ജലസംരക്ഷണത്തിനായുളള കേന്ദ്രസർക്കാരിന്റെ ക്യാച്ച് ദി റെയിൻ പദ്ധതിയിൽ അണിചേരാൻ ആഹ്വാനം ചെയ്ത് നടൻ മോഹൻലാൽ. ഫേസ്ബുക്കിലൂടെയാണ് താരം ഈ ആവശ്യം ഉന്നയിച്ച് രം​ഗത്തെത്തിയത്. ജലസംരക്ഷണത്തിന്റെ ആവശ്യകതയും ക്യാച്ച് ദി റെയിൻ പദ്ധതിയെക്കുറിച്ചും വിവരിക്കുന്ന വീഡിയോയാണ് അദ്ദേഹം ഫേസ്ബുക്കിൽ പോസ്റ്റ് ചെയ്തിരിക്കുന്നത്.
‌
ആ​ഗോളതാപനത്തിന്റെ വെല്ലുവിളികൾക്കിടയിൽ കൃഷിക്കും കുടിവെളളത്തിനുമെല്ലാം പ്രാണജല സംരക്ഷണത്തിനായി കേന്ദ്രസർക്കാർ ആവിഷ്കരിച്ച പ്രചാരണ പരിപാടിയാണ് ക്യാച്ച് ദി റെയിൻ. പാഴായിപ്പോകുന്ന മഴവെളളം സംഭരിക്കാൻ സ്ഥാപനങ്ങളെ മുതൽ വ്യക്തികളെ വരെ പ്രബോധിപ്പിക്കുന്ന ദേശീയ ജല കമ്മിഷന്റെ ദീർഘ വീക്ഷണമുളള ഈ പരിപാടിക്ക് ഇതിനോടകം ശ്രദ്ധയും സ്വീകാര്യതയും ലഭിച്ചിട്ടുണ്ട്. നമുക്ക് എല്ലാവർക്കും ഈ പദ്ധതിയിൽ അണിചേരാമെന്നും മോഹൻലാൽ വീഡിയോയിൽ പറയുന്നു.