ന്യൂഡൽഹി: കൊല്ലപ്പെട്ട ഡൽഹി മോഡൽ ജെസീക്കാലാലിന്റെ സഹോദരി സബ്രിന ലാൽ (53) അന്തരിച്ചു.ഹരിയാനയിലെ ഗുരുഗ്രാമിലായിരുന്നു അന്ത്യം.കരൾരോഗ​ ബാധിതയായിരുന്ന സബ്രിന ദീർഘകാലമായി ചികിത്സയിലായിരുന്നു. അസുഖം മൂർച്ഛിച്ചതോടെ ആശുപത്രിയിലെത്തിച്ചെങ്കിലും ഞായറാഴ്ച മരിക്കുകയായിരുന്നുവെന്ന്​ സഹോദരൻ പറഞ്ഞു.

1999ലാണ്​ ഡൽഹിയിലെ ബാർഹോട്ടലിൽ വച്ച് ജസീക്ക വെടിയേറ്റ്​ മരിക്കുന്നത്​. മുൻ കേന്ദ്രമന്ത്രി വിനോദ് ശർമയുടെ മകൻ മനുശർമ്മ അടക്കം ഉന്നത രാഷ്​ട്രീയക്കാരുമായി ബന്ധപ്പെട്ട കേസ്​ രാജ്യത്ത്​ വൻ കോളിളക്കം സൃഷ്​ടിച്ചിരുന്നു.

2006ൽ ഡൽഹി ഹൈക്കോടതി ജീവപര്യന്തം തടവിന് ശിക്ഷിച്ചിരുന്നു.

സഹോദരിയുടെ കൊലപാതകത്തിലെ യഥാർത്ഥ പ്രതികളെ നിയമത്തിന്​ മുമ്പിൽ കൊണ്ടുവരാൻ സബ്രിന നടത്തിയ പോരാട്ടം ശ്രദ്ധേയമായിരുന്നു.

'നോ വൺ കിൽഡ് ജസീക്ക' എന്ന ബോളിവുഡ് സിനിമ സബ്രിനയുടെ പോരാട്ടത്തെ ആസ്പദമാക്കി നിർമ്മിച്ചതാണ്.

കഴിഞ്ഞവർഷം പി.ടി.ഐയ്ക്ക്​ നൽകിയ അഭിമുഖത്തിൽ സഹോദരിയുടെ പേരിൽ ഒരു ഫൗണ്ടേഷൻ തുടങ്ങണമെന്നും സമാനരീതിയിൽ അക്രമത്തിന്​ ഇരയായവർക്ക്​ നീതി ലഭ്യമാക്കാൻ പ്രവർത്തിക്കുമെന്നും പറഞ്ഞിരുന്നു.