തിരുവനന്തപുരം: കൊവിഡ് നിയന്ത്രണാതീതമാവുന്ന സാഹചര്യത്തിൽ സംസ്ഥാനത്ത് നാളെ സമ്പൂർണ ലോക്ക്ഡൗൺ ഏർപ്പെടുത്തും. അവശ്യ സർവീസുകൾക്ക് മാത്രമേ അനുവാദമുണ്ടാകൂ. ഇന്ന് മുഖ്യമന്ത്രിയുടെ അദ്ധ്യക്ഷതയിൽ ചേരുന്ന അവലോകന യോഗത്തിൽ കൂടുതൽ തീരുമാനങ്ങൾ ഉണ്ടായേക്കും.
നാളെ പൊതുഗതാഗതമുണ്ടാവില്ല. കടകൾക്കും വാണിജ്യ സ്ഥാപനങ്ങൾക്കും വിവാഹം പോലുള്ള പൊതുചടങ്ങുകൾക്കും നിയന്ത്രണമുണ്ടാകും. അനാവശ്യമായി പുറത്തിറങ്ങുന്നവരെ വിലക്കും. റോഡുകളിൽ പരിശോധന ശക്തമാക്കും.
കൊവിഡ് പടരുന്ന പ്രദേശങ്ങളിൽ രാത്രികാല കർഫ്യൂവിന് കേന്ദ്ര നിർദ്ദേശമുണ്ട്. ഇത് സംസ്ഥാനം പരിഗണിച്ചേക്കും. അതേസമയം യാത്രകളും, വ്യാപാര, വാണിജ്യ, നിർമ്മാണ പ്രവർത്തനങ്ങളും തടസ്സപ്പെടുത്തേണ്ടെന്നാണ് നിലപാട്. വീടുകളിലെ ക്വാറന്റൈൻ ശക്തിപ്പെടുത്താൻ കൂടുതൽ നടപടികളെടുക്കും.
32,801 രോഗികൾ ടി.പി.ആർ 19.22%
സംസ്ഥാനത്ത് ടി.പി.ആർ വീണ്ടും 19 ശതമാനം കടന്നതോടെ പ്രതിദിന രോഗികൾ 32000 കവിഞ്ഞു. ഇന്നലെ 32,801 പേർക്കാണ് രോഗം സ്ഥിരീകരിച്ചത്. 24 മണിക്കൂറിനിടെ 1,70,703 സാമ്പിളുകളാണ് പരിശോധിച്ചത്. ടെസ്റ്റ് പോസിറ്റിവിറ്റി നിരക്ക് 19.22 ശതമാനം.179 മരണങ്ങളും റിപ്പോർട്ട് ചെയ്തു. ഇതോടെ ആകെ മരണം 20,313.
മറ്റു സംസ്ഥാനങ്ങളെ അപേക്ഷിച്ച് രോഗബാധ കണ്ടെത്തുന്നതിലെ മികവാണ് രോഗികളുടെ എണ്ണം കൂടാൻ കാരണം. കൊവിഡ് പ്രതിരോധത്തിന് രാഷ്ട്രീയമില്ല. ഭരണ - പ്രതിപക്ഷ വ്യത്യാസമില്ലാതെ എല്ലാവരും ഒന്നിച്ചുനിന്ന് ഈ പ്രതിസന്ധി മറികടക്കണം
- വീണാ ജോർജ്, ആരോഗ്യ മന്ത്രി
അന്തർ സംസ്ഥാന യാത്ര രണ്ട് ഡോസെടുത്താൽ
ആർ.ടി-പി.സി.ആർ വേണ്ട, വാക്സിനേഷൻ സർട്ടിഫിക്കറ്റ് കരുതണം
ന്യൂഡൽഹി: രണ്ട് ഡോസ് വാക്സിനെടുത്തവർക്ക് വിമാനം, റെയിൽ, റോഡ് മാർഗ്ഗം അന്തർ സംസ്ഥാന യാത്രകൾക്ക് ആർ.ടി-പി.സി.ആർ പരിശോധന ഒഴിവാക്കി കേന്ദ്ര സർക്കാരിന്റെ പുതിയ മാർഗ്ഗരേഖ. യാത്രക്കാർക്ക് ശരീരം മുഴുവൻ മൂടുന്ന പി.പി.ഇ കിറ്റ് പോലുള്ള ആവരണങ്ങളും ആവശ്യമില്ല. അതേസമയം, കൊവിഡ് കേസുകൾ ഉയരുന്ന സാഹചര്യത്തിൽ സംസ്ഥാന സർക്കാരുകൾക്ക് പ്രാദേശിക നിയന്ത്രണങ്ങൾ ഏർപ്പെടുത്താം.
ചില സംസ്ഥാനങ്ങൾ എല്ലാ അന്തർ സംസ്ഥാന യാതക്കാർക്കും നെഗറ്റീവ് ആർ.ടി.പി.സി.ആർ സർട്ടിഫിക്കറ്റ് നിർബന്ധമാക്കിയ സാഹചര്യത്തിലാണ് കേന്ദ്രം പുതിയ യാത്രാമാർഗരേഖ ഇറക്കിയത്.
രണ്ട് ഡോസ് വാക്സിൻ എടുത്ത് 15 ദിവസത്തിനു ശേഷം യാത്രചെയ്യുന്ന രോഗലക്ഷണങ്ങളില്ലാവർക്ക് ആർ.ടി-പി.സി.ആർ നെഗറ്റീവ് സർട്ടിഫിക്കറ്റ് നിർബന്ധമാക്കരുത്. ഇവർ കൊവിൻ പോർട്ടലിൽ നിന്നുള്ള വാക്സിൻ സർട്ടിഫിക്കറ്റ് കരുതണം.
കൊവിഡ് ഉയർന്നതിനെ തുടർന്ന് അന്തർസംസ്ഥാന യാത്രയ്ക്ക് ആർടി.പി.സി.ആർ നെഗറ്റീവ് സർട്ടിഫിക്കറ്റ് നിർബന്ധമാക്കുന്ന സംസ്ഥാനങ്ങൾ അക്കാര്യം വിപുലമായി പരസ്യപ്പെടുത്തണം.
മറ്റ് നിർദ്ദേശങ്ങൾ
രോഗലക്ഷണങ്ങൾ കാണുന്ന യാത്രക്കാരെ ആന്റിജൻ പരിശോധനയ്ക്ക് വിധേയമാക്കണം
യാത്രകൾക്ക് മാസ്ക്, സമൂഹ്യഅകലം നിർബന്ധം. ജീവനക്കാർ മുഴുവൻ സമയവും മാസ്ക്, ഫേസ്ഷീൽഡ്, കൈയുറ എന്നിവ ധരിക്കണം.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |