ലക്‌നൗ: ഉത്തർപ്രദേശിലെ മൊറാദാബാദിൽ ഡോക്ടർമാർ മരിച്ചെന്ന് വിധിയെഴുതിയ യുവാവ് ഏഴ് മണിക്കൂറിന് ശേഷം ജീവിതത്തിലേക്ക് തിരിച്ചെത്തി. വാഹനാപകടത്തിൽ പരിക്കേറ്റ ശ്രീകേഷ് കുമാർ എന്നയാളാണ് ഏഴുമണിക്കൂറിന് ജീവന്റെ തുടിപ്പ് കാട്ടിയത്.

ഇലക്ട്രീഷ്യനായ ശ്രീകേഷ് കുമാറിനെ വാഹനാപകടത്തിൽ പരിക്കേറ്റാണ് വ്യാഴാഴ്ച അർധരാത്രിയോടെ ജില്ലാ ആശുപത്രിയിൽ എത്തിച്ചത്. പരിശോധന നടത്തിയ ഡോക്ടമാർ യുവാവ് മരിച്ചതായി അറിയിച്ചു. തുടർന്ന് ആശുപത്രി ജീവനക്കാർ യുവാവിന്റെ 'മൃതദേഹം' മോർച്ചറിയിലെ ഫ്രീസറിലേക്ക് മാറ്റുകയും ചെയ്തു.

പിറ്റേദിവസം രാവിലെ ഇൻക്വസ്റ്റും പോസ്റ്റുമോർട്ടവും നടത്താനായി

പൊലീസും ബന്ധുക്കളും എത്തിയപ്പോഴാണ് ട്വിസ്റ്റ്. മോർച്ചറിയിൽ പൊലീസിന്റെ സാന്നിധ്യത്തിൽ 'മൃതദേഹം' തിരിച്ചറിയുന്നതിനിടെ ശ്രീകേഷിന്റെ സഹോദരഭാര്യയാണ് യുവാവ് ശ്വാസമെടുക്കുന്നത് ശ്രദ്ധിച്ചത്. ഉടൻ തന്നെ ഇവർ ബഹളംവയ്ക്കുകയും യുവാവ് മരിച്ചിട്ടില്ലെന്ന് വിളിച്ചുപറയുകയും ചെയ്തു. ഇതോടെ ഡോക്ടർമാരെ വിവരമറിയിക്കുകയും യുവാവിനെ മോർച്ചറിയിൽനിന്ന് തീവ്രപരിചരണ വിഭാഗത്തിലേക്ക് മാറ്റുകയുമായിരുന്നു. നിലവിൽ മീററ്റിലെ ആശുപത്രിയിലാണ് ശ്രീകേഷ് ചികിത്സയിൽ കഴിയുന്നത്. യുവാവിന്റെ ആരോഗ്യനില മെച്ചപ്പെട്ടിട്ടുണ്ടെന്നാണ് വിവരം. എന്നാൽ ബോധം തിരിച്ചുകിട്ടിയിട്ടില്ലെന്നും ബന്ധുക്കൾ അറിയിച്ചു.

അതേസമയം, ഡോക്ടർമാരുടെ അനാസ്ഥയ്‌ക്കെതിരെ പൊലീസിൽ പരാതി നൽകുമെന്നും ബന്ധുക്കൾ പറഞ്ഞു. മരിക്കാത്ത യുവാവിനെ ഫ്രീസറിലേക്ക് മാറ്റി ഡോക്ടർമാരാണ് ആരോഗ്യനില വഷളാക്കിയതെന്നും ബന്ധുക്കൾ ആരോപിച്ചു. എന്നാൽ അപൂർവങ്ങളിൽ അപൂർവമായ സംഭവമാണിതെന്നായിരുന്നു മൊറാദാബാദ് ചീഫ് മെഡിക്കൽ സൂപ്രണ്ടിന്റെ പ്രതികരണം. ഇതിനെ ഡോക്ടർമാരുടെ വീഴ്ചയായി കാണാനാകില്ലെന്നും സൂപ്രണ്ടായ ഡോ. ശിവ് സിംഗ് പറഞ്ഞു.

പുലർച്ചെ മൂന്ന് മണിക്കാണ് അത്യാഹിത വിഭാഗത്തിലെ ഡോക്ടർ രോഗിയെ പരിശോധിച്ചത്. ആ സമയത്ത് ഹൃദയമിടിപ്പ് ഉണ്ടായിരുന്നില്ല. പലതവണ ഡോക്ടർ യുവാവിനെ പരിശോധിച്ചു. തുടർന്നാണ് മരണം സ്ഥിരീകരിച്ചത്. എന്നാൽ രാവിലെ പോലീസും ബന്ധുക്കളും എത്തിയപ്പോൾ യുവാവിന് ജീവനുണ്ടെന്ന് കണ്ടെത്തുകയായിരുന്നു. സംഭവത്തിൽ അന്വേഷണത്തിന് ഉത്തരവിട്ടിട്ടുണ്ടെന്നും നിലവിൽ യുവാവിന്റെ ജീവൻ രക്ഷിക്കാനാണ് മുൻഗണന നൽകുന്നതെന്നും മെഡിക്കൽ സൂപ്രണ്ട് കൂട്ടിച്ചേർത്തു.