വീട്ടിൽ നുറുക്ക് ഗോതമ്പുണ്ടോ,
സൂപ്പർ വിഭവങ്ങൾ പരീക്ഷിക്കാം
നുറുക്ക് ഗോതമ്പ് ദോശ
ചേരുവകൾ
നുറുക്ക് ഗോതമ്പ്.......അരക്കപ്പ്
ഉഴുന്നുപരിപ്പ്.........കാൽകപ്പ്
തേങ്ങ ചിരകിയത്.....4 ടേ.സ്പൂൺ
ഉപ്പ്.............പാകത്തിന്
എണ്ണ........ദോശചുടുന്നതിനു ആവശ്യത്തിന്
തയ്യാറാക്കുന്നവിധം
നുറുക്ക് ഗോതമ്പും ഉഴുന്നും നന്നായി കഴുകി അഞ്ച് മണിക്കൂർ കുതിർത്തുവയ്ക്കുക. അതിനുശേഷം ആവശ്യത്തിന് വെള്ളം ചേർത്ത് തേങ്ങ ഇഷ്ടമുള്ളവർ അതുംകൂടി ചേർത്ത് നന്നായി ദോശമാവിന്റെ പരുവത്തിൽ അരച്ചെടുക്കുക. ആവശ്യത്തിന് ഉപ്പും ചേർത്ത് അപ്പോൾ തന്നെ ചുട്ടെടുക്കാം. ഉള്ളിയും മുളകും ചതച്ച് വെളിച്ചെണ്ണ ചേർത്തിളക്കിയ മുളക് ചമ്മന്തിയുമായി ചൂടോടെ കഴിക്കാം. വൈകുന്നേരങ്ങളിൽ കുട്ടികൾക്ക് ഉണ്ടാക്കികൊടുക്കാവുന്ന ഒരു പോഷകസമൃദ്ധമായ വിഭവമാണ്.
നുറുക്ക് ഗോതമ്പ് പുട്ട്
ചേരുവകൾ
നുറുക്ക് ഗോതമ്പ്..........ഒരുകപ്പ്
തേങ്ങ ചിരകിയത്..........3 ടീസ്പൂൺ
വെള്ളം, ഉപ്പ്..........ആവശ്യത്തിന്
തയ്യാറാക്കുന്നവിധം
നുറുക്ക് ഗോതമ്പ് നന്നായി വറുക്കുക. കളർ മാറിത്തുടങ്ങുമ്പോൾ ഇറക്കുക. കരിഞ്ഞുപോവാതിരിക്കാനായി അതിനുശേഷം ഒരുമിനിട്ടുകൂടി ഇളക്കണം . തണുക്കുമ്പോൾ തരിയോടെ പൊടിച്ചെടുക്കുക. ഈ പൊടി പത്ത് മിനിട്ട് കുതിർത്ത് വയ്ക്കുക. ഉപ്പ് ചേർത്ത് കുഴച്ച് പുട്ടുകണയിൽ ആദ്യം കുറച്ച് തേങ്ങ ഇടുക. കുഴച്ച പൊടി ചേർക്കുക. വീണ്ടും തേങ്ങ ചേർക്കുക. അങ്ങനെ അടുക്കായി കണ നിറച്ച് പുട്ടുകുടത്തിൽ വയ്ക്കുക. ആവി വരുമ്പോൾ കുത്തിയിടുക. പുട്ടുകണ തണുത്തതിനു ശേഷം കുത്തിയിട്ടാൽ പൊടിയാതെ കിട്ടും. പ്രമേഹരോഗികൾക്കും കൊളസ്ട്രോളുകാർക്കും വളരെ നല്ലതാണ്.
