ന്യൂഡൽഹി: കൊവിഡ് രണ്ടാം തരംഗത്തിൽ സാമ്പത്തിക പ്രതിസന്ധി നേരിടുന്ന അംഗങ്ങൾക്ക് ആശ്വാസമേകി നിക്ഷേപ തുകയിൽ നിന്ന് മുൻകൂറായി പണം പിൻവലിക്കാൻ എംപ്ളോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇ.പി.എഫ്.ഒ) പ്രത്യേക അനുമതി നൽകി.
മൂന്നു മാസത്തെ അടിസ്ഥാന ശമ്പളവും ക്ഷാമബത്തയും ചേർന്ന തുക അല്ലെങ്കിൽ ഇ.പി.എഫ് നിക്ഷേപത്തിന്റെ 75 ശതമാനം രണ്ടിൽ ഏതാണ് കുറവ് അത്രയും പണം പിൻവലിക്കാം. ഇതിലും കുറഞ്ഞ തുക പിൻവലിക്കാനുള്ള അപേക്ഷയും സ്വീകരിക്കും.
കൊവിഡ് പാക്കേജിന്റെ ഭാഗമായുള്ള പ്രധാനമന്ത്റി ഗരീബ് കല്യാൺ യോജനയ്ക്ക് (പി.എം.ജി.കെ.വൈ) കീഴിൽ കഴിഞ്ഞ വർഷവും തിരിച്ചടവില്ലാത്ത പിൻവലിക്കലിന് ഇ.പി.എഫ്.ഒ അനുമതി നൽകിയിരുന്നു. അന്ന് തുക പിൻവലിച്ചവർക്കും അവസരം വിനിയോഗിക്കാം. 2020ൽ കൊവിഡ് വ്യാപനമുണ്ടായ സമയത്ത് പാക്കേജിന് കീഴിൽ 76.31 ലക്ഷം അപേക്ഷകളിൽ 18,698.15 കോടി രൂപ വിതരണം ചെയ്തു.
കെ.വൈ.സി ചട്ടങ്ങൾ പൂർത്തിയാക്കിയ അംഗങ്ങൾക്ക് ഓട്ടോമോഡ് സെറ്റിൽമെന്റ് വഴി മൂന്നു ദിവസത്തിനകം പണം ലഭിക്കും. അല്ലാത്തവർക്ക് പരമാവധി 20 ദിവസമാണ് തുക ലഭിക്കാനുള്ള സമയം.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |