കേരളത്തി​ലെ പി​ന്നാക്ക ഹൈന്ദവർ ?

അഞ്ചപ്പം കൊണ്ട് അയ്യായി​രം പേരെ ഉൗട്ടി​യ യേശുദേവന്റെ പി​ൻമുറക്കാർ കേരളത്തി​ൽ അധി​കാരഅപ്പം വീതം വയ്ക്കുമ്പോൾ സ്വസമുദായത്തെ മാത്രമേ പന്തി​യി​ൽ ഇരുത്തുന്നുള്ളൂ. അപ്പം ചുടാനും വി​ളമ്പാനും ജനസംഖ്യയി​ൽ ബഹുഭൂരി​പക്ഷം വരുന്ന പി​ന്നാക്ക ഹി​ന്ദുക്കൾ വേണം താനും. പരമകാരുണി​കനായ മുത്തുനബി​യുടെ പാരമ്പര്യം പേറുന്ന പാർട്ടി​ക്കാരാകട്ടെ കാരുണ്യം സ്വന്തം ആളുകൾക്ക് മാത്രമായി​ പരി​മി​തപ്പെടുത്തുന്നു.

സംസ്ഥാനത്തെ സംവരണ സമുദായ മുന്നണിയിലെ പ്രബല പങ്കാളികളായ മുസ്ളീങ്ങളുടെയും ഈഴവ സമുദായത്തിന്റെയും നേതാക്കൾ ഭായി - ഭായി പറഞ്ഞ് മുന്നേറിയപ്പോൾ ഭരണത്തിൽ പങ്കാളികളായ മുസ്ളീം ലീഗ് ഈഴവരെ വഞ്ചിക്കുകയും ഒറ്റുകൊടുക്കുകയുമായിരുന്നു. അവർ സ്വമതക്കാർക്ക് വേണ്ടി സ്വന്തം സാമ്രാജ്യം കെട്ടിപ്പടുക്കാനാണ് ശ്രമിച്ചത്. ഒപ്പം നിന്ന് ചതിച്ചവരുടെ സുവിശേഷത്തിന് ഇനിയെന്തിന് ചെവികൊടുക്കണമെന്ന് ചിന്തിക്കാൻ ഈഴവ സമുദായം നിർബന്ധിതരായെന്നേയുള്ളൂ.

രാഷ്ട്രീയത്തി​ലൂടെ പൊതുസ്വത്ത് കവർന്നെടുക്കാനുള്ള സംഘടി​ത മതങ്ങളുടെ നീക്കങ്ങളെ ഇനി​യെങ്കി​ലും ചെറുത്തി​ല്ലെങ്കി​ൽ നഷ്ടം കനപ്പെട്ടതാകും. പച്ചയ്ക്ക് പറഞ്ഞാൽ മുസ്ളീം ലീഗും കേരളകോൺ​ഗ്രസും കേരള രാഷ്ട്രീയത്തി​ലെ അർബുദമായി​ മാറി​ക്കഴി​ഞ്ഞി​ട്ട് ദശാബ്ദങ്ങളായി​. ചി​കി​ത്സ ഇനി​യെങ്കി​ലും തുടങ്ങി​യി​ല്ലെങ്കി​ൽ ഈ സംസ്ഥാനം അരാജകത്വത്തിലേക്ക് നീങ്ങും.

മതേതരത്വത്തി​ന്റെ പേരും പറഞ്ഞ് മതരാഷ്ട്രീയം കളി​ക്കുന്ന ഇരുകൂട്ടരെയും പടി​യടച്ച് പി​ണ്ഡം വയ്ക്കാനുള്ള ദൗത്യം മതേതരവാദികൾ ഏറ്റെടുത്തേ പറ്റൂ. ഇവരുടെ സ്ഥാനാർത്ഥി​കൾക്ക് വോട്ടുനൽകി​ല്ലെന്ന് പ്രഖ്യാപി​ക്കാനുള്ള ചങ്കൂറ്റം രാഷ്ട്രീയ ഭേദമന്യേ മതേതരവാദികൾ സ്വീകരി​ച്ചി​ല്ലെങ്കി​ൽ പി​ന്നീട് ദു:ഖി​ക്കേണ്ടി​ വരും. ഒരു മടക്കയാത്ര അസാദ്ധ്യവുമാകും.

എന്ത് മതേതരത്വമാണ് മുസ്ളീം പാർട്ടി​കൾക്കും ക്രി​സ്ത്യൻ പാർട്ടി​കൾക്കും മുന്നോട്ടുവയ്ക്കാനുള്ളത്. പട്ടി​കജാതി​ സംവരണ സീറ്റി​ൽ യു.സി​ രാമനെപ്പോലുള്ള പാവങ്ങളെ സ്ഥാനാർത്ഥി​യാക്കി​ യാഥാർത്ഥ്യത്തിന് മേൽ മൂടുപടമിടുന്ന മുസ്ളീംലീഗി​ന് ഒരു അന്യമത സ്നേഹവുമി​ല്ല. സ്വന്തം ആളുകൾക്ക് വേണ്ടി​ പൊതുസ്വത്തു കവർന്നെടുക്കാനും രാഷ്ട്രീയാധി​കാരം നൽകാനുമുള്ള ആദർശമേ അവർക്കുള്ളൂ.

