ക്വിറ്റോ: ഇ​ക്വ​ഡോ​റി​ലെ ഗ്വാ​യാ​ക്വി​ൽ ന​ഗ​ര​ത്തി​ലെ ജ​യി​ലി​ൽ മയക്കുമരുന്ന് സംഘങ്ങൾ ത​മ്മി​ലു​ണ്ടാ​യ ഏ​റ്റു​മു​ട്ട​ലിൽ 116 ത​ട​വു​കാർ കൊ​ല്ല​പ്പെ​ട്ടു. അ​ഞ്ച് പേ​രു​ടെ ത​ല​യ​റു​ത്ത നി​ല​യി​ലാ​ണ്. ഇക്വഡോറിന്റെ ച​രി​ത്ര​ത്തി​ലെ തന്നെ ഏ​റ്റ​വും ഭീകരമായ ജ​യി​ൽ സം​ഘ​ർ​ഷ​മാ​ണി​തെ​ന്ന് അ​ധി​കൃ​തർ പറഞ്ഞു. ഭൂ​രി​ഭാ​ഗം പേ​രും വെ​ടി​യേ​റ്റാ​ണ് കൊ​ല്ല​പ്പെ​ട്ടതെങ്കിലും ബോം​ബും ക​ത്തി​യും ഗ്രനേഡും ഉപയോഗിച്ചതായും റിപ്പോർട്ടുണ്ട്. 80 ത​ട​വു​കാർ​ക്ക് പ​രി​ക്കേ​റ്റിട്ടുണ്ട്. അതേസമയം, പൊ​ലീ​സു​കാ​രും സൈ​ന്യ​വും ചേർ​ന്ന് ജ​യി​ലിന്റെ നി​യ​ന്ത്ര​ണം ഏ​റ്റെ​ടു​ത്തു.

ജയിലിൽ ആധിപത്യം സ്ഥാപിക്കുന്നതിന്റെ ഭാഗമായാണ് ഇരുവിഭാഗങ്ങളും തമ്മിൽ ഏറ്റുമുട്ടലുണ്ടായത്. ചൊ​വ്വാ​ഴ്ച​യാ​ണ് സം​ഘ​ർഷം തു​ട​ങ്ങി​യ​ത്.കലാപം ആ​സൂ​ത്രി​ത​മാ​​ണോയെന്ന വിഷയത്തിലും അ​ന്വേ​ഷ​ണം നടക്കും. ഇ​ക്വ​ഡോ​റി​ലെ മെ​ക്സി​ക്കൻ മ​യ​ക്കു​മ​രു​ന്ന് ക​ട​ത്ത് സം​ഘ​ങ്ങ​ളാ​ണ് ആ​ക്ര​മ​ണ​ത്തി​ന് ആരംഭമിട്ടതെന്നാണ് വിവരം.

സമൂഹമാദ്ധ്യമങ്ങളിൽ പ്രചരിക്കുന്ന ദൃശ്യങ്ങളിൽ ജയിൽമുറ്റത്ത് നിരവധി മൃതശരീരങ്ങൾ ചിതറികിടക്കുന്നത് കാണാം.