 ഇ-റുപ്പി സേവനങ്ങൾക്ക് പ്രധാനമന്ത്രി തുടക്കംകുറിച്ചു

ന്യൂഡൽഹി: ഡിജിറ്റൽ പണമിടപാടുകൾ പ്രോത്സാഹിപ്പിക്കുന്നതിന്റെ ഭാഗമായി കേന്ദ്രസർക്കാർ ആവിഷ്‌കരിച്ച 'ഇ-റുപ്പി" പ്രധാനമന്ത്രി നരേന്ദ്ര മോദി ഇന്നലെ വീഡിയോ കോൺഫറൻസിംഗിലൂടെ അവതരിപ്പിച്ചു. ഭാവി അധിഷ്‌ഠിതമായ പരിഷ്‌കാരമാണിതെന്നും അർഹർക്ക് നേരിട്ട് സാമ്പത്തിക സഹായം ലഭ്യമാക്കുന്നതുൾപ്പെടെയുള്ള കേന്ദ്രപദ്ധതികൾ കൂടുതൽ കാര്യക്ഷമമാകാൻ ഇ-റുപ്പി സഹായിക്കുമെന്നും പ്രധാനമന്ത്രി പറഞ്ഞു.

ഡിജിറ്റൽ ഗവേണൻസിന് പുതിയമാനം നൽകുന്ന ഇ-റുപ്പി എന്ന പ്രീപെയ്ഡ് ഇ-വൗച്ചർ, തുടക്കത്തിൽ ആരോഗ്യമേഖലയിലാണ് പ്രയോജനപ്പെടുത്താനാവുക. സ്വകാര്യ ആശുപത്രികളിൽ നിന്ന് വാക്‌സിൻ നേടാനായി പണത്തിന് പകരം ഇ-റുപ്പി നൽകാം. വൈകാതെ ചികിത്സാ സഹായം, സൗജന്യഭക്ഷണ വിതരണം, വിദ്യാഭ്യാസ ഫീസ് തുടങ്ങി കൂടുതൽ സേവനങ്ങൾ ഉൾപ്പെടുത്തും.

അർഹർക്ക് മാത്രം ഉപയോഗിക്കാവുന്ന, സുതാര്യവും സുരക്ഷിതമായ സംവിധാനമാണ് ഇ-റുപ്പി. ജനജീവിതവും ടെക്‌നോളജിയും ബന്ധപ്പെടുത്തി ഇന്ത്യ വളരുന്നതിന്റെ തെളിവാണ് ഈ സംവിധാനം. 75-ാം സ്വാതന്ത്ര്യദിനാഘോഷത്തിലേക്ക് രാജ്യം കടക്കവേയാണ് ഇതു നടപ്പാക്കാനായതെന്നത് സന്തോഷകരമാണെന്നും പ്രധാനമന്ത്രി പറഞ്ഞു. കേന്ദ്ര ധനകാര്യ സേവന വകുപ്പ്, ആരോഗ്യ - കുടുംബക്ഷേമ മന്ത്രാലയം, ദേശീയ ആരോഗ്യ അതോറിറ്റി എന്നിവയുമായി സഹകരിച്ച് നാഷണൽ പേമെന്റ്‌സ് അതോറിറ്റി ഒഫ് ഇന്ത്യയാണ് (എൻ.പി.സി.ഐ) ഇ-റുപ്പി വികസിപ്പിച്ചത്.

എന്താണ് ഇ-റുപ്പി?

 കറൻസിരഹിതമായ പണമിടപാട് സംവിധാനം. ക്യു.ആർ കോഡ് അല്ലെങ്കിൽ എസ്.എം.എസ് ആയി ഈ ഇ-വൗച്ചർ അർഹരുടെ ഫോണിൽ ലഭിക്കും.

 പണത്തിന് പകരം, ഇ-റുപ്പി ഉപയോഗിച്ച് സേവനങ്ങളോ ഉത്‌പന്നങ്ങളോ നേടാം.

 തുടക്കത്തിൽ ആരോഗ്യ മേഖലയിലാണ് ഉപയോഗിക്കാനാവുക

 11 പൊതു-സ്വകാര്യ ബാങ്കുകളുടെ പിന്തുണ ഇ-റുപ്പിക്കുണ്ട്.

പ്രവർത്തനരീതി

മൊബൈൽഫോണിൽ ക്യു.ആർ കോഡ് ആയോ എസ്.എം.എസ് ആയോ ആകും ഇ-റുപ്പി ലഭിക്കുക. ഉദാഹരണത്തിന് ഒരാൾ നിങ്ങൾക്ക് 500 രൂപ അടങ്ങിയ ഇ-റുപ്പി ക്യു.ആർ കോഡ് ആയി അയച്ചു എന്നിരിക്കട്ടെ. ആശുപത്രിയിൽ മരുന്നുവാങ്ങുമ്പോൾ പണത്തിന് പകരം ഈ ക്യു.ആർ കോഡ് കാണിച്ചാൽ മതിയാകും. കോണ്ടാക്‌ട്‌ലെസ് ആയി തന്നെ (കാർഡ് സ്വൈപ്പിംഗ് പോലെയുള്ള ഇടപെടലുകൾ ഇല്ല) ലളിതമായി ഇത്തരത്തിൽ പണം കൈമാറാം. ഡെബിറ്റ്/ക്രെഡിറ്റ് കാർഡ്, ഇന്റർനെറ്റ് ബാങ്കിംഗ്, മൊബൈൽ ആപ്പ്, ബാങ്ക് അക്കൗണ്ട് എന്നിവ ആവശ്യമില്ല.

ഉപയോഗം ആവശ്യത്തിന് മാത്രം

എന്ത് ആവശ്യത്തിനാണോ ലഭ്യമാക്കിയത്, അതിനുമാത്രമേ ഇ-റുപ്പി ഉപയോഗിക്കാനാകൂ. ബുക്ക് വാങ്ങാനാണ് ലഭിച്ചതെങ്കിൽ മറ്റ് ആവശ്യങ്ങൾക്ക് പ്രയോജനപ്പെടുത്താനാവില്ല. വൈകാതെ കേന്ദ്ര ആനുകൂല്യങ്ങളായ വിവിധ ക്ഷേമപെൻഷനുകൾ, സബ്‌സിഡികൾ, കർഷകർക്ക് ബാങ്ക് അക്കൗണ്ടിൽ നേരിട്ട് പണം തുടങ്ങിയ സേവനങ്ങൾ ഇ-റുപ്പി മുഖേനയാകും ലഭ്യമാകുക. സ്വകാര്യ കമ്പനികൾക്കും ജീവനക്കാരുടെ ക്ഷേമത്തിനായി ഇ-റുപ്പി ഉപയോഗിക്കാം.