ഇന്ന് 10 സെന്റീമീറ്റർ കൂടി ഉയർത്തും

പുനലൂർ: മഴ കനത്തതോടെ തെന്മല പരപ്പാർ അണക്കെട്ടിന്റെ മൂന്ന് ഷട്ടറുകളും 80 സെന്റീമീറ്റർ വീതം ഉയർത്തി വെള്ളം കല്ലടയാറ്റിൽ ഒഴുക്കി. 115.82 മീറ്റർ സംഭരണശേഷിയുളള അണക്കെട്ടിൽ ഇന്നലെ ജല നിരപ്പ് 113.28 മീറ്ററായി ഉയർന്നു. നേരത്തേ 70 സെന്റീമീറ്റർ വീതമായിരുന്നു ഷട്ടറുകൾ ഉയർത്തിയിരുന്നത്. അണക്കെട്ടിൽ വീണ്ടും ജലനിരപ്പ് ഉയരുന്നതിനാൽ ഡാമിന്റെ ഷട്ടറുകൾ ഇന്ന് രാവിലെ 10 മണിയോടെ 10 സെന്റീമീറ്റർ കൂടി ഉയർത്തും. കല്ലടയാറ്റിലെ ജലനിരപ്പ് ഉയരാൻ സാദ്ധ്യതയുളളതിനാൽ നദിയുടെ ഇരുകരകളിലും താമസിക്കുന്നവരും നദിയിലും നദീമുഖങ്ങളിലും വിവിധ പ്രവർത്തനങ്ങളിലേർപ്പെടുന്നവരും ജാഗ്രത പാലിക്കണമെന്ന് ജില്ലാ കളക്ടർ അറിയിച്ചു.