ശ്രീകാര്യം:താത്കാലിക നേട്ടത്തിന് വേണ്ടി രാജ്യത്ത് വർഗീയത പ്രചരിപ്പിക്കുന്നവർക്കെതിരായ പോരാട്ടങ്ങൾക്ക് ശക്തിപകരാൻ ശ്രീനാരായണ ഗുരുദേവ ദർശനങ്ങൾ പ്രചോദനമാണെന്ന് പ്രതിപക്ഷ നേതാവ് വി.ഡി.സതീശൻ പറഞ്ഞു. ഗുരുദേവ ജയന്തിയോടനുബന്ധിച്ച് ചെമ്പഴന്തി വയൽവാരം വീട്ടിലെത്തി ഗുരുദേവ വിഗ്രഹത്തിൽ പുഷ്പാർച്ചന നടത്തിയ ശേഷം സംസാരിക്കുകയായിരുന്നു അദ്ദേഹം.

മതത്തിന്റെ പേരിൽ രാജ്യത്തെ വിഭജിക്കാൻ ശ്രമിക്കുന്ന എല്ലാ ശക്തികളെയും തിരിച്ചറിയണം. മതേതരത്വത്തിന്റെ പതാക വാഹകരാകാൻ ഗുരുദേവ ദർശനം നെഞ്ചിലേറ്റുന്ന എല്ലാവർക്കും കഴിയട്ടെയെന്നും പ്രതിപക്ഷ നേതാവ് പറഞ്ഞു. ഗുരുകുലം സെക്രട്ടറി സ്വാമി ശുഭാംഗാനന്ദ, എം.എ.വാഹീദ്, കോൺഗ്രസ് മണ്ഡലം പ്രസിഡന്റ് ബോസ്, അണിയൂർ പ്രസന്നകുമാർ തുടങ്ങിയവർ പങ്കെടുത്തു.