മെൽബൺ : സ്വവർഗ വിവാഹത്തിലൂടെ വാർത്ത സൃഷ്ടിച്ച ആസ്ട്രേലിയൻ പേസ് ബൗളർ മേഗൻ ഷൂട്ടിനും പങ്കാളിക്കും കുഞ്ഞു പിറന്നു. ജീവിത പങ്കാളി ജെസ് ഹോളിയോകെ പെൺകുഞ്ഞിനു ജന്മം നൽകിയ വിവരം സമൂഹമാധ്യമങ്ങളിലൂടെയാണ് മേഗൻ ഷൂട്ട് പുറത്തുവിട്ടത്. ഇവരുടെ ആദ്യ കുഞ്ഞാണിത്. 2019 മാർച്ചിലാണ് മേഗൻ ഷൂട്ടും ജെസ്സും വിവാഹിതരായത്. റിലീ ലൂയിസ് ഷൂട്ട് എന്നാണ് കുഞ്ഞിന് പേരിട്ടിരിക്കുന്നത്. കുഞ്ഞിനെ കാത്തിരിക്കുന്ന വിവരം ഇക്കഴിഞ്ഞ മേയ് മാസത്തിൽ മേഗൻ ഷൂട്ട് സമൂഹമാധ്യമത്തിലൂടെ പുറത്തുവിട്ടിരുന്നു. ആസ്ട്രേലിയയ്ക്കായി 65 ഏകദിനങ്ങളും 73 ട്വന്റി20 മത്സരങ്ങളും കളിച്ചിട്ടുള്ള താരമാണ് ഇരുപത്തെട്ടുകാരിയായ മേഗൻ ഷൂട്ട്. 2012ലായിരുന്നു അന്താരാഷ്ട്ര ക്രിക്കറ്റിലെ അരങ്ങേറ്റം. അന്താരാഷ്ട്ര ക്രിക്കറ്റിൽ ഇതിനകം 204 വിക്കറ്റുകൾ വീഴ്ത്തിയിട്ടുണ്ട്. വനിതാ ബിഗ് ബാഷ് ലീഗിൽ 74 വിക്കറ്റുകളും സ്വന്തമാക്കിയിട്ടുണ്ട്. 2020ലെ ട്വന്റി20 ലോകകപ്പിൽ ഓസ്ട്രേലിയ കിരീടം ചൂടുമ്പോൾ ഏറ്റവും കൂടുതൽ വിക്കറ്റുകളുമായി വിജയശിൽപിയായത് മേഗനായിരുന്നു. ഫൈനലിൽ ഇന്ത്യയ്ക്കെതിരെ 18 റൺസ് മാത്രം വഴങ്ങി നാലു വിക്കറ്റെടുത്ത പ്രകടനവും ശ്രദ്ധ നേടി. നേരത്തെ, ന്യൂസിലാൻഡ് ക്രിക്കറ്റിലെ സ്വവർഗ ദമ്പതികളായ ആമി സാറ്റർത്വൈറ്റ് – ലീ തഹൂഹു എന്നിവരും കുഞ്ഞു പിറന്നത് സമൂഹമാധ്യമങ്ങളിലൂടെ പങ്കുവച്ചിരുന്നു. ജനുവരി 13നാണ് ഇരുവർക്കും കുഞ്ഞു പിറന്നത്. കുഞ്ഞിന്റെ ജനനവുമായി ബന്ധപ്പെട്ട് ആമി സാറ്റർത്വൈറ്റ് ദേശീയ ടീമിൽനിന്ന് നീണ്ട ഇടവേളയെടുത്തിരുന്നു. ന്യൂസിലാൻഡിലും ആസ്ട്രേലിയയിലും സ്വവർഗ വിവാഹത്തിന് നിയമസാധുതയുണ്ട്. അന്താരാഷ്ട്ര ക്രിക്കറ്റിൽ മേഗൻ ഷൂട്ടിനും ആമി സാറ്റർത്വൈറ്റ് – ലീ തഹൂഹു ദമ്പതികൾക്കും പുറമേ സ്വവർഗ വിവാഹിതരായ വേറെയും താരങ്ങളുണ്ട്. ദക്ഷിണാഫ്രിക്കൻ വനിതാ ടീം നായിക ഡെയ്ൻ വാൻ നീകർക്ക് സഹതാരം മാരിസാൻ കാപ്പിനെയും ന്യൂസിലാൻഡിന്റെ ഹീലി ജെൻസൺ ഓസ്ട്രേലിയയുടെ നിക്കോളാ ഹാൻകോക്കിനെയും സ്വവർഗ വിവാഹത്തിലൂടെ പങ്കാളിയായി സ്വീകരിച്ചിരുന്നു. ഇവർക്കു പിന്നാലെ ആസ്ട്രേലിയൻ വനിതാ ക്രിക്കറ്റ് താരങ്ങളായ ഡെലീസ കിമ്മിൻസും ലോറ ഹാരിസും സ്വവർഗ വിവാഹത്തിലൂടെ ഒന്നിച്ചു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |