മിഗ് 29 കെ വിമാനത്തിന്റെ അവശിഷ്ടങ്ങൾ കണ്ടെത്തി

ന്യൂഡൽഹി: പരിശീലന പറക്കലിനിടെ അറബിക്കടലിൽ തകർന്നുവീണ മിഗ് 29 കെ വിമാനത്തിന്റെ അവശിഷ്ടങ്ങൾ കണ്ടെത്തിയതായി നാവികസേന അറിയിച്ചു. കാണാതായ പൈലറ്റിനായുള്ള തെരച്ചിൽ ഊർജിതമാക്കിയിരിക്കുകയാണെന്ന് അധികൃതർ പറഞ്ഞു.

വിമാനത്തിന്റെ ലാൻഡിംഗ് ഗിയർ, ടർബോചാർജ്ജർ, ഫ്യുവൽ ടാങ്ക് എൻജിൻ, വിംഗ് എൻജിൻ കൗലിംഗ് എന്നിവയാണ് കണ്ടെത്തിയത്. കഴിഞ്ഞ വ്യാഴാഴ്ചയാണ് മിഗ് 29 കെ വിമാനം അറബിക്കടലിൽ തകർന്ന് വീണത്. ഈ സമയത്ത് വിമാനത്തിൽ രണ്ട് പൈലറ്റുമാർ ഉണ്ടായിരുന്നു. ഒരാളെ രക്ഷിച്ചു.

ഒൻപത് നാവികസേനാ യുദ്ധക്കപ്പലുകളും, 14 യുദ്ധവിമാനങ്ങളും സംയുക്തമായാണ് പൈലറ്റിനു വേണ്ടിയുള്ള തെരച്ചിൽ നടത്തുന്നത്. സമുദ്രമേഖലയുടെ തീരപ്രദേശങ്ങളിൽ തീരദേശ പൊലീസും അന്വേഷണം നടത്തുന്നുണ്ട്.