റിപ്പബ്ലിക് ദിനാഘോഷത്തിന് ഗവർണർ പതാക ഉയർത്തും

തിരുവനന്തപുരം: സംസ്ഥാനതല റിപ്പബ്ലിക് ദിനാഘോഷങ്ങളുടെ ഭാഗമായി തിരുവനന്തപുരം സെൻട്രൽ സ്റ്റേഡിയത്തിൽ 26ന് രാവിലെ ഒമ്പതിന് ഗവർണർ ആരിഫ് മുഹമ്മദ് ഖാൻ ദേശീയ പതാക ഉയർത്തും. സായുധ സേന, പൊലീസ്, പാരാമിലിട്ടറി, എൻ.സി.സി പരേഡുകളും നടക്കും. കൊവിഡ് പശ്ചാത്തലത്തിൽ ക്ഷണിക്കപ്പെട്ട 100 പേർക്കായിരിക്കും പ്രവേശനം. ജില്ലാതല പരിപാടികളിൽ മന്ത്രിമാർ പതാക ഉയർത്തും. 100 പേർക്കായിരിക്കും പ്രവേശനം. സബ് ജില്ലാ തലത്തിൽ സബ് ജില്ലാ മജിസ്‌ട്രേറ്റുമാരും ബ്ലോക്ക് തലത്തിൽ ബ്ലോക്ക് പഞ്ചായത്ത് പ്രസിഡന്റുമാരുമാണ് പതാക ഉയർത്തുക. 75 പേർക്കാണ് പ്രവേശനം.
തദ്ദേശ സ്വയംഭരണ സ്ഥാപനങ്ങളിൽ അദ്ധ്യക്ഷൻമാരാണ് പതാക ഉയർത്തുക. 50 പേർക്കാണ് പ്രവേശനം. സർക്കാർ സ്ഥാപനങ്ങളിലും പൊതുമേഖലാ സ്ഥാപനങ്ങളിലും സ്‌കൂളുകളിലും നടക്കുന്ന പരിപാടികളിൽ 50 പേർക്കാണ് പ്രവേശനം. പൊതുജനങ്ങൾക്ക് പ്രവേശനമില്ല.