ബുറേവി: പേരിട്ടത് മാലദ്വീപ്

ഇപ്പോഴത്തെ കാറ്റിന് ബുറേവി എന്ന് പേരിട്ടത് മാലദ്വീപാണ്. കാറ്റ് രൂപം കൊള്ളുന്ന മേഖലയിലെ രാജ്യങ്ങൾക്ക് അക്ഷരമാലാ ക്രമത്തിലാണ് പേരിടാൻ അവകാശം. ഉത്തര ഇന്ത്യൻ മഹാസമുദ്ര മേഖലയിൽ പതിമ്മൂന്ന് രാജ്യങ്ങളാണ് പേരിടുന്നത്. ബംഗ്ലാദേശ്,​ ഇന്ത്യ,​ മാലദ്വീപ്,​ മ്യാൻമർ,​ഒമാൻ,​ പാകിസ്ഥാൻ,​ ശ്രീലങ്ക,​ തായ്ലൻഡ്,​ ഇറാൻ,​ ഖത്തർ,​ സൗദി അറേബ്യ,​ യു. എ. ഇ,​ യെമൻ എന്നിവയാണ് ഈ രാജ്യങ്ങൾ​. ഓരോ രാജ്യവും ഇക്കൊല്ലം പതിമ്മൂന്ന് പേരുകൾ വീതം നിർദ്ദേശിച്ചിട്ടുണ്ട്. മൊത്തം 169 പേരുകൾ. ഓരോ കൊടുങ്കാറ്റ് ഉണ്ടാകുമ്പോഴും രാജ്യങ്ങൾ നൽകിയ പേരുകൾ ഊഴമനുസരിച്ച് നൽകുകയാണ് പതിവ്.

അടുത്ത കൊടുങ്കാറ്റിന് മ്യാൻമർ നിർദ്ദേശിച്ച തൗക്‌തേ എന്ന പേരായിരിക്കും. തുടർന്നുള്ള പേരുകൾ യാസ് ( ഒമാൻ )​,​ ഗുലാബ് ( പാകിസ്ഥാൻ )​ എന്നിങ്ങനെ ആയിരിക്കും.

ഗതി,​ തേജ്,​ മറാസു,​ ആഗ്,​ നീർ തുടങ്ങിയ പേരുകളാണ് ഇന്ത്യ നിർദ്ദേശിച്ച പുതിയ ലിസ്റ്റിലുള്ളത്.

ലോക കാലാവസ്ഥാ സംഘടനയുടെ ( വേൾഡ് മീറ്റിയറോളജിക്കൽ ഓർഗനൈസേഷൻ )​ മാനദണ്ഡങ്ങൾ പ്രകാരമാണ് ചുഴലിക്കൊടുങ്കാറ്റുകൾക്ക് പേരിടുന്നത്. ലോകത്താകെ ആറ് റീജിയണൽ സ്പെഷ്യലൈസ്ഡ് മീറ്റിയറോളജിക്കൽ സെന്ററുകളും ( RSMC )​ഇന്ത്യൻ കാലാവസ്ഥാ കേന്ദ്രം ( IMD ) ഉൾപ്പെടെ അഞ്ച് ട്രോപ്പിക്കൽ സൈക്ലോൺ വാണിംഗ് സെന്ററുകളും ( TCWC )​ നാമകരണത്തിൽ പങ്കാളികളാണ്. ബംഗാൾ ഉൾക്കടലും അറബിക്കടലും ഉൾപ്പെടുന്ന ഇന്ത്യൻ മഹാസമുദ്രമേഖലയിലെ പേരിടലിന്റെ മേൽനോട്ടം ഇന്ത്യൻ കാലാവസ്ഥാ കേന്ദ്രത്തിനാണ്.