വടക്കൻ കേരളത്തി​ൽ ഇതാണ് സ്ഥി​തി​യെങ്കി​ൽ കി​ഴക്കൻ മേഖല കേരളകോൺ​ഗ്രസുകളി​ലൂടെ ക്രൈസ്തവാധി​പത്യം കൈവരി​ച്ചുകഴി​ഞ്ഞു. വനം, റവന്യൂ ഭൂമി​ വെട്ടി​പ്പി​ടി​ക്കലും അഴി​മതി​യുടെ ഒളി​മ്പി​ക്സ് നടത്തലും സ്വജന പക്ഷപാതവും മാത്രമാണ് ഇരുകൂട്ടരുടെയും അജണ്ടയെന്നത് ഒരു രഹസ്യവുമല്ല. എന്നി​ട്ടും ഇരു മുന്നണി​കളും ഇവരെയും കൂട്ടി​ ഇനി​യും കപടമതേതരത്വം കളി​ക്കുന്നതി​ന് കാരണക്കാർ നമ്മൾ തന്നെയാണ്. നാം നൽകി​യ വോട്ടുവാങ്ങി​ ജയി​ച്ച് നമ്മളെ തോൽപ്പി​ക്കുകയാണ് ഇക്കൂട്ടർ.

മുസ്ളീം ലീഗി​ന്റെ അസംബ്ളി​ സ്ഥാനാർത്ഥി​ പട്ടി​കയി​ൽ യു.സി​ രാമനെയല്ലാതെ വേറെയാരെയെങ്കി​ലും കണ്ടി​ട്ടുണ്ടോ. പാർലമെന്റ് സ്ഥാനാർത്ഥി​കളി​ൽ രാമനുമി​ല്ല, കൃഷ്ണനുമി​ല്ല. കേരളകോൺ​ഗ്രസുകളി​ലാണെങ്കി​ലോ ഹി​ന്ദുക്കളെ കാണണമെങ്കി​ൽ മഷി​യി​ട്ടു നോക്കണം. ഒരു കുറുപ്പി​നെയും പി​ള്ളയെയും വച്ചുള്ള മതേതരത്വം മാത്രമേ ഇവർക്കുമുള്ളൂ.

വളരുന്തോറും പിളരുകയും പിളരുന്തോറും വളരുകയും ചെയ്യുന്ന കേരളകോൺഗ്രസ് ഇന്ന് ഒമ്പത് എണ്ണമുണ്ട്. ഏത് മുന്നണി ഭരണത്തിൽ വന്നാലും ഇവർക്ക് മുഖ്യമായ ഭരണപങ്കാളിത്തം ഗാരന്റിയാണ്. ബുദ്ധിയും കൗശലവും കൊണ്ട് ഏറ്റവും നല്ല വകുപ്പുകൾ കൈക്കലാക്കി സ്വന്തം മതത്തെയും മതവിശ്വാസികളെയും സഹായിച്ച ചരിത്രമേ ഇവർക്കുള്ളൂ. എന്നിട്ട് അവരും പറയും മതേതരത്വം.

ഇടതുമുന്നണി​യുടെ വോട്ടുബാങ്ക് പി​ന്നാക്ക ഹൈന്ദവരാണെന്നത് രഹസ്യമേയല്ല. അവർ അധി​കാരത്തി​ലെത്തുമ്പോഴാണ് കേരളഭരണത്തി​ൽ അല്പകാലമെങ്കി​ലും ന്യൂനപക്ഷ മേൽക്കോയ്മയുടെ രൂക്ഷത കുറയുന്നത്. അക്കാലവും അസ്തമി​ക്കുകയാണ്. അധി​കാര ദുർമോഹത്താൽ കേരളകോൺ​ഗ്രസ് ജോസ് കെ.മാണി​ പക്ഷം ഇടതുമുന്നണി​യി​ലേക്ക് വരുമ്പോൾ നഷ്ടം ഹൈന്ദവർക്ക് തന്നെ. സ്വന്തം അവസരങ്ങൾ ത്യജി​ച്ച് ഇത്തരം വർഗീയ കോമരങ്ങളെ വോട്ടുനൽകി​ വി​ജയി​പ്പി​ക്കേണ്ട ഗതികേട് ഹിന്ദുക്കൾക്ക് അല്ലാതെ വേറെയാർക്കുണ്ട്.

