പാലക്കാട്ടെ ദുരഭിമാനക്കൊല; അനീഷിന്റെ ബന്ധുക്കളുടെ മൊഴിയെടുത്തു, കുറ്റപത്രം മൂന്ന് മാസത്തിനുള്ളിൽ

പാലക്കാട്: പാലക്കാട്ടെ ദുരഭിമാനക്കൊലയിൽ അന്വേഷണസംഘം 90 ദിവസത്തിനകം കുറ്റപത്രം സമർപ്പിക്കും. ജില്ലാ ക്രൈംബ്രാഞ്ച് സംഘം കൊല്ലപ്പെട്ട അനീഷിന്റെ ബന്ധുക്കളുടെ മൊഴിയെടുക്കാൻ ആരംഭിച്ചു. ആദ്യഘട്ടത്തിൽ അനീഷിന്റെ ഭാര്യ ഹരിത, അച്ഛൻ ആറുമുഖൻ, സഹോദരങ്ങൾ എന്നിവരുടെ മൊഴികളാണ് രേഖപ്പെടുത്തിയത്.

മകന് ഭീഷണിയുണ്ടായിരുന്നുവെന്ന് മാതാപിതാക്കൾ അന്വേഷണ സംഘത്തോട് പറഞ്ഞു. ലോക്കൽ പൊലീസ് ജാഗ്രത പുലർത്തിയില്ലെന്നും കുടുംബം ആവർത്തിച്ചു.പൊലീസിനെതിരെ ഉയർന്ന ആരോപണത്തെക്കുറിച്ച് അന്വേഷിക്കുമെന്ന് ജില്ലാ ക്രൈംബ്രാഞ്ച് ഡി വൈ എസ് പി സുന്ദരൻ അറിയിച്ചു.

അനീഷിന്റെ ബന്ധുക്കളുടെ മൊഴി രേഖപ്പെടുത്തിയ ശേഷം കേസിലെ പ്രതികളായ പ്രഭുകുമാർ, സുരേഷ് എന്നിവരെ കസ്റ്റഡിയിൽ വാങ്ങി ചോദ്യംചെയ്യുമെന്ന് അന്വേഷണ സംഘം പറഞ്ഞു. കൊലപാതകം നടന്ന സ്ഥലവും ക്രൈം ബ്രാഞ്ച് സന്ദർശിച്ചു