തദ്ദേശ തിരഞ്ഞെടുപ്പ് ദിവസങ്ങളിൽ മദ്യമില്ല

തിരുവനന്തപുരം: തദ്ദേശ തിരഞ്ഞെടുപ്പ് ദിവസങ്ങളിലും വോട്ടെണ്ണൽ ദിവസവും സംസ്ഥാനത്ത് മദ്യനിരോധനം ഏർപ്പെടുത്തി. മൂന്ന് ഘട്ടമായി നടക്കുന്ന തിരഞ്ഞെടുപ്പിൽ പ്രചാരണം അവസാനിക്കുന്ന സമയം മുതൽ വോട്ടെടുപ്പ് തീരുന്നതുവരെയും വോട്ടെണ്ണൽ ദിവസവുമാണ് ഡ്രൈ ഡേ. തിരഞ്ഞെടുപ്പ് കമ്മിഷന്റെ ശുപാർശയെതുടർന്നാണിത്.

ആദ്യഘട്ട തിരഞ്ഞെടുപ്പ് നടക്കുന്ന തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകളിൽ പ്രചാരണം അവസാനിക്കുന്ന 6 ന് വൈകിട്ട് 6 മുതൽ വോട്ടെടുപ്പ് നടക്കുന്ന 8 ന് പോളിംഗ് അവസാനിക്കുന്നതുവരെയും. രണ്ടാംഘട്ട തിരഞ്ഞെടുപ്പ് നടക്കുന്ന കോട്ടയം, എറണാകുളം, തൃശൂർ, പാലക്കാട്, വയനാട് ജില്ലകളിൽ 8 ന് വൈകിട്ട് 6 മുതൽ 10ന് വോട്ടെടുപ്പ് അവസാനിക്കുന്നതുവരെയും മൂന്നാംഘട്ട തിരഞ്ഞെടുപ്പ് നടക്കുന്ന മലപ്പുറം, കോഴിക്കോട്, കണ്ണൂർ, കാസർകോട് ജില്ലകളിൽ 12 ന് വൈകിട്ട് 6 മുതൽ 14 ന് വൈകിട്ടുവരെയാണ് ഡ്രൈ ഡേ. വോട്ടെണ്ണൽ നടക്കുന്ന 16 നും മദ്യമില്ല.