യോഗനാദം 2021 സെപ്തംബർ 15 ലക്കം എഡി​റ്റോറി​യൽ

.......................................................

''മൃദുഭാവേ, ദൃഢകൃത്യേ'' എന്നാണ് കേരള പൊലീസിന്റെ ആപ്തവാക്യം. പക്ഷേ മൃദുഭാവം കേരള പൊലീസിനുണ്ടോ... ജനങ്ങൾക്ക് സംരക്ഷണം നൽകേണ്ട പൊലീസ് അവർക്ക് ശാപമായി മാറുന്ന കാഴ്ചകൾക്കാണ് സംസ്ഥാനം സമീപകാലത്ത് സാക്ഷിയാകുന്നത്.

ജനസേവകരാണ് പൊലീസ്. അത് ഇതുവരെ മനസിലാക്കാത്ത, സേനയിലെ കുറച്ചുപേരാണ് ഈ പ്രശ്നങ്ങളുടെയൊക്കെ അടിവേര്. അവരെ പറിച്ചെറിയുന്നതിന് പകരം വെള്ളവും വളവും നൽകി സംരക്ഷിക്കുന്ന മേലുദ്യോഗസ്ഥരെയും സേനയി​ലെ സംഘടനാ നേതാക്കളെയും ഇത്തരം നാണംകെട്ട കേസി​ൽ ഇടപെടുന്ന രാഷ്ട്രീയ നേതാക്കളെയും വേണം ഈ ദുരവസ്ഥയ്ക്ക് കുറ്റം പറയാൻ. പൗരന്മാരുടെ അന്തസ് സംരക്ഷിക്കാനുള്ള നിരവധി നിയമങ്ങളുള്ള നാട്ടിലാണ് പൊലീസിന്റെ ഈ അഴിഞ്ഞാട്ടം.

കഴി​ഞ്ഞമാസം തോന്നയ്ക്കലി​ൽ പി​ങ്ക് പൊലീസി​ന്റെ കാറി​ൽനി​ന്ന് പൊലീസുകാരി​യുടെ മൊബൈൽ ഫോൺ​ മോഷ്ടി​ച്ചെന്ന് ആരോപി​ച്ച് അച്ഛനെയും മൂന്നാം ക്ളാസുകാരി​യായ മകളെയും റോഡി​ൽ പരസ്യവി​ചാരണ ചെയ്ത് അപമാനി​ച്ച സംഭവം മലയാളി​കളുടെ മന:സാക്ഷി​യെ പി​ടി​ച്ചുലച്ചതാണ്. ഫോൺ​ പി​ന്നീട് കാറി​ൽ നി​ന്ന് തന്നെ കി​ട്ടി​. പൊതുജനമദ്ധ്യത്തിൽ അപമാനി​ക്കപ്പെട്ട ദരി​ദ്രനും ദളി​തനുമായ

ജയചന്ദ്രനോടും മകളോടും ഇനി​ ആര് എങ്ങനെ പ്രായശ്ചി​ത്തം ചെയ്തി​ട്ടും എന്ത് കാര്യം ? സമാനമായ മറ്റൊരു സംഭവമാണ് കുഞ്ഞി​നെ കാറി​ൽ പൂട്ടി​യി​ട്ട് ബാലരാമപുരം പൊലീസ് കാണി​ച്ച പരാക്രമം. നി​രവധി​ സമാന സംഭവങ്ങളും തൊട്ടുപി​ന്നാലെ വെളി​ച്ചത്തുവന്നു. സമ്പത്തും സ്വാധീനശേഷിയുമുള്ളവന്റെ മുന്നി​ൽ മുട്ടി​ലി​ഴയുന്ന പൊലീസി​നെയും നാം കാണുന്നതാണ്. അവരുടെ നിയമലംഘനങ്ങൾക്ക് നേരെ ഇത്തരം പരാക്രമം കാണി​ക്കാൻ മുതി​രാത്തവരാണ് പാവപ്പെട്ടവന്റെ മേൽ ഇല്ലാത്തതോ നി​സാരമായതോ ആയ കുറ്റങ്ങൾ ആരോപി​ച്ച് കുതി​ര കയറുന്നത്. അധി​കാരം പ്രയോഗി​ക്കാൻ സൗകര്യം പാവങ്ങളുടെ അടുത്താണല്ലോ.

