തിരുവനന്തപുരം: അശ്രദ്ധകൊണ്ടും വേഗത്തിൽ ഭക്ഷണം കഴിക്കുന്നതിനാലുമാണ് പ്രധാനമായും ആഹാരപദാർത്ഥങ്ങൾ തൊണ്ടയിൽ കുടുങ്ങാറ്. മിക്സ്ചർ തൊണ്ടയിൽ കുടുങ്ങി ആറു വയസുകാരി മരിച്ചതും ഇത്തരത്തിലാണ്. കടല, കശുഅണ്ടി, പഴങ്ങളുടെ കുരു തുടങ്ങിയവയാണ് സാധാരണഗതിയിൽ തൊണ്ടയിൽ തടയുന്നത്.

കൊവിഡ് സാഹചര്യത്തിൽ കുട്ടികളെല്ലാം വീടുകളിലായതിനാൽ ചെറുപലഹാരങ്ങളുൾപ്പെടെ ഏത് നേരത്തും കഴിക്കുന്ന പതിവ് കാണും. അതുകൊണ്ടുതന്നെ മാതാപിതാക്കൾ കൃത്യമായി ശ്രദ്ധിച്ചില്ലെങ്കിൽ അപകടം സംഭവിക്കാം. ഭക്ഷണം തൊണ്ടയിൽ കുടുങ്ങുമ്പോൾ, തൊണ്ട പൂർണമായും അടഞ്ഞുപോകുന്നതാണ് അപകടസാദ്ധ്യത കൂട്ടുന്നത്. തൊണ്ട അടഞ്ഞുപോകുന്നത് കുറച്ചു സമയത്തേക്ക് ഓക്സിജൻ പ്രവാഹത്തിന് തടസമുണ്ടാക്കും. ഈ സമയം ഓക്സിജൻ കുറഞ്ഞാൽ മസ്തിഷ്‌കത്തിലേക്കും ഹൃദയത്തിലേക്കുമുള്ള രക്തപ്രവാഹം കുറയും. ഇത് അബോധാവസ്ഥയിലേക്കും തുടർന്ന് മരണത്തിനുപോലും കാരണമാകും.

 ശ്രദ്ധിക്കേണ്ട കാര്യങ്ങൾ

• കുട്ടികൾക്ക് ഇരുത്തി ഭക്ഷണം കൊടുക്കുക. കിടത്തി ഭക്ഷണം കൊടുക്കരുത്.
• ഭക്ഷണം കഴിക്കുമ്പോൾ സംസാരിക്കുന്ന ശീലം ഒഴിവാക്കുക.
• ഭക്ഷണം നേരിട്ട് വിഴുങ്ങാതെ, നന്നായി ചവച്ചരച്ച് കഴിക്കാൻ ശീലിപ്പിക്കുക.
• സാവധാനത്തിൽ ഭക്ഷണം കഴിക്കാൻ ശ്രമിക്കുക. പതിയെ ഭക്ഷണം കഴിക്കാൻ കുട്ടികളെ പഠിപ്പിക്കുക.
• ഭക്ഷണത്തിനിടയിൽ കളിചിരി ഒഴിവാക്കുക
• എരിവും പുളിയും കൂടുതലുള്ള ഭക്ഷണങ്ങൾ കഴിക്കുമ്പോൾ പ്രത്യേകം ശ്രദ്ധിക്കണം.

 ലക്ഷണങ്ങൾ

• സംസാരിക്കാൻ കഴിയാതെവരിക
• നിറുത്താതെയുള്ള ചുമ
• ശരീരം നന്നായി വിയർക്കുക
• കൈകാലുകൾ നീലനിറമാകുക
• അബോധാവസ്ഥയിലാകുക

 ചെയ്യേണ്ടത്

• കുട്ടികളെ കൈയിൽ കമഴ്ത്തി കിടത്തുക. പുറത്ത് സാവധാനം തട്ടുക.
• അബോധാവസ്ഥയിലെങ്കിൽ ഉടൻ ആശുപത്രിയിലെത്തിക്കുക
• മുതിർന്നവരാണെങ്കിൽ കുനിച്ചുനിറുത്തിയശേഷം പുറത്ത് ശക്തിയിൽ തട്ടുക. തട്ടുമ്പോൾ ഉണ്ടാകുന്ന മർദ്ദത്തിലൂടെ തൊണ്ടയിൽ കുടുങ്ങിയ വസ്തു പുറത്തേക്ക് വരും.
• തൊണ്ടയിൽ ഭക്ഷണം കുടുങ്ങുന്ന അവസരത്തിൽ വ്യക്തി ബോധാവസ്ഥയിലാണെങ്കിൽ ചുമയ്ക്കാൻ പറയുന്നതും ഗുണം ചെയ്യും.

 വിവരങ്ങൾ നൽകിയത്-

എസ്.എ.ടി ആശുപത്രി ശിശുരോഗ വിഭാഗം അസോസിയേറ്റ് പ്രൊഫസർ ഡോ.ഷീജാ സുഗുണൻ,

കൊല്ലം അസീസിയ മെഡിക്കൽ കോളേജ് ശിശുരോഗ വിഭാഗം പ്രൊഫസർ ഡോ.സന്തോഷ് കുമാർ (എസ്.എ.ടി മുൻ സൂപ്രണ്ട്)