തിരുവനന്തപുരം: നഗരത്തിൽ ഇന്നലെ വൈകിട്ടുണ്ടായ മഴയിലും കാറ്റിലും നിരവധി സ്ഥലങ്ങളിൽ മരം വീണു. താഴ്ന്ന പ്രദേശങ്ങൾ വെള്ളത്തിനടിയിലായി. പാങ്ങോട് മിലിട്ടറി ആശുപത്രിക്ക് സമീപത്തും ഗ്രൗണ്ടിന്റെ ഭാഗത്തും രണ്ട് വന്മരങ്ങൾ കടപുഴകി വൈദ്യുതി ലൈനുകൾ പൊട്ടി. പൂജപ്പുര,​ പട്ടം,​ പ്ലാമൂട്,​ നാലാഞ്ചിറ,​ മണ്ണാമൂല,​ വെള്ളയമ്പലം- അക്കാമ്മ ചെറിയാൻ റോഡ്,​ മുട്ടട - മരപ്പാലം റോഡ് തുടങ്ങിയ സ്ഥലങ്ങളിൽ മരങ്ങൾ ഒടിഞ്ഞുവീണു. ചെങ്കൽച്ചൂള ഫയർ സ്റ്റേഷനിൽ നിന്ന് ഉദ്യോഗസ്ഥരെത്തിയാണ് മരങ്ങൾ മുറിച്ചുനീക്കിയത്.

ശ്രീചിത്ര ആശുപത്രിയുടെ പാർക്കിംഗ് ഏരിയയിൽ നിറുത്തിയിട്ടിരുന്ന കാറിന് മുകളിൽ മണ്ണ് ഇടിഞ്ഞുവീണു. തമ്പാനൂർ, എസ്.എസ് കോവിൽ റോഡ്,​ ഊറ്റുകുഴി ജംഗ്ഷൻ, കിഴക്കേകോട്ട, കിള്ളിപ്പാലം,​ കമലേശ്വരം,​ ചാക്ക തുടങ്ങിയ സ്ഥലങ്ങളിൽ വെള്ളക്കെട്ടായതോടെ ഗതാഗതം തടസപ്പെട്ടു.

മെഡിക്കൽ കോളേജ് - ഉള്ളൂർ റോഡിലും വെള്ളം ഉയർന്നു. ഓടകളെല്ലാം നിറഞ്ഞൊഴുകി. ഓടകൾ കൃത്യമായി വൃത്തിയാക്കാത്തതാണ് വെള്ളക്കെട്ടിന് കാരണമെന്ന് വ്യാപാരികൾ ആരോപിച്ചു. പാറവിള,​ പനത്തുറ,​ കഴക്കൂട്ടം എന്നിവിടങ്ങളിലെ ചില വീടുകളിൽ വെള്ളം കയറി. ഇവിടുത്തെ കിണറുകളിൽ ചെളിവെള്ളം നിറഞ്ഞത് കുടുംബങ്ങളെ ദുരിത്തിലാക്കി. ടോയ്ലറ്റുകളിലും മണ്ണും ചെളിയും നിറഞ്ഞിട്ടുണ്ട്. രാത്രി വൈകിയും പല സ്ഥലങ്ങളിലും മഴ തുടർന്നു.