ന്യൂഡൽഹി: സെപ്തംബർ 30ന് ഉപതിരഞ്ഞെടുപ്പ് നടക്കുന്ന ഭവാനിപൂർ മണ്ഡലത്തിൽ മത്സരിക്കാൻ പശ്ചിമബംഗാൾ മുഖ്യമന്ത്രി മമത ബാനർജി നാമനിർദ്ദേശപത്രിക സമർപ്പിച്ചു. മമതയ്ക്കെതിരെ ബി.ജെ.പി സ്ഥാനാർത്ഥിയായി അഡ്വ. പ്രിയങ്ക ടിബ്രേവാൾ മത്സരിക്കും. ബാബുൽ സുപ്രിയോയുടെ ലീഗൽ അഡ്വൈസറായിരുന്നു​ പ്രിയങ്ക.

2014ലാണ്​ ഇവർ ബി.ജെ.പിയിലെത്തുന്നത്​. പ്രധാനമന്ത്രി നരേന്ദ്രമോദിയാണ്​ ബി.ജെ.പിയിൽ ചേരാൻ തനിക്ക്​ പ്രചോദനമായതെന്ന്​ പ്രിയങ്ക നേരത്തേ വ്യക്തമാക്കിയിരുന്നു. 2015ൽ പ്രിയങ്ക കൊൽക്കത്ത മുനിസിപ്പൽ കൗൺസലിലേക്ക്​ മത്സരിച്ചെങ്കിലും തൃണമൂൽ കോൺ​ഗ്രസിന്റെ സ്വപൻ സമ്മാദാറിനോട്​ പരാജയ​പ്പെട്ടു. തുടർന്ന്​ ബി.ജെ.പിയുടെ നിരവധി നേതൃസ്ഥാനങ്ങളുടെ ചുമതല വഹിച്ചു. 2020 ആഗസ്റ്റിൽ ഭാരതീയ ജനത യുവ മോർച്ചയുടെ ബംഗാൾ വൈസ്​ പ്രസിഡന്റായി.

കഴിഞ്ഞ നിയമസഭ തിരഞ്ഞെടുപ്പിൽ എന്റലിയിൽ നിന്ന്​ മത്സരിച്ചെങ്കിലും തൃണമൂലിന്റെ സ്വർണകമൽ സാഹയോട്​ 58,257വോട്ടിന് പരാജയപ്പെട്ടു. മുഖ്യമന്ത്രി സ്ഥാനം നിലനിറുത്താൻ മമതയ്ക്ക്​ തിരഞ്ഞെടുപ്പ്​ ജയം അനിവാര്യമാണ്​.