സാമ്പാർ
ചേരുവകൾ
തുവര പരിപ്പ് : ഒരു കപ്പ്
കായം: ഒരു കഷ്ണം
വെളിച്ചെണ്ണ : 2 ടേ.സ്പൂൺ
പച്ചക്കറി
വെണ്ടക്ക: 5 എണ്ണം
വഴുതനങ്ങ : 1
പച്ചക്കായ : ഒന്നിന്റെ പകുതി
പടവലങ്ങ : ചെറിയ കഷ്ണം
കാരറ്റ് : ഒന്നിന്റെ പകുതി
ചെറിയ ഉള്ളി : 10 എണ്ണം
കുമ്പളങ്ങ : ഒരു ചെറിയ കഷ്ണം
ഉരുളക്കിഴങ്ങ് : 1
തക്കാളി : 2
പുളിവെള്ളം : ഒരു നാരങ്ങാ വലുപ്പത്തിൽ എടുത്ത് കഴുകി വെള്ളത്തിൽ ഇട്ട് വെക്കുക
മഞ്ഞൾ : ഒരു ടീസ്പൂൺ
വറുത്തരക്കാൻ
തേങ്ങ : അര കപ്പ്
മല്ലി : 3 ടേബിൾസ്പൂൺ
ഉണക്കമുളക് : 10- 12 എണ്ണം
കുരുമുളക് : കുറച്ച്
ജീരകം : കാൽ ടീസ്പൂൺ
കായം : ഒരു ചെറിയ കഷ്ണം
ഉലുവ : കാൽ ടീസ്പൂൺ
കടുക് വറുക്കാൻ
വെളിച്ചെണ്ണ : 3 ടേസ്പൂൺ
കടുക് : അര ടീസ്പൂൺ
ഉലുവ : കാൽ ടീസ്പൂൺ
ഉണക്കമുളക് : മൂന്നെണ്ണം
കറിവേപ്പില : ഒരു തണ്ട്
കായം പൊടി: കാൽ ടീസ്പൂൺ
ഉലുവ പൊടി : കാൽ ടീസ്പൂൺ
തയ്യാറാക്കുന്ന വിധം
പരിപ്പ് കഴുകി പാകത്തിന് വെള്ളം ഒഴിച്ച് കുറച്ച് മഞ്ഞൾ പൊടി, കായം, വെളിച്ചെണ്ണ അല്പം ഉപ്പ് എന്നിവ ചേർത്ത് വേവിക്കുക. വറുത്തരക്കാൻ എന്നിവയിൽ പറഞ്ഞിരിക്കുന്നവ ചെറിയ തീയിൽ നന്നായി ബ്രൗൺ കളർ ആവും വരെ വറുത്തു ചെറിയ ചൂടിൽ പൊടിച്ചെടുക്കുക. വെള്ളം ചേർക്കുന്നുണ്ടെങ്കിൽ വളരെ കുറച്ചു മാത്രം ചേർക്കാൻ ശ്രദ്ധിക്കുക. പച്ചക്കറികൾ കഴുകി മുറിച്ച് പാകത്തിന് വെള്ളവും മഞ്ഞൾ പൊടിയും ഉപ്പും ചേർത്ത് വേവിക്കുക. മുക്കാൽ വേവാകുമ്പോൾ പുളി വെള്ളവും, പരിപ്പും ചേർക്കുക. നന്നായി തിളച്ചു വരുമ്പോൾ അരപ്പ് ചേർത്ത് ചെറിയ തീയിൽ ഇട്ട് മൂടി വെച്ചു വേവിക്കുക. കഷ്ണങ്ങൾ വെന്തു ചാറ് കുറുകി വരുമ്പോൾ കുറച്ചു മല്ലി ഇല ചേർത്ത് തീ ഓഫ് ആക്കുക. വെളിച്ചെണ്ണ ഒഴിച്ച് കടുക്, ഉലുവ പൊട്ടിച്ചു വറ്റൽ മുളക്, കറിവേപ്പില, ഉലുവ പൊടി, കായം പൊടി എന്നിവ ചേർത്ത് മൂപ്പിച്ച് സാമ്പാറിലേക്ക് ചേർത്തിളക്കുക.
