കൊച്ചി: സർക്കാർ വകുപ്പുകൾ അടിക്കടി നടത്തുന്ന മിന്നൽ പരിശോധനയുടെ പേരിൽ കേരളത്തിലെ നിക്ഷേപപദ്ധതി ഉപേക്ഷിച്ച കിറ്റെക്സിൽ വീണ്ടും മിന്നൽ പരിശോധന. കുഴൽക്കിണറുകൾ വഴി അമിതമായും അനധികൃതമായും ഭൂഗർഭജലം ഉപയോഗിക്കുന്നുവെന്ന് ജില്ലാ വികസന സമിതി യോഗത്തിൽ പി.ടി. തോമസ് എം.എൽ.എ ഉന്നയിച്ച പരാതിയുടെ അടിസ്ഥാനത്തിലാണ് പരിശോധനയെന്ന് ഉദ്യോഗസ്ഥർ കിറ്റെക്സ് മാനേജ്‌മെന്റിനെ അറിയിച്ചു. സംസ്ഥാന ജലവി​ഭവ വകുപ്പി​ന്റെ കീഴി​ലുള്ള ഭൂഗർഭജല അതോറി​റ്റിയുടെ കാക്കനാട് ഓഫീസി​ലെ ​നാല് ഉദ്യോഗസ്ഥരാണ് സംഘത്തി​ലുണ്ടായി​രുന്നത്.

ഒന്നര മാസത്തിനിടെ കിറ്റെക്സിൽ നടക്കുന്ന 12- ാമത് പരിശോധനയാണിത്. വ്യവസായശാലകളിൽ മിന്നൽ പരിശോധന നടത്തില്ലെന്ന് രണ്ടാഴ്ചമുമ്പ് വ്യവസായമന്ത്രി പി. രാജീവ് പ്രഖ്യാപിച്ചിരുന്നു. സംസ്ഥാന തലത്തിൽ ഉന്നത ഉദ്യോഗസ്ഥസംഘം വ്യത്യസ്ത വകുപ്പുകളുടെ പരിശോധനകൾ ഏകജാലകത്തിലൂടെ ഏകോപിപ്പിക്കുമെന്നായിരുന്നു മന്ത്രിയുടെ പ്രഖ്യാപനം. ഇത് ലംഘിച്ചാണ് പരിശോധനയെന്ന് കിറ്റെക്സ് ചെയർമാനും മാനേജിംഗ് ഡയറക്ടറുമായ സാബു എം. ജേക്കബ് ആരോപിച്ചു. സർക്കാരും മന്ത്രി​മാരും എന്ത് പറഞ്ഞാലും അതൊന്നും നടപ്പാവി​ല്ലെന്നതി​ന്റെ ഒടുവി​ലത്തെ ഉദാഹരണമാണ് ഈ പരി​ശോധനയെന്നും അദ്ദേഹം പറഞ്ഞു.

പരി​ശോധനകളുടെ പേരി​ൽ ബുദ്ധി​മുട്ടി​ച്ചതി​ന് കി​റ്റെ​ക്സ് കേരളത്തിൽ നടപ്പാക്കാനിരുന്ന 3,500 കോടി രൂപയുടെ പദ്ധതി തെലങ്കാനയിലേക്ക് മാറ്റിയത് ദേശീയ ശ്രദ്ധയാകർഷി​ച്ചി​രുന്നു. കഴി​ഞ്ഞദി​വസം ശ്രീലങ്കൻ സർക്കാരി​ന്റെ പ്രതി​നി​ധിയായി ഡെപ്യൂട്ടി ഹൈക്കമ്മിഷണർ കിഴക്കമ്പലത്ത് എത്തി നി​ക്ഷേപം സംബന്ധി​ച്ച് കി​റ്റെക്സ് മാനേജ്മെന്റുമായി ചർച്ച നടത്തി​യി​രുന്നു. ഇതി​ന് പി​ന്നാലെയാണ് വീണ്ടും പ്രകോപനമുണ്ടായത്.