അഞ്ചൽ: രാജ്യത്തുടനീളം വിതരണം ചെയ്യാൻ പാകത്തിന് അത്യുല്പാദനശേഷിയുള്ള ഓയിൽ പാം നഴ്സറി സ്ഥാപിക്കുമെന്ന് മന്ത്രി പി. പ്രസാദ് പറഞ്ഞു. കഴിഞ്ഞ ദിവസം ഭാരതീപുരം ഓയിൽപാം എസ്റ്റേറ്റ് സന്ദർശിക്കവേയാണ് ഇക്കാര്യം പറഞ്ഞത്. ഈ വർഷം ആവസാനത്തോടെ പുതിയ ഫാക്ടറി കമ്മിഷൻ ചെയ്യുന്നതിനുള്ള നടപടികളും ആരംഭിച്ചതായി മന്ത്രി പറഞ്ഞു. ഫാക്ടറിയുടെ അറ്റകുറ്റപണികളും നവീകരണ പ്രവർത്തനങ്ങളും അടിയന്തരമായി നടപ്പാക്കുമെന്നും മന്ത്രി പറഞ്ഞു. എസ്റ്റേറ്റിലെ ഫാക്ടറിയും പരിസരവും മന്ത്രി സന്ദർശിച്ചു. പി.എസ്. സുപാൽ എം.എൽ.എ, ട്രേഡ് യൂണിയൻ നേതാക്കാളായ എസ്. ജയമോഹൻ, ലിജു ജമാൽ, ഭാരതീപുരം ശശി, പി.വി. വേണുഗോപാൽ, ഏരൂർ ഗ്രാമപഞ്ചായത്ത് പ്രസിഡന്റ് ടി. അജയൻ, ഓയിൽപാം മാനേജിംഗ് ഡയറക്ടർ ഡോ. ബാബു തോമസ് തുടങ്ങിയവരുമായി മന്ത്രി ഫാക്ടറിയുടെ പ്രവർത്തനം മെച്ചപ്പെടുത്തുന്നതുമായി ബന്ധപ്പെട്ട ചർച്ചയും നടത്തി.