കാളൻ
ചേരുവകൾ
കുമ്പളങ്ങ : 250 ഗ്രാം
പച്ചമുളക് : 4 എണ്ണം
ജീരകം : അര ടീ സ്പൂൺ
ഇഞ്ചി : ഒരു ചെറിയ കഷ്ണം
തേങ്ങ : 1 കപ്പ്
മഞ്ഞൾപൊടി : അര ടീ സ്പൂൺ
മുളക് പൊടി : കാൽ ടീ സ്പൂൺ
തൈര് : 1.5 കപ്പ്
വെളിച്ചെണ്ണ : 3 ടേബിൾ സ്പൂൺ
ഉലുവ : കാൽ ടീ സ്പൂൺ
കടുക് : കാൽ ടീ സ്പൂൺ
വറ്റൽ മുളക് : 3 എണ്ണം
കറിവേപ്പില : 2 തണ്ട്
ഉപ്പ് : ആവശ്യത്തിന്
വെള്ളം : ആവശ്യത്തിന്
തയ്യാറാക്കുന്ന വിധം
ചെറുതായി അരിഞ്ഞെടുത്ത കുമ്പളങ്ങയിലേക്ക് മഞ്ഞൾ പൊടി, മുളക് പൊടി, ഉപ്പ് പാകത്തിന് വെള്ളം എന്നിവ ചേർത്ത് വേവിക്കുക. തേങ്ങയിലേക്ക് ഇഞ്ചി, പച്ചമുളക്, ജീരകം എന്നിവ ചേർത്ത് നന്നായി അരച്ചെടുക്കുക. വെന്ത കഷ്ണത്തിലേക്ക് അരപ്പ് ചേർത്തു തിളപ്പിക്കുക. തൈര് നന്നായി ഉടച്ചെടുത്തു ചേർക്കുക. നന്നായി ചൂടായൽ തീ ഓഫ് ചെയ്ത് വെളിച്ചെണ്ണ ചൂടാക്കി കടുക്, ഉലുവ പൊട്ടിക്കുക. ഇതിലേക്ക് വറ്റൽ മുളക്, കറിവേപ്പില എന്നിവ ചേർത്ത് മൂപ്പിക്കുക. കുരുമുളക് പൊടിയും കൂടെ ചേർത്ത് തീ ഓഫ് ആക്കി കറിയിലേക്ക് ചേർക്കുക.
പരിപ്പ്
ചേരുവകൾ
പയറ് പരിപ്പ് : 1 കപ്പ്
പച്ചമുളക് : 2
തേങ്ങപാൽ : 1 കപ്പ്
ഉപ്പ് : ആവശ്യത്തിന്
നെയ്യ് : ആവശ്യത്തിന്
തയ്യാറാക്കുന്ന വിധം
പയറ്പരിപ്പ് പച്ചമുളക് ചേർത്ത് നന്നായി വേവിച്ചെടുക്കുക. ചെറുതായി ഉടച്ചെടുത്തു ഉപ്പും തേങ്ങാപാലും ചേർത്ത് നന്നായി ചൂടാകുമ്പോൾ തീ ഓഫ് ആക്കുക. കട്ടി പരിപ്പ് വിളമ്പുമ്പോൾ നെയ്യ് കൂടെ വിളമ്പുക.
പുളി ഇഞ്ചി
ചേരുവകൾ
ഇഞ്ചി : അര കപ്പ് ചെറുതായി അരിഞ്ഞത്
പച്ചമുളക് : കാൽ കപ്പ് ചെറുതായി അരിഞ്ഞത്
വാളൻ പുളി : ഒരു നാരങ്ങ വലുപ്പത്തിൽ
ശർക്കര : 1 കഷ്ണം
മഞ്ഞൾ പൊടി : കാൽ ടീ സ്പൂൺ
മുളക് പൊടി : കാൽ ടീ സ്പൂൺ
വെളിച്ചെണ്ണ : 4 ടേബിൾ സ്പൂൺ
കടുക് അര: ടീ സ്പൂൺ
വറ്റൽ മുളക് : 3 എണ്ണം
കറിവേപ്പില : 2 തണ്ട്
ഉപ്പ്
വറുത്തു പൊടിക്കാൻ
ജീരകം: കാൽ ടീ സ്പൂൺ
ഉലുവ കാൽ: ടീ സ്പൂൺ
തയ്യാറാക്കുന്ന വിധം
പുളിയിൽ ആവശ്യത്തിന് വെള്ളം ചേർത്ത് നന്നായി പിഴിഞ്ഞെടുക്കുക. ശർക്കര കുറച്ചു വെള്ളം ചേർത്ത് ഉരുക്കി എടുത്ത് അരിച്ചു വെക്കുക. വെളിച്ചെണ്ണ ചൂടാക്കി കടുക് പൊട്ടിക്കുക. ശേഷം വറ്റൽ മുളക് ചേർക്കുക. ഇനി ഇഞ്ചി ചേർത്ത് നന്നായി മൂപ്പിക്കുക. ഇഞ്ചി ചെറുതായി കളർ മാറി തുടങ്ങുമ്പോൾ പച്ചമുളക് ചേർക്കുക. ശേഷം ലൈറ്റ് ബ്രൗണ് കളർ ആവും വരെ മൂപ്പിക്കുക. കറിവേപ്പില മഞ്ഞൾ പൊടി, മുളക് പൊടി, ഉപ്പ് എന്നിവ ചേർക്കുക. പുളി വെള്ളം ചേർത്ത് നന്നായി തിളക്കുമ്പോൾ ചെറിയ തീയിൽ ഇട്ട് കുറുക്കി എടുക്കുക. ശേഷം ഉരുക്കിയ ശർക്കര ചേർത്ത് യോജിപ്പിക്കുക. പാകത്തിന് കുറുകി വരുമ്പോൾ വറുത്തു പൊടിച്ച ജീരകം ഉലുവ എന്നിവ ചേർത്തിളക്കി തീ ഓഫ് ആക്കുക.
കാബേജ് തോരൻ
ചേരുവകൾ
കാബേജ് : ഒരു വലിയ കഷ്ണം
സവാള : 1 വലുത്
പച്ചമുളക് : 3 എണ്ണം
തേങ്ങ: 1 കപ്പ്
കറിവേപ്പില: 2 തണ്ട്
മഞ്ഞൾ പൊടി : അര ടീ സ്പൂൺ
വെളിച്ചെണ്ണ: 3 ടേബിൾ സ്പൂൺ
കടുക്: 1 ടീ സ്പൂൺ
ഉഴുന്ന് പരിപ്പ് : അര ടീ സ്പൂൺ
ഉപ്പ് :ആവശ്യത്തിന്
തയ്യാറാക്കുന്ന വിധം
കാബേജ് നേരിയതായി അരിഞ്ഞെടുക്കുക. ഇതിലേക്ക് സവാള അരിഞ്ഞത്, പച്ചമുളക്, തേങ്ങ, കറിവേപ്പില, മഞ്ഞൾ പൊടി, ഉപ്പ് എന്നിവ ചേർത്ത് കുഴക്കുക. വെളിച്ചെണ്ണ ചൂടാക്കി കടുക് പൊട്ടിക്കുക. ഉഴുന്ന് പരിപ്പ് കൂടെ ചേർത്ത് ചെറുതായി ചുവന്നു വരുമ്പോൾ കുഴച്ചു വെച്ച കാബേജ് ചേർത്തിളക്കി മൂടി വെച്ച് ചെറിയ തീയിൽ കുക്ക് ചെയ്യുക.
