ന്യൂഡൽഹി: ഇന്ത്യയിൽ കൊവിഡ് കേസുകൾ കുറയുന്നു. കഴിഞ്ഞ 24 മണിക്കൂറിനിടെ രാജ്യത്ത് 1,14,460 പുതിയ കേസുകളാണ് സ്ഥിരീകരിച്ചത്. രണ്ടു മാസത്തിനിടെ റിപ്പോർട്ട് ചെയ്ത ഏറ്റവും കുറഞ്ഞ പ്രതിദിന കണക്കാണിത്. ഇതുവരെ 2,88,09,339 പേര്‍ക്കാണ് രാജ്യത്ത് കൊവിഡ് സ്ഥിരീകരിച്ചത്.

കേന്ദ്ര ആരോ​ഗ്യ മന്ത്രാലയത്തിന്റെ കണക്കുകൾ പ്രകാരം ശനിയാഴ്ച 2677 മരണങ്ങളാണ് റിപ്പോർട്ട് ചെയ്തത്. ഇതോടെ കൊവിഡ് ബാധിച്ച് രാജ്യത്ത് മരിച്ചവരുടെ എണ്ണം 3,46,756 ആയി. സജീവമായ കൊവിഡ് കേസുകളുടെ എണ്ണം തുടർച്ചയായ ആറാം ​ദിവസവും 20 ലക്ഷത്തിൽ താഴെയാണ്.

സജീവമായ കേസുകളുടെ എണ്ണം 14,77,799 ആയി കുറഞ്ഞു. കഴിഞ്ഞ ദിവസം 1,89,232 പേർക്കൂടി സുഖം പ്രാപിച്ചതോടെ ഇതുവരെ രോ​ഗമുക്തി നേടിയവരുടെ എണ്ണം 2,69,84,781 പേരായി ഉയർന്നു. പ്രതിദിനം രോ​ഗമുക്തരാകുന്നവരുടെ എണ്ണം തുടർച്ചയായ 24 ദിവസമായി പുതിയ കൊവിഡ് കേസുകളേക്കാൾ കൂടുതലാണ്.

രാജ്യത്ത് ശനിയാഴ്ച 20,36,311 കൊവിഡ് ടെസ്റ്റുകളാണ് നടത്തിയത്. ഇതോടെ രാജ്യത്ത് ഇതുവരെ നടത്തിയ കൊവിഡ് ടെസ്റ്റുകളുടെ എണ്ണം 36,47,46,522 ആയി.