തിരുവനന്തപുരം : സഹകരണ ബാങ്കുകൾക്കെതിരെയുള്ള വ്യാജ പ്രചാരണങ്ങളെ സഹകാരി സമൂഹം ഒറ്റക്കെട്ടായി നേരിടണമെന്ന് സംസ്ഥാന സഹകരണ യൂണിയൻ ചെയർമാൻ കോലിയക്കോട് എൻ.കൃഷ്ണൻ നായർ ആവശ്യപ്പെട്ടു. കരുവന്നൂരിലെ ഒറ്റപ്പെട്ട സംഭവത്തിന്റെ പേരിൽ സഹകരണ മേഖലയെ തകർക്കാനുള്ള ആസൂത്രിത ശ്രമങ്ങളാണ് നടക്കുന്നത്. സംഘങ്ങളിൽ അഴിമതിയോ ക്രമക്കേടോ നടക്കുന്നില്ലെന്ന് ഉറപ്പു വരുത്താൻ ഇടപെടണമെന്ന് സർക്കിൾ യൂണിയൻ ചെയർമാൻമാർക്ക് നിർദ്ദേശം നൽകിയിട്ടുണ്ട്. അഴിമതി വച്ചു പൊറുപ്പിക്കില്ലെന്നത് സർക്കാരിന്റെ പ്രഖ്യാപിത നയമാണ്. കരുവന്നൂർ വിഷയത്തിൽ കുറ്റവാളികളെ നിയമത്തിന് മുന്നിൽ കൊണ്ടു വന്ന് മാതൃകാപരമായ ശിക്ഷ ഉറപ്പാക്കാനുള്ള ശ്രമങ്ങളാണ് സർക്കാർ നടത്തുന്നതെന്നും അദ്ദേഹം കൂട്ടിച്ചേർത്തു.