പഴയങ്ങാടി:എരിപുരം ഏഴോം റോഡിൽ 60 വർഷമായി വാടക കെട്ടിടത്തിൽ പ്രവർത്തിക്കുന്ന പഴയങ്ങാടി ഇലക്ട്രിക്കൽ സെക്ഷൻ ഓഫീസിന് സ്വന്തമായി കെട്ടിടം വേണമെന്ന ആവശ്യം ശക്തമാകുന്നു. പരിമിത സൗകര്യം മാത്രമുള്ള ഓഫീസിൽ പണമടക്കാനെത്തുന്ന ഗുണഭോക്താക്കളും ഇലക്ട്രിക് ഉപകരണങ്ങൾ സൂക്ഷിക്കാൻ ഒരു ഗോഡൗണോ,​അത്യാവശ്യമായി ഒരു മീറ്റിംഗ് ചേരാനുള്ള സൗകര്യമോ ഇല്ലാതെ ഉദ്യോഗസ്ഥരും ഒന്നുപോലെ ദുരിതത്തിലാണ്.

പണമടക്കാൻ ക്യൂ നിൽക്കേണ്ടത് റോഡിലേക്കാണ്. .ഇലക്ട്രിക് ഉപകരണങ്ങൾ സൂക്ഷിക്കുന്നത് പ്രധാനറോഡിന്റെ വശങ്ങളിലാണ് . വാഹനങ്ങൾക്കും കാൽനട യാത്രാക്കാർക്കും ഏറെ ബുദ്ധിമുട്ട് ഉണ്ടാക്കുന്നു. രാവിലെ ജീവനക്കാർ യോഗം ചേരുന്നതാകട്ടെ കെട്ടിടത്തിന് പുറത്താണ്. വാഹനങ്ങൾ നിർത്തിയിടുന്നതും റോഡിലേക്ക് ചേർന്നാണ്.

21200 ഉപഭോക്താക്കൾ

35 ജീവനക്കാർ

മാടായി തൊട്ട് കാനായി വരെ

മാടായി,ഏഴോം,ചെറുതാഴം,കടന്നപ്പള്ളി പാണപ്പുഴ,പരിയാരം ആയുർവേദ കോളേജ് പരിസരം,കാനായി എന്നിവയടക്കം വലിയ പ്രദേശമാണ് പഴയങ്ങാടി ഇലക്ട്രിക്കൽ സെക്ഷൻ പരിധിയിൽ വരുന്നത്.വരുമാനത്തിന്റെ കാര്യത്തിലും സെക്ഷൻ ഏറെ മുന്നിലാണ്.പഴയങ്ങാടി,മാടായി,മാതമംഗലം എന്നീ സെക്ഷനുകളുടെ സബ്ഡിവിഷൻ ഓഫീസും ഈ കെട്ടിടത്തിലാണ് പ്രവർത്തിക്കുന്നത്.