വെള്ളരിക്ക പച്ചടി
ചേരുവകൾ
വെള്ളരി ചെറുതായി അരിഞ്ഞത് : 2 കപ്പ്
തേങ്ങ: 1 കപ്പ്
പച്ചമുളക് : 3 എണ്ണം
കടുക് : അര ടീ സ്പൂൺ
കട്ടി തൈര് :1 കപ്പ്
ഉപ്പ്
വെള്ളം
താളിച്ചു ചേർക്കാൻ
വെളിച്ചെണ്ണ : 3 ടേബിൾ സ്പൂൺ
കടുക് : അര ടീ സ്പൂൺ
വറ്റൽ മുളക് : 2 എണ്ണം
കറിവേപ്പില : 2 തണ്ട്
തയ്യാറാക്കുന്ന വിധം
വെള്ളരി പാകത്തിന് വെള്ളവും ഉപ്പും ചേർത്ത് വേവിക്കുക. തേങ്ങയും, പച്ച മുളകും കടുകും കൂടെ നന്നായി ചതച്ചെടുക്കുക. വെള്ളരി പാകത്തിന് വെന്തു കഴിഞ്ഞു അരപ്പ് ചേർക്കുക. ചെറിയ തീയിൽ ഇട്ട് ഒരു 5 മിനിറ്റ് നന്നായി ഇളക്കി വേവിക്കുക. തൈര് നന്നായി ഉടച്ചു ചേർത്ത് നന്നായി ഒന്ന് ചൂടായി വരുമ്പോൾ തീ ഓഫ് ആക്കുക. വെളിച്ചെണ്ണ ചൂടാക്കി കടുക് പൊട്ടിച്ചു വറ്റൽ മുളകും കറിവേപ്പിലയും ചേർത്ത് വറുത്തിടുക.
പൈനാപ്പിൾ പച്ചടി
ചേരുവകൾ
പൈനാപ്പിൾ ചെറുതായി അരിഞ്ഞത് : 2 കപ്പ്
തേങ്ങ: 1 കപ്പ്
പച്ചമുളക് : 3 എണ്ണം
കടുക് : അര ടീ സ്പൂൺ
കട്ടി തൈര് :1 കപ്പ്
പഞ്ചസാര : 1 ടീ സ്പൂൺ (പൈനാപ്പിളിന്റെ
മധുരം നോക്കി ചേർക്കുക)
ഉപ്പ് : ആവശ്യത്തിന്
വെള്ളം : ആവശ്യത്തിന്
താളിച്ചു ചേർക്കാൻ
വെളിച്ചെണ്ണ : 3 ടേബിൾ സ്പൂൺ
കടുക് : അര ടീ സ്പൂൺ
വറ്റൽ മുളക് : 2 എണ്ണം
കറിവേപ്പില : 2 തണ്ട്
തയ്യാറാക്കുന്ന വിധം
പൈനാപ്പിൾ പാകത്തിന് വെള്ളവും ഉപ്പും ചേർത്ത് വേവിക്കുക. തേങ്ങയും, പച്ച മുളകും കടുകും കൂടെ നന്നായി ചതച്ചെടുക്കുക. പൈനാപ്പിൾ പാകത്തിന് വെന്തു കഴിഞ്ഞു അരപ്പ് ചേർക്കുക. ചെറിയ തീയിൽ ഇട്ട് ഒരു 5 മിനിറ്റ് നന്നായി ഇളക്കി വേവിക്കിക്കുക. തൈര് നന്നായി ഉടച്ചു ചേർത്ത് നന്നായി ഒന്ന് ചൂടായി വരുമ്പോൾ പഞ്ചസാര ചേർത്തിളക്കി തീ ഓഫ് ആക്കുക. വെളിച്ചെണ്ണ ചൂടാക്കി കടുക് പൊട്ടിച്ചു വറ്റൽ മുളകും കറിവേപ്പിലയും ചേർത്ത് വറുത്തിടുക.
കൂട്ടുകറി
ചേരുവകൾ
ചേന : ഒരു ചെറിയ കഷ്ണം
പച്ച ഏത്തക്ക : 1
കുമ്പളങ്ങ : ഒരു ചെറിയ കഷ്ണം
കടല പരിപ്പ് : 1/2 കപ്പ്
മുളകുപൊടി : 1/2 ടീസ്പൂൺ
മഞ്ഞൾപ്പൊടി : 1/2 ടീസ്പൂൺ
ഉപ്പ് : പാകത്തിന്
ശർക്കര പൊടിച്ചത് : കുറച്ചു
ഒതുക്കി എടുക്കാൻ
തേങ്ങ ചിരവിയത് : 1 കപ്പ്
ജീരകം : 1/2 ടി സ്പൂൺ
പച്ചമുളക്: 2
കടുക് താളിക്കാൻ
വെളിച്ചെണ്ണ : 2 ടേബിൾ സ്പൂൺ
കടുക് : 1 ടീസ്പൂൺ
കറിവേപ്പില
കുരുമുളക് പൊടി : 1/4 ടി സ്പൂൺ
തേങ്ങ ചിരവിയത് : 1/4 കപ്പ്
തയ്യാറാക്കുന്ന വിധം
കടല പരിപ്പ് രാത്രി തന്നെ കുതിർത്തു വെക്കണം. കടല പരിപ്പ് നന്നായി വേവിച്ചതിനു ശേഷം ചേനയും എത്തക്കയും കുമ്പളവും മഞ്ഞൾപ്പൊടിയും മുളകുപൊടിയും പാകത്തിന് ഉപ്പും ചേർത്ത് വേവിക്കുക. തേങ്ങ, ജീരകം, പച്ചമുളക് എന്നിവ ഒതുക്കി എടുക്കുക. ഇത് കൂട്ടുകറിയിലേക്കു ചേർത്ത് നന്നായി യോജിപ്പിച്ചു ഒന്ന് തിളച്ചു വരുമ്പോൾ ശർക്കര പൊടിച്ചത് ചേർത്ത് തീ ഓഫ് ചെയ്യുക. കടുകും വറ്റൽ മുളകും കറി വേപ്പിലയും താളിച്ചു ഇതിലേക്ക് ചിരവിയ തേങ്ങ ചേർത്ത് ഇളം ബ്രൗൺ കളർ ആവും വരെ വറുക്കുക. തീ ഓഫ് ചെയ്തു കുരുമുളക് പൊടിയും ചേർത്ത് കറിയിലേക്കു ഒഴിച്ച് ഇളക്കിയെടുക്കുക.
ഓലൻ
ചേരുവകൾ
കുമ്പളങ്ങ ചെറിയ കഷ്ണം ആയി മുറിച്ചത് : 2 കപ്പ്
വൻപയർ കുതിർത്തു വേവിച്ചെടുത്തത് : അരക്കപ്പ്
തേങ്ങയുടെ ഒന്നാം പാൽ : 1 കപ്പ്
തേങ്ങയുടെ രണ്ടാം പാൽ : 2 കപ്പ്
പച്ചമുളക് : 2
കറിവേപ്പില : 1 തണ്ട്
വെളിച്ചെണ്ണ: 1 ടേബിൾ സ്പൂൺ
ഉപ്പ് : ആവശ്യത്തിന്
തയ്യാറാക്കുന്ന വിധം
തേങ്ങയുടെ രണ്ടാം പാലിൽ കുമ്പളങ്ങയും പച്ചമുളകും ചേർത്തു വേവിക്കുക. ഇതിലേക്ക് വേവിച്ചു വെച്ച വൻപയർ ചേർത്ത് ഇളക്കി പാകത്തിന് ഉപ്പ് ചേർക്കുക. തീ ഒന്നു കൂട്ടി വെച്ച വെള്ളം ഉണ്ടെങ്കിൽ പറ്റിച്ചെടുക്കുക. ഇതിലേക്ക് തേങ്ങയുടെ ഒന്നാം പാൽ ചേർത്ത് തിള വരുമ്പോൾ ഓഫ് ആക്കുക വെളിച്ചെണ്ണയും കറിവേപ്പിലയും ചേർക്കുക.
