ന്യൂഡൽഹി : കൊവിഡ്​ ബാധിച്ച്​ മാതാപിതാക്കളെ നഷ്​ടപ്പെട്ട കുട്ടികൾക്കായി പ്രത്യേക പാക്കേജ്​ അവതരിപ്പിച്ച്​ കേന്ദ്രസർക്കാർ. 10 ലക്ഷം രൂപ പി.എം കെയേഴ്​സ്​ ഫണ്ടിൽ നിന്നും മാറ്റിവച്ച് ​18 വയസ്​​ പൂർത്തിയാകുമ്പോൾ ഈ തുകയിൽ നിന്ന്​ സ്​റ്റൈപ്പൻഡ്​ നൽകും. 23ാം വയസിൽ തുക പൂർണമായും കുട്ടികൾക്ക്​ കൈമാറും. സുപ്രീംകോടതി നിർദേശത്തിന് പിന്നാലെയാണ് കേന്ദ്ര ഇടപെടൽ.വിവിധ സംസ്ഥാന സർക്കാരുകൾ കൊവിഡ്​ ബാധിച്ച്​ മാതാപിതാക്കളെ നഷ്​ടപ്പെട്ട കുട്ടികൾക്കായി പാക്കേജുകൾ പ്രഖ്യാപിച്ചിരുന്നു.

പാക്കേജ് ഇപ്രകാരം

• പത്ത് വയസിന് താഴെയുള്ള കുട്ടികൾക്ക് വീടിന് അടുത്തുള്ള കേന്ദ്രീയവിദ്യാലയങ്ങളിലോ സ്വകാര്യ സ്കൂളുകളിലോ സൗജന്യ വിദ്യാഭ്യാസം
• പതിനൊന്ന് വയസിനും 18 വയസിനും ഇടയിലുള്ള വിദ്യാർത്ഥികൾക്ക് കേന്ദ്രീയ വിദ്യാലയങ്ങൾ,​ സൈനിക്,​ നവോദയ സ്കൂളുകളിൽ പ്രവേശനം നൽകും
• ഫീസ്,​ യൂണിഫോം,​ പുസ്തകങ്ങൾ,​ നോട്ടുബുക്കുകൾ എന്നിവ സൗജന്യമായി നൽകും
• ആയുഷ്​മാൻ ഭാരത്​ പദ്ധതിയിൽ ഉൾപ്പെടുത്തി അഞ്ച്​ ലക്ഷം രൂപയുടെ ​ആരോഗ്യ ഇൻഷ്വറൻസ്.
• ഉന്നതവിദ്യാഭ്യാസത്തിനായി വായ്​പകൾ നൽകും. വായ്​പ പലിശ കേന്ദ്ര സർക്കാർ വഹിക്കും.

'' കുട്ടികൾ രാജ്യത്തിന്റെ ഭാവിയാണ്. അവരെ സംരക്ഷിക്കാനും സഹായിക്കാനും ആവശ്യമായതെല്ലാം ചെയ്യും. ''

- നരേന്ദ്ര മോദി