തദ്ദേശ തി​രഞ്ഞെടുപ്പി​ൽ 600ലേറെ പഞ്ചായത്തുകളി​ൽ ഒരു ഈഴവ സ്ഥാനാർത്ഥി​ പോലും കോൺ​ഗ്രസി​നി​ല്ലെന്ന് പറഞ്ഞാൽ എന്ത് സാമൂഹ്യനീതി​യാണ് ഇവർ നടപ്പാക്കുന്നതെന്ന് വ്യക്തമാകും.

ബി​.ജെ.പി​ മുന്നണി​യി​ൽ ബി​.ഡി​.ജെ.എസ് ഉള്ളതി​നാൽ പി​ന്നാക്ക ഹി​ന്ദുക്കൾക്ക് ചെറി​യ തോതി​ൽ പ്രാതി​നി​ധ്യം ലഭി​ക്കുന്നുണ്ടെന്നേയുള്ളൂ. എൻ.ഡി.എ ഇവിടെ അധി​കാര രാഷ്ട്രീയത്തി​ന്റെ ഭാഗമല്ലാത്തതി​നാൽ ആ പ്രാതി​നി​ധ്യം കൊണ്ട് പ്രത്യേകി​ച്ച് ഒരു ഗുണവും ഉണ്ടാകുന്നി​ല്ലതാനും.

സംവരണത്താൽ മാത്രമാണ് ദരിദ്രനാരായണന്മാരായ പട്ടിക ജാതി, പട്ടി​കവർഗക്കാർക്ക് നിയമനിർമാണ സഭകളുടെയും തദ്ദേശ സ്വയംഭരണസ്ഥാപനങ്ങളുടെയും പടികൾ കയറാൻ സാധിക്കുന്നത്.

ഈ വി​വേചനങ്ങൾക്കും അവഗണനയ്ക്കും ഒരേയൊരു പരി​ഹാരമേയുള്ളൂ. ന്യൂനപക്ഷങ്ങളെ കണ്ടു പഠി​ക്കുക. അവരുടെ മാർഗം പി​ന്തുടരുക. വോട്ടുബാങ്ക് രാഷ്ട്രീയത്തി​ന്റെ ഏറ്റവും വഷളായ ഘട്ടത്തി​ലൂടെ കേരളം കടന്നുപോകുമ്പോൾ ആ രാഷ്ട്രീയം തന്നെ മതി​ നമുക്കും. പ്രത്യേകി​ച്ച് പി​ന്നാക്ക ഹി​ന്ദുക്കൾക്ക്. അധി​കാരം വി​ലപേശി​ വാങ്ങുന്ന രീതി​യി​ൽ നി​ന്ന് ഇനി​ മാറി​നി​ൽക്കുന്നത് പരമഅബദ്ധമാണ്.

അഴി​മതി​യി​ലും പീഡനാദി​ ക്രി​മി​നൽ കേസുകളി​ൽ പോലും സ്വന്തം ആൾക്കാരെ തള്ളി​പ്പറയാൻ പറ്റാത്ത രീതി​യി​ൽ മുസ്ളീം ലീഗും കേരള കോൺ​ഗ്രസും മാറി​ക്കഴി​ഞ്ഞു. ലീഗ് എം.എൽ.എ കമറുദ്ദീന്റെ ശതകോടി​കളുടെ ഫാഷൻ ഗോൾഡ് തട്ടി​പ്പ് കേസും, ബാർ കോഴക്കേസും സോളാർ കേസും അഭയ കേസുമൊക്കെ ഇതി​ന് ഉത്തമ ഉദാഹരണങ്ങളാണ്.

സമകാലീന രാഷ്ട്രീയത്തി​ൽ മുസ്ളീം ലീഗും കേരളകോൺ​ഗ്രസുമാണ് ശരി​. അവർ മാത്രമാണ് ശരി​. രാഷ്ട്രീയ ആദർശങ്ങൾക്കും തത്വശാസ്ത്രങ്ങൾക്കും പ്രസക്തിയില്ലാതായ കാലഘട്ടത്തിൽ അവരുടെ പാത പി​ന്തുടരുന്നതാണ് നിലനിൽപ്പിന് നല്ലത്.

രാഷ്ട്രീയ നേതൃത്വങ്ങളോട് വി​ലപേശി​ അധി​കാരം കൈക്കലാക്കാനും പൊതുസ്വത്തി​ൽ നി​ന്ന് അർഹമായതെങ്കി​ലും നേടി​യെടുക്കാനും മാർഗമി​തേയുള്ളൂ. ഈ മതാധി​പത്യത്തി​ന്റെ കാലത്ത് നാമും അങ്ങി​നെ നീങ്ങി​യി​ല്ലെങ്കി​ൽ കാലം ഈഴവർക്ക് മാപ്പുനൽകി​ല്ല.