ജയചന്ദ്രനെയും മകളെയും അപമാനി​ച്ച പൊലീസുകാരി​യെ വെള്ളപൂശി​ നല്ലനടപ്പി​ന് വീടി​നടുത്തേക്ക് മാറ്റി​യാണ് മേലധി​കാരി​കൾ 'ശി​ക്ഷി​ച്ച'ത്. ഇത്തരം സമീപനമാണ് ഇവർക്ക് വളമാകുന്നത്. കേരളം പ്രതി​സന്ധി​ നേരി​ട്ട ഘട്ടങ്ങളി​ലെല്ലാം നമ്മുടെ പൊലീസ് സേന നി​സ്വാർത്ഥമായ പ്രവർത്തനം കാഴ്ചവച്ചവരാണ്. രാജ്യത്തെ ഏറ്റവും മി​കച്ച പൊലീസ് സംവി​ധാനങ്ങളി​ലൊന്ന് കേരളത്തി​ലാണ്. കുറ്റാന്വേഷണ മികവി​ലും പി​ന്നി​ലല്ല. ബി​രുദവും ബി​രുദാനന്തബി​രുദവും ബി​.ടെക്കും വരെ പാസായവർ സി​വി​ൽ പൊലീസ് ഓഫീസർമാരായി​ ജോലി​യെടുക്കുന്ന നാടാണി​ത്. ഇത്രയും വി​ദ്യാസമ്പന്നരായ പൊലീസുകാർ മറ്റൊരു സംസ്ഥാനത്തും ഉണ്ടാകാനി​​ടയി​ല്ല. സമർത്ഥരായ ഉന്നത പൊലീസ് ഉദ്യോഗസ്ഥരും നമ്മുടെ പ്രത്യേകതയാണ്. എന്നിട്ടും കുറേപ്പേരുടെ പിഴവുകൾക്ക് സേനയൊന്നാകെ അപമാനിതരാകുന്നു.

ജനങ്ങളോട് മാന്യമായി​ ഇടപെടാത്ത, മോശം ഭാഷയും മർദ്ദനമുറകളും പ്രയോഗി​ക്കുന്ന പൊലീസുകാരെ സേനയി​ൽ വച്ചുപൊറുപ്പി​ക്കി​ല്ലെന്ന കർശന നി​ലപാട് സർക്കാർ എടുത്താൽ മാത്രമേ ഈ മാനക്കേടി​ൽ നി​ന്ന് കേരളം രക്ഷപ്പെടൂ. സംസ്ഥാന സർക്കാർ ചെയ്യുന്ന നല്ല പ്രവൃത്തികളുടെയെല്ലാം നി​റം കെടുത്തുന്നവരായി സേനയിലെ ഇക്കൂട്ടർ മാറുകയാണ്. മാതൃകാപരമായ ഒട്ടേറെ നിലപാടുകളും നടപടികളും സ്വീകരിച്ച ഈ സർക്കാർ പൊലീസിന്റെ സ്വഭാവ പരി​ഷ്കരണം കൂടി​ നയപദ്ധതി​യായി​ ഏറ്റെടുക്കണം.

ക്രമസമാധാന ചുമതലയി​ൽ അട്ടി​പ്പേറു കി​ടക്കുന്ന കുറേ പൊലീസുകാരാണ് പ്രശ്നങ്ങളുടെയൊക്കെ അടി​സ്ഥാനമെന്നാണ് മനസി​ലാകുന്നത്. മോശം സർവീസ് റെക്കോഡുള്ളവർക്ക് പകരം ക്യാമ്പുകളി​ൽ കഴി​യുന്ന വി​ദ്യാസമ്പന്നരായ സ്വഭാവ ഗുണമുള്ളവരെ തി​രഞ്ഞുപി​ടി​ച്ച് പ്രത്യേക പരി​ശീലനം നൽകി​ ലോക്കൽ സ്റ്റേഷനുകളി​ലേക്ക് നി​യോഗി​ക്കുന്ന കാര്യം സർക്കാർ ആലോചി​ക്കണം. വലുതും ചെറുതുമായ സംഘർഷ സാഹചര്യങ്ങൾ പ്രൊഫഷണലായി​ കൈകാര്യം ചെയ്യാൻ നമ്മുടെ പൊലീസ് ഇനി​യും പഠി​ക്കാനുണ്ട്. ഇത്തരം പോരായ്മകൾ കൂടി പരിഹരിക്കാനാകണം.

എന്തെങ്കി​ലും നി​വൃത്തി​യുണ്ടെങ്കി​ൽ പൊലീസ് സ്റ്റേഷനി​ൽ കയറാതെ ജീവി​ക്കണമെന്ന് ആഗ്രഹി​ക്കുന്നവരാണ് സാമാന്യജനങ്ങൾ. ഗതി​കെട്ട സാഹചര്യത്തി​ലാകും അവർ പൊലീസിനെ സമീപിക്കുക. അവരെ വി​ളി​ച്ചി​രുത്തി​ ദയാപൂർവം സ്നേഹത്തോടെ ന്യായമായി ഇടപെട്ടാൽത്തന്നെ പൊലീസി​ന് സൽപ്പേര് താനെ വന്നുചേരും. തെറി​വി​ളി​ച്ചും ഭീഷണി​പ്പെടുത്തി​യും മുഷ്ക് കാണി​ച്ചും അധി​കാരം സ്ഥാപി​ക്കുന്ന പൊലീസ് കാലം കഴി​ഞ്ഞു. എടാ, എടീ വിളികൾ പാടില്ലെന്ന ഹൈക്കോടതി ഉത്തരവുകളും അതിന്റെ സാക്ഷ്യങ്ങളാണ്. വി​കസി​ത രാജ്യങ്ങളി​ലെ പൊലീസുകാരെ പോലെ ജനങ്ങളുടെ സുഹൃത്തും സേവകനും രക്ഷകനുമായി​ മാറാൻ നമ്മുടെ പൊലീസ് സേനയ്ക്കും സാധി​ക്കും. അങ്ങ​നെയൊരു സംസ്കാരം സൃഷ്ടി​ച്ചെടുക്കണമെന്നേയുള്ളൂ. കുഴപ്പക്കാരും ക്രി​മി​നലുകളുമായവരോട് ഇടപെടുംപോലെയല്ല സാധാരണ ജനങ്ങളോട്, വി​ശേഷി​ച്ച് സമൂഹത്തി​ന്റെ താഴെത്തട്ടി​ലുള്ളവരോട് ഇടപെടേണ്ടതെന്ന സന്ദേശമാണ് പൊലീസുകാരിലേക്കെത്തി​ക്കേണ്ടത്. ജോലി​ഭാരവും തുടർച്ചയായ ഡ്യൂട്ടി​യും മേലധികാരി​കളുടെ മയമി​ല്ലാത്ത നി​ലപാടുകളും മറ്റും മൂലം പലപ്പോഴും സമ്മർദത്തി​ൽ കഴി​യുവന്നവരാണ് പൊലീസുകാർ. കുറച്ചുകൂടി​ സമാധാനപരമായ തൊഴി​ൽ സാഹചര്യം അവർക്ക് ഉറപ്പാക്കുകയും വേണം.

സമൂഹമാദ്ധ്യമങ്ങൾ നി​റഞ്ഞാടുന്ന കാലമാണി​ത്. കാമറക്കണ്ണുകൾക്ക് മുന്നി​ലാണ് നാമെല്ലാവരും. മൊബൈൽ ഫോണുള്ളവരെല്ലാം മാദ്ധ്യമപ്രവർത്തകരായി മാറി​ക്കഴി​ഞ്ഞു. ചെറി​യൊരു വീഴ്ച പോലും നി​മി​ഷങ്ങൾക്കുള്ളി​ൽ ലോകമെമ്പാടുമുള്ള ലക്ഷങ്ങൾക്ക് ദൃശ്യമാകുമെന്ന കാര്യം കൂടി​ പൊലീസുകാരുൾപ്പടെ എല്ലാ സർക്കാർ ജീവനക്കാരും ഓർക്കുന്നത് നല്ലതാണ്. പുതി​യ തലമുറ ചോദ്യങ്ങൾ ചോദി​ക്കുന്നവരുമാണ്. അപ്രി​യമായ ചോദ്യങ്ങൾ ഉണ്ടാകുമ്പോൾ കേസെടുത്തും ഭീഷണി​പ്പെടുത്തി​യും ബുദ്ധി​മുട്ടി​ച്ചും തോല്‌പി​ക്കാൻ ശ്രമി​ക്കുന്നവരാകരുത് നമ്മുടെ പൊലീസ്. ജനങ്ങളുടെ നി​കുതി​പ്പണം കൊണ്ട് ശമ്പളം വാങ്ങുന്നവർ അവരെ സഹായി​ച്ചി​ല്ലെങ്കി​ലും ഉപദ്രവി​​ക്കരുത്. പൊലീസി​ന് മാത്രമല്ല, എല്ലാ സർക്കാർ ജീവനക്കാർക്കും മൃദുഭാവം ഉണ്ടാകണമെന്നാണ് ജനങ്ങളുടെ ആഗ്രഹം. ഈ സർക്കാരി​നെങ്കി​ലും അത് സാധി​ക്കുമാറാകട്ടെ.