തന്റെ വലിയൊരു ആരാധകനെ പ്രേക്ഷകന് മുന്നിൽ പരിചയപ്പെടുത്തി നടൻ ബാബു ആന്റണി. ഈ ആരാധകന് ഒരു പ്രത്യേകതയുണ്ട്. മലയാളത്തിന്റെ ഏറ്റവും വലിയ സൂപ്പർ താരമായ മോഹൻലാലിനൊപ്പമാണ് ഇദ്ദേഹം പ്രവർത്തിക്കുന്നത്. എന്നാൽ ആരാധന ബാബു ആന്റണിയോടും.

'ഞാൻ അഭിനയിച്ച എല്ലാ സിനിമകളുടെ പേരും അറിയുന്നയാൾ, എല്ലാ ചിത്രങ്ങളിലെയും കോസ്‌റ്റ്യൂം ഓർമ്മയുള്ളയാൾ, ഡയലോഗുകൾ മനപാഠം. കഴിഞ്ഞ അഞ്ചുവർഷമായി മോഹൻലാലിനൊപ്പം വർക്ക് ചെയ്യുന്നു. കണ്ടത് മുതൽ എന്റെയടുത്ത് നിന്ന് ഒരു നിമിഷം പോലും മാറിയിട്ടില്ല'ബാബു ആന്റണി ഫേസ്ബുക്കിൽ കുറിച്ചു. എന്നാൽ ആരാധകന്റെ പേര് മാത്രം താരം വെളിപ്പെടുത്തിയില്ല.

മണിരത്നം സംവിധാനം ചെയ്യുന്ന ബ്രഹ്മാണ്ഡ ചിത്രം പൊന്നിയൻ സെൽവന്റെ ലൊക്കേഷനിലാണ് ബാബു ആന്റണി ഇപ്പോൾ. ഷൂട്ടിംഗിന്റെ ഇടവേളയിൽ ഹൈദരാബാദിലുള്ള മോഹൻലാലിനെ സന്ദർശിച്ച ചിത്രം അദ്ദേഹം നേരത്തെ സോഷ്യൽ മീഡിയയിൽ പങ്കുവച്ചിരുന്നു. പൃഥ്വിരാജ് സംവിധാനം ചെയ്യുന്ന ബ്രോ ഡാഡിയിലാണ് മോഹൻലാൽ ഇപ്പോൾ അഭിനയിക്കുന്നത്.