വരന്തരപ്പിള്ളി: മനുഷ്യജീവൻ സംരക്ഷിക്കുന്നതിനാണ് സർക്കാർ പ്രഥമ പരിഗണന നൽകേണ്ടതെന്ന് പരിസ്ഥിതി പ്രവർത്തകൻ സി.ആർ. നീലകണ്ഠൻ. വനം, വന്യജീവി സംരക്ഷണം സർക്കാരിന്റെ കീഴിലാണെങ്കിൽ അവയിൽ നിന്നുള്ള നാശനഷ്ടങ്ങൾക്ക് പരിഹാരം കാണേണ്ടത് സർക്കാരിന്റെ ഉത്തരവാദിത്വമാണ്. ജീവനും സ്വത്തിനും സംരക്ഷണം തേടിയുള്ള സമരമാണ് കേരളത്തിലുടനീളം നടക്കുന്നതെന്നും അദ്ദേഹം പറഞ്ഞു. പാലപ്പിള്ളി മേഖലയിൽ കാട്ടാനയുടെ ആക്രമണം തടയണമെന്നാവശ്യപ്പെട്ട് ആദിവാസി ബഹുജന ഐക്യവേദി പാലപ്പള്ളി ഫോറസ്റ്റ് റേഞ്ച് ഓഫീസിന് മുൻപിൽ നടത്തിയ പ്രതിഷേധ സംഗമം ഉദ്ഘാടനം ചെയ്യുകയായിരുന്നു അദ്ദേഹം.

ആദിവാസി ബഹുജന ഐക്യവേദി ചെയർമാൻ ടി.കെ. മുകുന്ദൻ അദ്ധ്യക്ഷനായി. കെ.പി.സി.സി. സെക്രട്ടറി സുനിൽ അന്തിക്കാട്, ആർ.എം.പി ജില്ലാ സെക്രട്ടറി പി.ജെ. മോൻസി, ഇ.എ. ഓമന, കെ.വി. പുരുഷോത്തമൻ, ജയന്തി തുടങ്ങിയവർ സംസാരിച്ചു.