നുറുക്ക് ഗോതമ്പ് സ്നാക്സ്
ചേരുവകൾ
നുറുക്ക് ഗോതമ്പ്..............ഒരുകപ്പ്
മൈദ ............അഞ്ച് സ്പൂൺ
കോഴിമുട്ട............നാലെണ്ണം
ബ്രെഡ്/ റെസ്ക്ക് .............അഞ്ചെണ്ണം
(മിക്സിയിൽ പൊടിച്ചത്)
എണ്ണ.............200 എം.എൽ
ഉപ്പ്...............പാകത്തിന്
കടുക്........കാൽ ടീസ്പൂൺ
തേങ്ങ............കാൽക്കപ്പ്
മസാല തയ്യാറാക്കാൻ
കാരറ്റ്...........2
ബീൻസ്.......5
തക്കാളി, സവാള...........അരകഷണം വീതം
മഞ്ഞൾപ്പൊടി........2നുള്ള്
ഇഞ്ചി ചതച്ചത്........ഒരു ചെറിയ കഷണം
പച്ചമുളക്..............2
മല്ലിയില.............2 തണ്ട്
നട്സ്...........3 (പൊടിച്ചത്)
തയ്യാറാക്കുന്നവിധം
ഗോതമ്പ് ഒരു മണിക്കൂർ കുതിർക്കുക. അതിൽ നിന്ന് കാൽഭാഗം നന്നായി അരച്ചെടുക്കുക. അതിനുശേഷം മസാല തയ്യാറാക്കാം. കാരറ്റ്, ബീൻസ്,തക്കാളി, സവാള ഇവ പൊടിയായി വെവ്വേറെ അരിഞ്ഞുവയ്ക്കുക. ഒരു പാനിൽ 2 സ്പൂൺ എണ്ണയൊഴിച്ച് ചൂടാകുമ്പോൾ കടുക് പൊട്ടിക്കുക. സവാള ചേർത്തിളക്കുക. ശേഷം ചതച്ച ഇഞ്ചി, പച്ചമുളക് ചേർക്കുക. ഇളക്കിയതിനു ശേഷം അരിഞ്ഞുവച്ച പച്ചക്കറികൾ ഓരോന്നായി ചേർത്തിളക്കുക. തക്കാളി ചേർത്തിളക്കിയതിനുശേഷം കാൽ ടീസ്പൂൺ ഉപ്പ് ചേർക്കുക. വെന്ത് കഴിഞ്ഞ് തേങ്ങയും മല്ലിയിലയും ചേർത്തിളക്കുക. അതിനുശേഷം അരയ്ക്കാതെ മാറ്റിവച്ച നുറുക്ക് ഗോതമ്പ് ചേർത്തിളക്കുക. അതിനുശേഷം അരച്ച ഗോതമ്പ് ചേർത്തിളക്കുക. ഉപ്പ് പോരെങ്കിൽ ചേർക്കണം. നട്സ് പൊടിച്ച് ചേർക്കുക. കൈകൊണ്ട് വെള്ളം തളിച്ച് അഞ്ച് മിനിട്ട് അടച്ച് വച്ച് വേവിക്കുക. തീ അണച്ച് തണുത്തതിനുശേഷം കട്ലറ്റ് ആകൃതിയിലാക്കി മൈദ മാവിലോ മുട്ടയിലോ മുക്കിയശേഷം ബ്രെഡ് പൊടിയിൽ മുക്കി എണ്ണയിൽ പൊരിച്ചെടുക്കുക.
കിണ്ണത്തപ്പം
ചേരുവകൾ
നുറുക്ക് ഗോതമ്പ്..............ഒരുകപ്പ്
തേങ്ങ ചിരകിയത്..........അരക്കപ്പ്
പഞ്ചസാര..............അരക്കപ്പ്
ഏലയ്ക്ക.............അഞ്ചെണ്ണം
നെയ്യ്.........2 ടേ.സ്പൂൺ
നട്സ്............ആറേഴ് എണ്ണം
വെള്ളം..........ഒരു കപ്പ്
തയ്യാറാക്കുന്നവിധം
നുറുക്ക് ഗോതമ്പ് നന്നായി കഴുകി വെള്ളം വാർന്നതിനുശേഷം ഒരു പാൻ ചൂടാക്കി അതിലിട്ട് വറുത്തെടുക്കുക. അതിന്റെ കൂടെ തേങ്ങയും ഏലക്കയും കൂടെ ചേർക്കുക. തണുത്തതിന് ശേഷം ഇത് മിക്സിയിൽ തരുതരുപ്പായി പൊടിച്ചെടുക്കുക. ഒരു പാനിൽ ഒരുകപ്പ് വെള്ളം തിളപ്പിച്ച് ഈ പൊടിചേർത്ത് നന്നായി ഇളക്കുക. അതിലേക്ക് നെയ്യ് കൂടി ചേർത്തിളക്കുക. അതോടൊപ്പം പഞ്ചസാരയും ചേർത്തിളക്കുക. വെള്ളം പോരെങ്കിൽ തിളപ്പിച്ച വെള്ളം തന്നെ ചേർക്കുക. പാനിൽ നിന്ന് വിട്ടുവരുന്ന സമയം ഇറക്കിവയ്ക്കുക. നെയ്യ് തടവിയ ഒരു പാത്രത്തിലേക്ക് മാറ്റുക. മുകൾ ഭാഗം സ്പൂൺ കൊണ്ട് ലെവൽ ചെയ്യണം. മുകളിൽ നട്സ് കൊണ്ട് അലങ്കരിക്കാം. തണുത്തതിനുശേഷം ഉപയോഗിക്കാം. (പഞ്ചസാരയ്ക്ക് പകരം ശർക്കരയും ചേർക്കാം.)
നുറുക്ക് ഗോതമ്പ് ഉപ്പുമാവ്
ചേരുവകൾ
നുറുക്ക് ഗോതമ്പ്............ഒന്നരക്കപ്പ്
വെളിച്ചെണ്ണ..............3 ടീസ്പൂൺ
വലിയ ഉള്ളി ചെറുതായി അരിഞ്ഞത്...........5
പച്ചമുളക് വട്ടത്തിലരിഞ്ഞത്.......3
ചെറിയകഷണം ഇഞ്ച് ........ഒന്ന് (ചെറുതായി അരിഞ്ഞത്)
കറിവേപ്പില........ഒരുതണ്ട്
കടുക്.........ഒരു ചെറിയ സ്പൂൺ
ഉപ്പ്..............ആവശ്യത്തിന്
വറ്റൽമുളക്..............3
തയ്യാറാക്കുവിധം
ഗോതമ്പ് നന്നായി കഴുകി രണ്ടു മണിക്കൂർ കുതിർത്തുവയ്ക്കുക. കുതിർത്ത ഗോതമ്പും ഉപ്പും സമം അളവിൽ വെള്ളവും ചേർത്ത് കുക്കറിൽ ഒരു വിസിലിൽ വേവിക്കുക. വെള്ളം കൂടരുത്. ഒരു പാൻ ചൂടാകുമ്പോൾ എണ്ണയൊഴിച്ച് കടുക് പൊട്ടിക്കുക. വറ്റൽ മുളക് മുറിച്ചിട്ട് ശേഷം ചെറുതായരിഞ്ഞ ഇഞ്ചിയും വഴറ്റിയശേഷം ഉള്ളി ചേർത്തിളക്കുക. പിന്നീട് പച്ചമുളക്, കറിവേപ്പില ഇവ ചേർക്കുക. വേവിച്ച ഗോതമ്പും കൂടിചേർത്ത് നന്നായി ഇളക്കി യോജിപ്പിച്ച് ചൂടോടെ ഉപയോഗിക്കാം. (ആവശ്യമുള്ളവർക്ക് തേങ്ങയും ശർക്കരയും കൂടി ചേർത്ത് ഉപയോഗിക്കാം.)
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |