പത്തനംതിട്ട : വെള്ളത്തിൽ പൂർണമായും മുങ്ങിയ ജില്ലാ സ്റ്റേഡിയം ട്രോളുകളുടെ പെരുമഴയി​ൽ സോഷ്യൽ മീഡിയയിൽ നി​റഞ്ഞുനി​ൽക്കുകയാണ്. കളിക്കാൻ മാത്രമല്ല മഴപെയ്താൽ ഡാമായും ഉപയോഗിക്കാം എന്ന രീതിയിലുള്ള പോസ്റ്റുകളാണ് നിറയെ. ഇവിടെയാണ് അന്താരാഷ്ട്ര നിലവാരത്തിലുള്ള സ്റ്റേഡിയം നിർമ്മിക്കാൻ അനുമതി ലഭിച്ചിരിക്കുന്നത്.

പ്രളയത്തിലും കഴിഞ്ഞമാസം വെള്ളം പൊങ്ങിയപ്പോഴും ഇന്നലെയും സ്റ്റേഡിയം മുങ്ങി​.സ്റ്റേഡിയത്തിൽ പ്രവർത്തിക്കുന്ന ജില്ലാ സ്‌പോർട്‌സ് കൗൺസിൽ ഓഫീസിലും വെള്ളംകയറി . ഇവിടെ സൂക്ഷിച്ചിരുന്ന റെക്കാർഡുകൾ വെളളം കയറി നശിച്ചിട്ടുണ്ട്.

കഴിഞ്ഞ തവണ വെള്ളം കയറിയപ്പോൾ റെക്കാർഡുകളും കമ്പ്യൂട്ടറും സുരക്ഷിത സ്ഥലത്തേക്ക് മാറ്റിയിരുന്നു. ഇത്തവണ സാധനങ്ങൾ മാറ്റാനായി​ല്ല. ഓഫീസിൽ സൂക്ഷിച്ചിരുന്ന കുട്ടികളുടെ വിവരങ്ങളടങ്ങിയ രേഖകൾ, സർക്കാർ ഫയലുകൾ, സിവിൽ സർവീസ് കായികമേളയിൽ പങ്കെടുക്കുന്നവരുടെ വിവരങ്ങൾ എന്നിവ നശി​ച്ചു. സ്റ്രേഡിയത്തിലെ ഡ്രൈനേജ് സംവിധാനമടക്കം നശിച്ച് കിടക്കുകയാണ്. സമീപത്തുള്ള തോടും കവിഞ്ഞൊഴുകുന്നത് സ്റ്രേഡിയത്തിലേക്കാണ്.