ജൂൺ 21 യോഗ ദിനമായി ലോകമെമ്പാടും ആചരിക്കുന്നു. ആരോഗ്യം ദിവ്യമായ സമ്പത്താണ്. ഈ ഭൂമിയിൽ നമുക്ക് എന്തൊക്കെയുണ്ടെങ്കിലും ആരോഗ്യമില്ലെങ്കിൽ അവയെല്ലാം നിഷ്ഫലമാണ്.
ആരോഗ്യം എന്ന വാക്കുകൊണ്ട് ഉദ്ദേശിക്കുന്നത് ശാരീരികമായ ആരോഗ്യം മാത്രമല്ല . മാനസികമായും ആത്മീയമായും ഉന്നത നിലവാരം പുലർത്തുന്ന ഒരാളെ മാത്രമേ പൂർണ ആരോഗ്യവാനാണെന്നു പറയാൻ പാടുള്ളൂ.
മനുഷ്യരാശിയെ കഷ്ടപ്പെടുത്തുന്ന നിരവധി രോഗങ്ങളെ നിവാരണം ചെയ്യുന്നതിനുള്ള വിശിഷ്ടമായ ഒരു ഉപാധിയെന്ന നിലയിൽ യോഗാസനത്തിന്റെ പ്രാധാന്യം ലോകം മുഴുവൻ അംഗീകരിച്ചിട്ടുണ്ട്. കേന്ദ്ര ഗവൺമെന്റിൽ നിന്നും ഏർപ്പെടുത്തിയിട്ടുള്ള ഒരു വിദഗ്ദ്ധസമിതി യോഗാസനത്തെ രോഗനിവാരണത്തിനുള്ള ഒരു ഉത്തമ മാർഗമായി ശുപാർശ ചെയ്തിട്ടുണ്ട്. ശാരീരിക ബലത്തിന് പല വ്യായാമ മുറകളും നിലവിലുണ്ടെങ്കിലും മാനസിക വികസനത്തിന് യോഗ പോലെ ഫലപ്രദമായ പരിശീലനം വേറെ ഇല്ല.
ശാരീരിക പ്രവർത്തനങ്ങളെ തകരാറിലാക്കുന്ന പല രോഗങ്ങളുടെയും മൂലകാരണം മാനസിക അസ്വസ്ഥതകളാണ്. മാനസിക സംഘർഷങ്ങളുടെ ഫലമായുണ്ടാകുന്ന എല്ലാ ആരോഗ്യ പ്രശ്നങ്ങൾക്കും ഫലപ്രദമാണ് യോഗാഭ്യാസമെന്ന് ഗവേഷണങ്ങളിലൂടെ തെളിഞ്ഞിട്ടുണ്ട്.
യോഗാസനങ്ങൾ ചെയ്യുമ്പോൾ അവശ്യം അറിഞ്ഞിരിക്കേണ്ട പ്രധാനകാര്യം എങ്ങനെ ശ്വാസോച്ഛ്വാസം ചെയ്യണം എന്നുള്ളതാണ്. സാധാരണയായി ഒന്നര സെക്കൻഡിൽ ശ്വാസം ഉള്ളിലേക്കു വലിക്കുകയും രണ്ടര സെക്കൻഡിൽ ശ്വാസം വിടുകയും ചെയ്യുകയാണ് പതിവ്. ശ്വാസോച്ഛ്വാസം അല്പസമയം ചെയ്യാതിരിക്കുന്നതോ ദീർഘമായി ശ്വാസോച്ഛ്വാസം ചെയ്യുന്നതോ ഓരോ യോഗാനുഷ്ഠാനത്തിലും അറിഞ്ഞിരിക്കേണ്ടതായിട്ടുണ്ട്. ഈ രീതി അവലംബിച്ച് യോഗവ്യായാമം ചെയ്താൽ അനവധി രോഗങ്ങളെ നമുക്ക് അകറ്റി നിറുത്താൻ കഴിയും.
കൊല്ലം യോഗാസനാചാര്യ കെ.പി. ഗംഗാധരൻ സാറാണ് എന്റെ ഗുരു. ഏകദേശം 61 വർഷങ്ങൾക്കു മുൻപ് 84 യോഗാസനങ്ങൾ അദ്ദേഹത്തിൽ നിന്നും പഠിക്കാൻ എനിക്ക് അവസരം കിട്ടി. പക്ഷേ അത്രയും യോഗാസനങ്ങൾ സകലരും അറിഞ്ഞിരിക്കണമെന്നില്ല.
മലബന്ധം, ഗ്യാസ്ട്രബിൾ, കുടവയർ, വയറ്റിളക്കം, ഹൃദയസംബന്ധമായ രോഗങ്ങൾ, രക്തസമ്മർദ്ദം, നടുവേദന, ഉറക്കമില്ലായ്മ, ആസ്ത്മ,വാതം, കൊളസ്ട്രോൾ, പ്രമേഹം, സന്ധിവീക്കം, ലൈംഗിക തകരാറുകൾ എന്നിവയെല്ലാം യോഗാഭ്യാസത്തിലൂടെ പരിഹാരം കാണാനാകുമെന്ന് തെളിഞ്ഞിട്ടുണ്ട്.
പ്രാണായാമം, സ്ട്രെച്ചിംഗ്, സൂര്യനമസ്കാരം തുടങ്ങി നമ്മുടെ ശരീരത്തിനാവശ്യവും അനുയോജ്യവുമായ യോഗാസനങ്ങൾ അടങ്ങിയ ഒന്നേകാൽ മണിക്കൂർ കൊണ്ട് തീരുന്ന ഒരു പാക്കേജ് ആണ് ഇപ്പോൾ പേട്ട യംഗ്സ്റ്റേഴ്സ് ക്ളബിലെ കെ. ബാലകൃഷ്ണൻ ഹാളിൽ പരിശീലിപ്പിക്കുന്നത്. പ്രായഭേദമെന്യെ ആർക്കും പങ്കെടുക്കാം.
പരേതനായ മുൻ മന്ത്രി കെ. പങ്കജാക്ഷൻ പ്രസിഡന്റായിരുന്ന സമയത്താണ് അദ്ദേഹത്തിന്റെ പ്രത്യേക താത്പര്യപ്രകാരം സൗജന്യമായി യോഗപരിശീലനം ആരംഭിക്കുന്നത്. പരിശീലനം 16 കൊല്ലം പിന്നിട്ടിരിക്കുന്നു. ഇവിടത്തെ ഈ യോഗ പരിശീലനം കൊണ്ട് അനവധി പേർക്ക് പ്രായഭേദമന്യേആരോഗ്യ സംരക്ഷണം സാദ്ധ്യമായിട്ടുണ്ട്. അതുകൊണ്ടുതന്നെയാണ് ഈ യോഗ പരിശീലനം സൗജന്യമായി തുടർന്നുവരുന്നത്.
(ലേഖകൻ പേട്ട യംഗ്സ്റ്റേഴ്സ് ക്ലബിന്റെ സെക്രട്ടറിയാണ്.
ഫോൺ: 9846815075 )
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |