ആദ്യ അലോട്ട്മെന്റ് 22 ന്, തെറ്റുകൾ തിരുത്താൻ 16 വരെ അവസരം

കൊല്ലം: പ്ലസ് വൺ പ്രവേശനത്തിനുള്ള ട്രയൽ അലോട്ട്‌മെന്റ് ലിസ്​റ്റ് ഇന്നലെ പ്രസിദ്ധീകരിച്ചു. റിസൾട്ട് പരിശോധിക്കാനുള്ള സാങ്കേതിക സൗകര്യങ്ങൾ സർക്കാർ, എയ്ഡഡ് ഹയർസെക്കൻഡറി സ്‌കൂളുകളിലെ ഹെൽപ്പ് ഡെസ്‌കുകളിൽ നിന്നു ലഭിക്കും. 22 ന് പ്രസിദ്ധീകരിക്കുന്ന ആദ്യ അലോട്ട്‌മെന്റിന്റെ സാദ്ധ്യത ലിസ്റ്റാണ് പ്രസിദ്ധീകരിച്ചത്.

സ്‌കൂളുകളിൽ പ്രവേശനം നേടാൻ ആദ്യ അലോട്ട്‌മെന്റ് ലിസ്​റ്റ് വരുന്നത് വരെ കാത്തിരിക്കണം. അപേക്ഷകരിൽ കൂടുതൽപേരും ലിസ്റ്റിൽ ഉൾപ്പെട്ടിട്ടുണ്ടെങ്കിലും മുഴുവൻ വിഷയങ്ങൾക്കും എ പ്ലസ് നേടിയ പല വിദ്യാർത്ഥികളും ഓപ്‌ഷനുകളിൽ യോഗ്യത നേടിയിട്ടില്ല എന്നത് നിരാശയുണ്ടാക്കിയിട്ടുണ്ട്. ഇവരിൽ ഭൂരിഭാഗം പേരും സയൻസ് ഗ്രൂപ്പ് ഇഷ്ടവിഷയമായി ഓപ്‌ഷൻ നൽകിയവരാണ്. 16ന് വൈകിട്ട് 5 വരെ ഓപ്‌ഷനുകളിൽ തിരുത്തൽ വരുത്താനും പുന:ക്രമീകരിക്കാനും അവസരമുണ്ട്. എന്തെങ്കിലും തിരുത്തലുകൾ ആവശ്യമുണ്ടെങ്കിൽ കാൻഡിഡേറ്റ് ലോഗിനിലെ എഡിറ്റ് ആപ്ലിക്കേഷൻ എന്ന ലിങ്കിലൂടെ തിരുത്തലുകൾ, ഉൾപ്പെടുത്തലുകൾ എന്നിവ ചെയ്യാനാവും..

തിരുത്താൻ കഴിയുന്നവ

 ഗ്രൂപ്പ് വിഷയങ്ങളുടെ ഓപ്ഷനുകൾ

 അലോട്ട്‌മെന്റിനെ സ്വാധീനിക്കുന്ന ജാതി സംവരണ വിവരങ്ങൾ

 ബോണസ് പോയിന്റ് ലഭിക്കുന്ന വിവരങ്ങൾ

 താമസിക്കുന്ന പഞ്ചായത്തിന്റെയും താലൂക്കിന്റെയും വിവരങ്ങൾ

 ടൈ ബ്രേക്കിന് പരിഗണിക്കുന്ന മ​റ്റ് പാഠ്യേതര പ്രവർത്തനങ്ങൾ (കലാകായിക മേളകൾ, ക്ലബ്ബുകൾ
മുതലായവ)

ശ്രദ്ധിക്കണം അപേക്ഷ

അപേക്ഷകളിൽ ജാതി, കാ​റ്റഗറി വിവരങ്ങൾ രേഖപ്പെടുത്തിയതിൽ ചില പൊരുത്തക്കേടുകളുണ്ടെന്ന് അധികൃതർ പറയുന്നു. ഉദാഹരണമായി ഈഴവ എന്ന് ജാതി രേഖപ്പെടുത്തിയ ചില അപേക്ഷകർ കാ​റ്റഗറിയിൽ ഈഴവ എന്നതിന് പകരം ഹിന്ദു ഒ.ബി.സി എന്നാണ് രേഖപ്പെടുത്തിയിട്ടുള്ളത്. ഇത്തരം തെ​റ്റുകൾ തിരുത്താതിരുന്നാൽ അലോട്ട്‌മെന്റ് ലഭിച്ചാലും പ്രവേശനം
ബുദ്ധിമുട്ടാകും. എല്ലാ അപേക്ഷകരും പ്രൊസ്‌പെക്ടസിലെ നിർദ്ദേശങ്ങളനുസരിച്ചുള്ള ജാതിയും കാ​റ്റഗറിയും രേഖപ്പെടുത്തിയിട്ടുള്ളത് ശരിയാണോ എന്ന് പരിശോധിക്കാൻ അവസരം പ്രയോജനപ്പെടുത്തണം.

റാങ്ക് പരിശോധന

ട്രയൽ അലോട്ട്‌മെന്റിലോ ആദ്യ അലോട്ട്‌മെന്റിലോ റാങ്ക് പരിശോധിക്കുമ്പോൾ റാങ്ക് നമ്പർ ആശങ്ക ഉണ്ടാക്കാം. അപേക്ഷിച്ച സ്‌കൂളിൽ 60 സീ​റ്റുകൾ മാത്രമാണുള്ളതെങ്കിലും റാങ്ക് പരിശോധിക്കുമ്പോൾ മുന്നൂറിനോ നാനൂറിനോ മുകളിലുള്ള റാങ്ക് ഉണ്ടാകും. വിഷയ കോമ്പിനേഷൻ ഏതെങ്കിലും ഓപ്ഷനായി നൽകിയിട്ടുള്ള ജില്ലയിലെ എല്ലാ അപേക്ഷകരുടേയും റാങ്കാണ് കണക്കാക്കിയിരിക്കുന്നത്. ഈ അപേക്ഷകരെല്ലാം ഇതേ സ്‌കൂളിന്റെ അലോട്ട്‌മെന്റ് ലി​സ്റ്റിൽ വരണമെന്നില്ല. അപേക്ഷകരുടെ മെരിറ്റനുസരിച്ച് കൂടുതൽ മെച്ചപ്പെട്ട അവരുടെ മറ്റ് ഓപ്ഷനുകളിൽ അലോട്ട്മെന്റ് ലഭിക്കുമെന്നതിനാൽ താഴ്ന്ന റാങ്കുകാർക്കും അലോട്ട്മെന്റ് ലഭിക്കുമെന്നാണ് അധികൃത ഭാഷ്യമെങ്കിലും ജില്ലയിൽ ആകെയുള്ള സീറ്റെണ്ണത്തിൽ കൂടുതൽ അഡ്മിഷൻ നല്കുമെന്നതിൽ വ്യക്തതയില്ല. 26,622 സീറ്റുകലേക്ക് 34,556 വിദ്ധ്യാർത്ഥികളാണ് അപേക്ഷ നൽകിയിട്ടുള്ളത്.