വാഷിംഗ്ടൺ: ഇറാഖിലും അഫ്​ഗാനിസ്ഥാനിലും അമേരിക്ക നയിച്ച യുദ്ധങ്ങൾക്ക് പിന്നിലെ ബുദ്ധികേന്ദ്രം എന്നറിയപ്പെട്ടിരുന്ന മുൻ അമേരിക്കൻ പ്രതിരോധ സെക്രട്ടറി ഡൊണാൾഡ് റംസ്ഫെൽഡ് (88 ) അന്തരിച്ചു.1932ൽ ഷിക്കാഗോയിൽ ജനിച്ച അദ്ദേഹം 1960കളിലാണ്​ യു.എസ്​ രാഷ്​ട്രീയത്തിൽ സജീവമാകുന്നത്​. 1975-77 കാലത്ത്​ ജെറാർഡ്​ ഫോഡിനു കീഴിലും 2001- 2006ൽ ജോർജ്​ ഡബ്ല്യു. ബുഷിനു കീഴിലും രാജ്യത്തെ പ്രതിരോധ സെക്രട്ടറിയായിരുന്നു. അമേരിക്കയുടെ ഏറ്റവും പ്രായം കുറഞ്ഞ പ്രതിരോധ സെക്രട്ടറിയെന്ന അപൂർവ ബഹുമതിയും റംസ്ഫെൽഡിന്റെ പേരിലാണ്.

2001ൽ അഫ്​ഗാനിസ്ഥാനിലും 2003ൽ സദ്ദാം ഹുസൈൻ ഭരിച്ച ഇറാഖിലും അധിനിവേശം നടത്താനുള്ള നിർണായക തീരുമാനം യു.എസ് ഭരണകൂടം സ്വീകരിച്ചതിന് പിന്നിൽ ഇദ്ദേഹമാണ്. കുറ്റവാളികളുടെ വിചാരണയെന്ന പേരിൽ പലയിടങ്ങളിലും തടങ്കൽ പാളയങ്ങൾ തീർത്ത്​ തടവുകാരെ ക്രൂരമായി പീഡിപ്പിക്കുന്നതിനും ഇദ്ദേഹം പിന്തുണ നല്കിയത് ലോകത്തിന് മുന്നിൽ വില്ലനാക്കി മാറ്റി.

നിയമവിരുദ്ധമായ ഒ​ട്ടേറെ യുദ്ധങ്ങൾക്കും സിവിലിയന്മാരുടെ കൂട്ടക്കുരുതികൾക്കും​ നേതൃത്വം നല്കുകയും പീഡനവും കൊള്ളയും വ്യാപകമായ അഴിമതിയും നടത്തുകയും ചെയ്​ത യുദ്ധക്കുറ്റവാളിയെന്നാണ് ​ ഡൊണൾഡ്​ റംസ്​ഫെൽഡിനെ കവാകിബി ഫൗണ്ടേഷൻ പ്രസിഡൻറ്​ ഇയാദ്​ അൽബഗ്​ദാദി വിശേഷിപ്പിച്ചത്.

2003ൽ ഇറാഖിൽ ലോകത്തിനാകമാനം വിനാശം വിതയ്ക്കുന്ന ആയുധ ശേഖരമുണ്ടെന്നാരോപിച്ചാണ് റംസ്ഫെൽഡിന്റെ നേതൃത്വത്തിൽ യു.എസ്​ എത്തിയത്. ലക്ഷണക്കിന് പേരാണ് അന്നത്തെ യുദ്ധത്തിൽ ഇറാക്കിൽ മരിച്ച് വീണത്. എന്നാൽ രാജ്യത്ത് അത്തരം ആയുധങ്ങൾ കണ്ടെത്താൻ കഴിഞ്ഞില്ലെന്ന് യു.എസിന് പിന്നീട് സമ്മതിക്കേണ്ടി വന്നു. നിരപരാധികളെ വിചാരണകൂടാതെ മഹാക്രൂരതകൾക്കിടയാക്കിയ ഗ്വാണ്ടാനാമോ, അബൂഗുറൈബ്​ തടവറകളിൽ നടക്കുന്ന ഞെട്ടിക്കുന്ന മനുഷ്യാവകാഷ ലംഘനം പുറം ലോകമറിഞ്ഞതോടെ റംസ്​ഫെൽഡ്​ 2006ൽ രാജിവെയ്ക്കുകയായിരുന്നു.