ഗർഭിണിയായ പശുവിനോട് കൊടുംക്രൂരത; മരത്തിൽ കുരുക്കിട്ട് കൊന്ന് സാമൂഹിക വിരുദ്ധർ, സംഭവം നടന്നത് പത്തനംതിട്ടയിൽ

പത്തനംതിട്ട: ഗർഭിണിയായ പശുവിനോട് കൊടുംക്രൂരത കാട്ടി സാമൂഹിക വിരുദ്ധർ. വീടിന് സമീപം കെട്ടിയിരുന്ന എട്ടുമാസം ​ഗർഭിണിയായ പശുവിനെ മരത്തിൽ ചേർത്ത് കരുക്കിട്ട് ചിലർ കൊല്ലുകയായിരുന്നു എന്നാണ് വിവരം. ഇടമുറി പൊന്നമ്പാറ കിഴക്കേചരുവിൽ സുന്ദരേശൻ എന്ന് പേരുള്ളയാളുടെ പശുവിനോട് ഇക്കഴിഞ്ഞ ഞായറാഴ്ചയാണ് ഇവർ ഈ ക്രൂരത കാട്ടിയത്.

വീടിന് സമീപത്തെ ബന്ധുവിന്റെ പറമ്പിൽ മേയാൻ വിട്ടിരുന്ന പശുവിനെ സന്ധ്യയോടെയാണ് കാണാതായത്. തുടർന്ന് നടത്തിയ അന്വേഷണത്തിൽ പശുവിനെ ചേത്തയ്ക്കൽ റബർ ബോർ‍ഡ് ഡിവിഷൻ ഓ​ഫീസിന് സമീപത്തായി കെ​ട്ടി​യി​ട്ട​ നി​ല​യി​ല്‍ ക​ണ്ടെ​ത്തി. റബർ‌ ബോർഡ് വക തോട്ടത്തിൽ കയറിയെന്നാരോപിച്ച് വാച്ചർ ഓ​ഫി​സി​ൽ എത്തിച്ച് കെട്ടിയിടുകയായിരുന്നു. വിവരമറിഞ്ഞ് നാട്ടുകാരും എത്തിയിരുന്നു.

വിഷയം സംഘർഷത്തിന് കാരണമായതോടെ പൊലീസ് സ്ഥലത്തെത്തി സ്ഥിതി ശാന്തമാക്കിയിരുന്നു. ശേഷം ചർച്ചയ്ക്കൊടുവിൽ പൊലീസിന്റെ നേതൃത്വത്തിൽ പശുവിനെ സുന്ദരേശന് വിട്ടു നൽകിയിരുന്നു.

സുന്ദരേശൻ രാത്രിയോടെ വീട്ടിൽ എത്തി തൊട്ടടുത്ത റബർ മരത്തിൽ പശുവിനെ കെട്ടിയിട്ടു. തുടർന്ന് രാവിലെ വീട്ടുകാർ നോക്കുമ്പോൾ ചത്ത നിലയിൽ പശുവിനെ കണ്ടെത്തുകയായിരുന്നു. വീ​ട്ടു​കാ​ര്‍ കെ​ട്ടി​യ കയർ കൂ​ടാ​തെ കു​രു​ക്കി​ട്ട് മ​റ്റൊ​രു മ​ര​ത്തി​ലേ​ക്ക് വ​ലി​ച്ചു കെ​ട്ടി ച​ലി​ക്കാ​നാ​വാ​ത്ത നി​ല​യി​ലാ​യി​രു​ന്നു പ​ശു. വീ​ട്ടു​കാ​രു​ടെ പ​രാ​തി​യെ തു​ട​ര്‍ന്ന് പെ​രു​നാ​ട് പൊ​ലീ​സ് കേസെടുത്ത് അന്വഷണം ആംരഭിച്ചിട്ടുണ്ട്.