ശ്രീനഗർ: ബരാമുള്ളയിൽ ഇന്ത്യൻ സുരക്ഷാ ഉദ്യോഗസ്ഥർക്കെതിരെ വീണ്ടും തീവ്രവാദി ആക്രമണം. ഇന്ത്യൻ സേനാവ്യൂഹത്തിനെതിരെ ഗ്രനേഡുകൾ പ്രയോഗിച്ച തീവ്രവാദികളുടെ ആക്രമണത്തിൽ രണ്ട് സി ആർ പി എഫ് ജവാന്മാർക്കും ഒരു ജമ്മു കാശ്മീർ‌ പൊലീസ് ഉദ്യോഗസ്ഥനും പരിക്കേറ്റു. ബരാമുള്ളയ്ക്ക് അടുത്തുള്ള ഖാൻപുരയിൽ വച്ചാണ് തീവ്രവാദി ആക്രമണം ഉണ്ടായത്. പരിക്കേറ്റവരെ ഉടൻ തന്നെ അടുത്തുള്ള ആശുപത്രിയിലേക്ക് മാറ്റിയതായി സൈന്യം അറിയിച്ചു. സുരക്ഷാ ഉദ്യോഗസ്ഥർ സ്ഥലം വളഞ്ഞിട്ടുണ്ടെന്നും സേനകൾക്കെതിരെ ആക്രമണം നടത്തിയവർ ഉടൻ പിടിയിലാകുമെന്നും ഇന്ത്യൻ സൈന്യത്തിന്റെ പ്രതിനിധി മാദ്ധ്യമപ്രവർത്തകരെ അറിയിച്ചു.

ഈ മാസം ആദ്യം പാകിസ്ഥാൻ പിന്തുണയുള്ള തീവ്രവാദ സംഘമായ ലഷ്‌കർ ഇ ത്വയ്ബയുടെ ഒരു ഒളിസങ്കേതം സുരക്ഷാ ഉദ്യോഗസ്ഥർ തകർക്കുകയും അഞ്ച് ഭീകരരെ പിടികൂടുകയും ചെയ്തിരുന്നു. തീവ്രവാദി സംഘത്തിലെ ഒരാൾ നൽകിയ വിവരത്തെ തുടർന്ന് നടത്തിയ സേനാനീക്കത്തിലൂടെയാണ് സുരക്ഷാ ഉദ്യോഗസ്ഥർ ഇവരെ പിടികൂടിയത്. അതേസമയം നിരവധി ഡ്രോണുകൾ ഇപ്പോഴും ജമ്മു കാശ്മീരിന്റെ പല ഭാഗങ്ങളിൽ നിന്നും കണ്ടെത്തുന്നത് സുരക്ഷാ ഉദ്യോഗസ്ഥർക്ക് തലവേദന സൃഷ്ടിക്കുന്നുണ്ട്.