തൃശൂർ : കൊവിഡ് നിയന്ത്രണം ഒഴിഞ്ഞ ഞായറാഴ്ച വിവിധ സർക്കാർ ഓഫീസിലും തദ്ദേശ സ്വയംഭരണ സ്ഥാപനങ്ങളിലും സ്ഥാപന മേധാവികൾ പതാക ഉയർത്തി. ജില്ലാ ഭരണ കൂടം സംഘടിപ്പിച്ച സ്വാതന്ത്ര്യ ദിനാഘോഷ ചടങ്ങിൽ മന്ത്രി കെ. രാജൻ പതാക ഉയർത്തി. കോർപറേഷൻ ഓഫീസിൽ മേയർ എം.കെ. വർഗീസ് പതാക ഉയർത്തി. ആദ്യമായി സി.പി.എം ജില്ലാ കമ്മിറ്റി ഓഫീസിലും ദേശീയ പതാക ഉയർത്തി. ജില്ലാ സെക്രട്ടറി എം.എം. വർഗീസ് പതാക ഉയർത്തി. പാർട്ടി ഓഫീസിലും പൊതുസ്ഥലങ്ങളിലും പതാക ഉയർത്തൽ നടന്നു. ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ ഒരു വർഷക്കാലം നീണ്ടു നിൽക്കുന്ന സ്വാതന്ത്ര്യത്തിന്റെ 75ാം വാർഷിക ആഘോഷങ്ങൾക്ക് ഡി.സി.സി ഓഫീസിൽ പതാക ഉയർത്തി തുടക്കം കുറിച്ചു. ' സ്വാതന്ത്ര്യ സമര ചരിത്രം കോൺഗ്രസിലൂടെ' എന്ന സന്ദേശമുയർത്തി ജില്ലയിലെ 26 ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ നടക്കുന്ന സ്വാതന്ത്ര്യദിന പദയാത്രയുടെ ജില്ലാതല ഉദ്ഘാടനം അയ്യന്തോൾ ബ്ലോക്ക് പ്രസിഡന്റ് കെ. ഗിരീഷ് കുമാറിന് പതാക കൈമാറി നിർവഹിച്ചു. ബി.ജെ.പി ജില്ലാ കമ്മിറ്റിയുടെ നേതൃത്വത്തിൽ ജില്ലാ പ്രസിഡന്റ് അഡ്വ. കെ.കെ. അനീഷ് കുമാർ പതാക ഉയർത്തി.
ഭാവിഭാരതത്തിൽ പ്രതീക്ഷകളോടെ...
രാജ്യത്തിന്റെ സ്വാതന്ത്ര്യത്തിന് മുക്കാൽ നൂറ്റാണ്ട് പിന്നിട്ടുകഴിഞ്ഞു. കൊവിഡ് മഹാമാരിക്ക് നടുവിലായതിനാൽ ആഘോഷങ്ങളും പ്രസംഗങ്ങളുമില്ലാതെ സ്വാതന്ത്ര്യദിനം കടന്നുപോയി. ഓൺലൈൻ ആഘോഷങ്ങളിലും വെബിനാറുകളിലും ഭാവി ഭാരതത്തെക്കുറിച്ചുളള പ്രതീക്ഷകളായിരുന്നു ഏറെയും. നാടിനെക്കുറിച്ചുളള പ്രത്യാശകളും സ്വപ്നങ്ങളും സമൂഹത്തിന്റെ വ്യത്യസ്ത തുറകളിലുള്ളവർ പങ്കിടുകയാണിവിടെ:
സ്വാതന്ത്ര്യം ശരിയായത് ചെയ്യാൻ മാത്രം ഉള്ളതായിരിക്കണം. അതൊരു മനോഭാവം കൂടിയാണ്. വ്യക്തി സ്വാതന്ത്ര്യം വ്യക്തികൾക്കും, സാമൂഹിക വ്യവസ്ഥയിൽ നിയന്ത്രിത സാമൂഹിക സ്വാതന്ത്ര്യവും പൊതുനന്മയെ ഉദ്ദേശിച്ചുള്ളതാണെന്നും അതാണ് ഇന്ത്യൻ ഭരണഘടനയുടെ ലക്ഷ്യം എന്നും ഉള്ള ബോധവത്കരണം വിദ്യാഭ്യാസത്തിലൂടെ വ്യക്തികളിലെത്തിക്കണം.
പ്രവീൺ ചന്ദ്രൻ
യോഗ മെഡിറ്റേഷൻ ട്രെയിനർ
ഭാവി ഭാരതം മതാതീതവും, നിക്ഷിപ്ത താല്പര്യങ്ങൾക്ക് അതീതവുമായി സത്യവും, സമത്വവും, സ്വാതന്ത്ര്യവും പുലരുന്നതായിരിക്കണം. ശുദ്ധമായ വായു, ജലം, ഭക്ഷണം, പരിസരം എല്ലാവർക്കും ലഭ്യമാവുന്നതോടൊപ്പം വിദ്യാഭ്യാസവും , തൊഴിലും എല്ലാവർക്കും ലഭ്യമാവണം.
സി. ബിജുലാൽ
ജില്ലാ സെക്രട്ടറി
ഹോട്ടൽ ആൻഡ് റസ്റ്റോറന്റ് അസോ.
എല്ലാ വിഭാഗം ജനങ്ങൾക്കും അവർ ആവശ്യപ്പെടുന്ന മേഖലയിൽ വിദ്യാഭ്യാസം ലഭിക്കാനവസരം വേണം. വിദ്യാഭ്യാസവും പാരമ്പര്യമായ അറിവിന്റെ വിപുലീകരണവും ദാരിദ്ര്യ നിർമ്മാർജ്ജനത്തിനൊപ്പം പുതിയ ഗവേഷണം വികസിക്കാനും ഉപകാരപ്രദമാവും.
ഡോ. ഉണ്ണിക്കൃഷ്ണൻ തെക്കേപ്പാട്ട്
കോളേജ് അദ്ധ്യാപകൻ
ഭാവി ഇന്ത്യ അഴിമതി രഹിതമാകണം. രാഷ്ട്രീയപരമായി ചിന്തിക്കാതെ ജനങ്ങളുടെ ആരോഗ്യത്തെയും നിലനിൽപ്പിനെയും ഉന്നമനത്തെയും മുന്നിൽക്കണ്ട് പ്രവർത്തിക്കുന്ന ഒരു രാഷ്ട്രമായിത്തീരണം. ദാരിദ്ര്യനിർമ്മാർജ്ജനം പൂർണ്ണമായും നടപ്പിലാക്കണം.
ഡോ. ആർ.എസ്. ധന്യ
(ഡെന്റൽ ഡോക്ടർ).
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |