തിരുവനന്തപുരം: കൊവിഡ് സാഹചര്യം സൃഷ്ടിക്കുന്ന മാനസിക പിരിമുറുക്കം ഒഴിവാക്കാൻ കുട്ടികൾക്ക് വീടുകളിൽ പുസ്തകം എത്തിക്കുന്നത് പ്രധാനമാണെന്ന് മുഖ്യമന്ത്രി പിണറായി വിജയൻ പറഞ്ഞു. സർക്കാരും കേരള സ്റ്റേറ്റ് ലൈബ്രറി കൗൺസിലും പി.എൻ.പണിക്കർ ഫൗണ്ടേഷനും സംയുക്തമായി നടത്തിയ വായന പക്ഷാചരണത്തിൻെറ ഉദ്ഘാടനം ഓൺലൈനിൽ നിർവഹിക്കുകയായിരുന്നു അദ്ദേഹം.
ഒരു ഗ്രാമത്തെയാകെ വായനയിലേക്ക് നയിച്ച കൊട്ടാരക്കര താലൂക്കിലെ ബാപ്പുജി ഗ്രന്ഥശാല സ്ഥിതിചെയ്യുന്ന പെരുങ്കുളം പുസ്തക ഗ്രാമമായി മുഖ്യമന്ത്രി പ്രഖ്യാപിച്ചു.
മന്ത്രി ഡോ. ആർ. ബിന്ദു അദ്ധ്യക്ഷതവഹിച്ചു. പട്ടം ഗവ. മോഡൽ ഗേൾസ് സ്കൂളിൽ നടന്ന ചടങ്ങിൽ വിദ്യാർത്ഥികൾക്കുള്ള സ്മാർട്ട്ഫോണുകളുടെ വിതരണോദ്ഘാടനവും മന്ത്രി നടത്തി.
മന്ത്രി വി. ശിവൻകുട്ടിയുടെ സന്ദേശം ചടങ്ങിൽ വായിച്ചു. ലൈബ്രറി കൗൺസിൽ മുഖപത്രം ഗ്രന്ഥാലോകത്തിൻെറ ജൂൺ ലക്കം പ്രകാശനം വി.കെ. പ്രശാന്ത് എം.എൽ.എക്ക് നൽകി മേയർ ആര്യ രാജേന്ദ്രൻ നിർവഹിച്ചു. പി.എൻ. പണിക്കർ ഫൗണ്ടേഷൻ ചെയർമാൻ പന്ന്യൻ രവീന്ദ്രൻ, വൈസ് ചെയർമാൻ എൻ. ബാലഗോപാൽ, ലൈബ്രറി കൗൺസിൽ പ്രസിഡൻറ് കെ.വി. കുഞ്ഞികൃഷ്ണൻ തുടങ്ങിയവർ പങ്കെടുത്തു.
കൊവിഡ് വ്യാപനം തടയുന്നതിൽ പൊലീസിന്റെ
പങ്ക് സ്തുത്യർഹമെന്ന് മുഖ്യമന്ത്രി
തിരുവനന്തപുരം: കൊവിഡ് രണ്ടാം തരംഗത്തിൽ രോഗവ്യാപനം തടയുന്നതിന് പൊലീസ് വഹിച്ച പങ്ക് സ്തുത്യർഹമാണെന്ന് മുഖ്യമന്ത്രി പിണറായി വിജയൻ പറഞ്ഞു. ഗുരുവായൂർ ടെമ്പിൾ പൊലീസ് സ്റ്റേഷൻ, കൺട്രോൾ റൂം, അസി. കമ്മിഷണർ ഓഫീസ് എന്നിവ വീഡിയോ കോൺഫറൻസിലൂടെ ഉദ്ഘാടനം ചെയ്യുകയായിരുന്നു അദ്ദേഹം.
ജനസേവനത്തിൽ പൊലീസിന്റെ പുതിയ മുഖമാണ് കേരളം കണ്ടത്. എല്ലാ ബുധനാഴ്ചകളിലും വീഡിയോ കോൺഫറൻസ് വഴി പരാതി സ്വീകരിക്കാൻ ഗുരുവായൂർ സ്റ്റേഷൻ ഹൗസ് ഓഫീസർക്ക് മുഖ്യമന്ത്രി നിർദ്ദേശം നൽകി.
മുൻ എം.എൽ.എ കെ.വി അബ്ദുൾ ഖാദറിന്റെ ആസ്തി വികസന ഫണ്ടിൽ നിന്ന് 99 ലക്ഷം രൂപയടക്കം 3.24 കോടി രൂപ ചെലവിലാണ് 378.78 ചതുരശ്രമീറ്റർ വിസ്തീർണമുള്ള കെട്ടിടത്തിന്റെ നിർമ്മാണം പൂർത്തിയാക്കിയത്. തൃശൂർ ജില്ലാ ലേബർ കോൺട്രാക്ടിംഗ് സഹകരണ സംഘമാണ് നിർമ്മാണം പൂർത്തിയാക്കിയത്. മന്ത്രി കെ.രാധാകൃഷ്ണൻ, ജനപ്രതിനിധികൾ, ദേവസ്വം ബോർഡ് ഭാരവാഹികൾ, പൊലീസ് മേധാവി ലോക്നാഥ് ബെഹ്റ തുടങ്ങിയവർ പങ്കെടുത്തു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |