തൃശൂർ: മഴ ശക്തമായ സാഹചര്യത്തിൽ സ്ഥിതിഗതികൾ വലയിരുത്തി ദുരിതാശ്വാസ നടപടികൾ ഉറപ്പുവരുത്താൻ റവന്യൂ മന്ത്രി കെ. രാജന്റെ നേതൃത്വത്തിൽ അടിയന്തര യോഗം ചേർന്നു. ഓൺലൈനായി ചേർന്ന യോഗത്തിൽ ജില്ലാ കളക്ടർ ഹരിത വി. കുമാർ ചാലക്കുടി മേഖലയിലെ നിലവിലെ സാഹചര്യം വിശദീകരിച്ചു. ചാലക്കുടി പുഴയുടെ തീരങ്ങളിലെ വെള്ളം കയറിയ താഴ്ന്ന പ്രദേശങ്ങളിൽ നിന്ന് ജനങ്ങളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിക്കുന്നതിനും അവർക്ക് ആവശ്യമായ സൗകര്യങ്ങൾ ഒരുക്കുന്നതിനും മന്ത്രി നിർദേശം നൽകി. അടിയന്തര സാഹചര്യങ്ങളെ നേരിടുന്നതിന് റവന്യൂ, ഫയർ ആൻഡ് റെസ്‌ക്യൂ, പൊലീസ്, കെ.എസ്.ഇ.ബി തുടങ്ങിയ വിഭാഗങ്ങളുടെ തയ്യാറെടുപ്പും മന്ത്രി വിലയിരുത്തി. അടിയന്തര സാഹചര്യങ്ങളെ നേരിടുന്നതിൽ ജില്ലാ കളക്ടറുടെ നേതൃത്വത്തിൽ നല്ല രീതിയിലുള്ള ഇടപെടലുകളാണ് നടന്നുവരുന്നതെന്ന് മന്ത്രി പറഞ്ഞു.