പാവയ്ക്ക തീയൽ
ചേരുവകൾ
പാവയ്ക്ക : 1 വലുത്
വാളൻ പുളി : ചെറിയ നെല്ലിക്ക വലുപ്പത്തിൽ
നാളികേരം ചിരവിയത് : അര കപ്പ്
ഉണക്ക മുളക് : 5 എണ്ണം
കൊത്തമല്ലി : 1 ടേബിൾ സ്പൂൺ
ജീരകം : കാൽ ടീ സ്പൂൺ
കുരുമുളക് : കാൽ ടീ സ്പൂൺ
കായം: ഒരു ചെറിയ കഷ്ണം
ഉലുവ: കാൽ ടീ സ്പൂൺ
മഞ്ഞൾ പൊടി: കാൽ ടീ സ്പൂൺ
വെളിച്ചെണ്ണ: 4 ടേബിൾ സ്പൂൺ
ശർക്കര പൊടിച്ചത് : 2 ടീ സ്പൂൺ
കറിവേപ്പില: ആവശ്യത്തിന്
ഉപ്പ് : ആവശ്യത്തിന്
കടുക് വറവിടാൻ
വെളിച്ചെണ്ണ: 2 ടീ സ്പൂൺ
കടുക് : അര ടീ സ്പൂൺ
ഉണക്ക മുളക്: 2 എണ്ണം
തയ്യാറാക്കുന്ന വിധം
പാവയ്ക്ക അരിഞ്ഞെടുത്തു കുറച്ച് ഉപ്പ് പുരട്ടി വെക്കുക. പുളി കുറച്ചു വെള്ളത്തിൽ കുതിരാൻ വെക്കുക. ഒരു പാനിലേക്കു വെളിച്ചെണ്ണ ഒഴിച്ച് ഉണക്ക മുളക്, കൊത്തമല്ലി, ജീരകം, കുരുമുളക്, കായം, ഉലുവ എന്നിവ ചേർത്ത് ഒരു മൂന്ന് മിനിറ്റ് വറുക്കുക. ഇതിലേക്ക് ചിരകി വെച്ച നാളികേരം ചേർത്ത് ചെറിയ തീയിൽ ബ്രൗൺ നിറം ആവും വരെ വറുക്കുക. തണുത്തതിനു ശേഷം നന്നായി അരച്ചെടുക്കുക. മറ്റൊരു പാനിലേക്കു കുറച്ചു വെളിച്ചെണ്ണ ഒഴിച്ച് അരിഞ്ഞു വെച്ചിരിക്കുന്ന പാവയ്ക്ക ചേർത്ത് 5- 6 മിനിറ്റ് നന്നായി വഴറ്റുക. പുളി നന്നായി പിഴിഞ്ഞെടുത്ത വഴറ്റി വെച്ചിരിക്കുന്ന പാവക്കയിൽ ചേർത്ത് തിളപ്പിക്കുക.
പാവയ്ക്ക വെന്തു വരുമ്പോൾ അരച്ച് വെച്ചിരിക്കുന്ന നാളികേരവും മഞ്ഞൾ പൊടിയും ഉപ്പും കറിവേപ്പിലയും ചേർത്ത് ചെറിയ തീയിൽ 5 മിനിറ്റ് തിളപ്പിക്കുക. ശർക്കര പൊടിച്ചതും കൂടെ ചേർത്തിളക്കി തീ ഓഫ് ആക്കുക. ശേഷം കടുകും മുളകും ചേർത്ത് വറുത്തിടുക.
പാൽപ്പായസം
ചേരുവകൾ
പാൽ : 1.5 ലിറ്റർ
വെള്ളം : 1 കപ്പ്
ഉണക്കലരി : 1/2 കപ്പ്
പഞ്ചസാര : 1 കപ്പ്
ബട്ടർ : 1 ടേബിൾ സ്പൂൺ
ഉപ്പ് : ഒരു നുള്ള്
ഏലയ്ക്ക പൊടി : 1/4 ടി സ്പൂൺ ( ഏലയ്ക്കയുടെ ടേസ്റ്റ് പാൽ പായസത്തിന് ഇഷ്ടമുള്ളവർ ചേർത്താൽ മതി. പാൽ പായസത്തിന് ഏലയ്ക്ക പൊടി, അണ്ടിപ്പരിപ്പ്, മുന്തിരി നെയ്യിൽ വറുത്തത് ഒന്നും ചേർക്കാത്തതാണ് ടേസ്റ്റ്)
തയ്യാറാക്കുന്ന വിധം
ഒരു അഞ്ചു ലിറ്റർ പ്രഷർ കുക്കറിൽ പാലും വെള്ളവും ഒഴിച്ചു തിളപ്പിക്കുക. തിളച്ചു കഴിയുമ്പോൾ തീ നന്നായി കുറച്ചു കഴുകി വച്ചിരിക്കുന്ന അരിയും പഞ്ചസാരയും ചേർത്ത് നന്നായി ഇളക്കി അടച്ചു വെച്ച് ചെറിയ തീയിൽ 40 മിനിറ്റ് വേവിക്കുക. തീ ഓഫ് ചെയ്തു കുക്കറിലെ പ്രഷർ മുഴവൻ പോയാൽ തുറന്നു ഉപ്പ് കൂടി ചേർത്ത് നന്നായി ഇളക്കുക. ബട്ടർ ചേർക്കുക.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |