ബംഗളൂരു: ബംഗളൂരുവിൽ ടാക്സിയിൽ വീട്ടിലേക്ക് മടങ്ങുകയായിരുന്ന യുവതിയെ ടാക്സി ഡ്രൈവർ പീഡിപ്പിച്ച ശേഷം റോഡരികിൽ ഉപേക്ഷിച്ചതായി പരാതി. ഇലക്ട്രോണിക് സിറ്റിക്കു സമീപം ഇന്നലെ രാത്രിയാണ് സംഭവം. ഇന്ന് വൈകിട്ടാണ് യുവതി ഹൊസൂർ പൊലീസിൽ പരാതി നൽകിയത്. പീഡനത്തിനു ശേഷം ഡ്രൈവർ വഴിയരികിൽ തന്നെ ഉപേക്ഷിച്ചു കടന്നുകളഞ്ഞെന്നും വഴിയിൽ കണ്ട നിരവധി പേരോട് സഹായം അഭ്യർത്ഥിച്ചെങ്കിലും ആരും സഹായിക്കാൻ കൂട്ടാക്കിയില്ലെന്നും പെൺകുട്ടി പൊലീസിനു നൽകിയ പരാതിയിൽ പറയുന്നു.

ബംഗളൂരുവിലെ സ്വകാര്യ ഐ ടി കമ്പനി ജീവനക്കാരിയാണ് പീഡനത്തിനിരയായ പെൺകുട്ടി. ഇന്നലെ രാത്രി നിശാ പാർട്ടി കഴിഞ്ഞ് വീട്ടിലേക്ക് മടങ്ങുന്ന വഴിയായിരുന്നു സംഭവം. സംഭവത്തെതുടർന്ന് സ്ത്രീസുരക്ഷാ നമ്പറിൽ ഉൾപ്പെടെ വിളിച്ചെങ്കിലും സഹായം കിട്ടിയില്ലെന്ന് പെൺകുട്ടിയുടെ പരാതിയിൽ പറയുന്നു.