രാഷ്ട്രീയമായി പരാജയപ്പെടുത്താൻ കഴിയില്ലെന്ന്‌ ബോദ്ധ്യമായപ്പോൾ മ്ലേച്ഛമായ നീക്കം; നാളെ കസ്‌റ്റംസ് ഓഫീസുകളിലേക്ക് എൽ ഡി എഫ് മാർച്ച്

തിരുവനന്തപുരം: ഡോളർ കടത്ത് കേസിൽ കസ്റ്റംസ് കോടതിയിൽ കൊടുത്ത സത്യവാങ്മൂലത്തിനെതിരെ പ്രതിരോധം തീർക്കാനൊരുങ്ങി എൽ ഡി എഫ്. ഇതിന്റെ ഭാഗമായി ശനിയാഴ്‌ച തിരുവനന്തപുരം, കൊച്ചി, കോഴിക്കോട്‌ എന്നിവിടങ്ങളിലെ കസ്റ്റംസ്‌ മേഖലാ ഓഫീസുകളിലേക്ക്‌ എൽ ഡി എഫ്‌ മാർച്ച്‌ നടത്തുമെന്ന് മുന്നണി കൺവീനർ എ വിജയരാഘവൻ അറിയിച്ചു.

നിയമസഭാ തിരഞ്ഞെടുപ്പ്‌ അടുത്ത വേളയിൽ മുഖ്യമന്ത്രിയെയും എൽ ഡി എഫ്‌ സർക്കാരിനെയും അപകീർത്തിപ്പെടുത്താനുളള രാഷ്ട്രീയ കളിയാണ്‌ കസ്റ്റംസ്‌ നടത്തുന്നതെന്ന്‌ വിജയരാഘവൻ ആരോപിച്ചു. ജയിലിൽ കിടക്കുന്ന ഒരു പ്രതിയുടെ മൊഴിയെ അടിസ്ഥാനമാക്കിയാണ്‌ കസ്റ്റംസ്‌ ഹൈക്കോടതിയിൽ സത്യവാങ്‌മൂലം നൽകിയിരിക്കുന്നത്‌. ബി ജെ പിയുടെയും യു ഡി എഫിന്റെയും രാഷ്ട്രീയ പ്രചാരണം കസ്റ്റംസ്‌ ഏറ്റെടുത്തിരിക്കുകയാണെന്നും വിജയരാഘവൻ പറഞ്ഞു.

എൽ ഡി എഫിനെ രാഷ്ട്രീയമായി പരാജയപ്പെടുത്താൻ കഴിയില്ലെന്ന്‌ ബോദ്ധ്യമായപ്പോഴാണ്‌ മ്ലേച്ഛമായ ഈ നീക്കം കസ്റ്റംസ്‌ നടത്തുന്നത്‌. ഇതിനെതിരെ സംസ്ഥാന വ്യാപകമായി പ്രതിഷേധം ഉയർന്നുവരണമെന്നും വിജയരാഘവൻ അഭ്യർത്ഥിച്ചു.