കൂത്താട്ടുകുളം: വമ്പൻ ട്വിസ്റ്റുമായി കേരള ലോട്ടറിയുടെ പൂജാ ബമ്പ‌ർ ഭാഗ്യവാൻ ഇന്നലെ രംഗത്തെത്തി. അഞ്ചു കോടി അടിച്ച ടിക്കറ്റിന്റെ ഉടമ ലോട്ടറി ഏജന്റ് ജേക്കബ് കുര്യൻ തന്നെ. കനറാ ബാങ്ക് ശാഖയി​ൽ ടിക്കറ്റ് ഏൽപ്പി​ച്ചു. ഞായറാഴ്ച നടന്ന നറുക്കെടുപ്പിൽ കൂത്താട്ടുകുളത്ത് ജേക്കബ് വിറ്റ ടിക്കറ്റിനാണ് ബമ്പറടിച്ചതെന്ന് അറിഞ്ഞെങ്കിലും ഭാഗ്യവാനെ തിരിച്ചറിഞ്ഞിരുന്നില്ല. ഇതോടെ, അവകാശവാദങ്ങളുമായി​ നി​രവധി​ പേർ സമൂഹമാദ്ധ്യമങ്ങളി​ൽ എത്തി​യി​രുന്നു.

കിഴകൊമ്പ് പോസ്റ്റാഫീസ് ജംഗ്ഷനിലെ ലോട്ടറി​ റീട്ടെയിൽ വിൽപ്പന കേന്ദ്രത്തിന്റെ ഉടമയാണ് മോളേപ്പറമ്പിൽ ജേക്കബ്. തനി​ക്കായി​ മാറ്റിവച്ച ആർ.എ 591801 ടിക്കറ്റിനാണ് സമ്മാനം അടിച്ചതെന്ന് ജേക്കബ് പറഞ്ഞു. ടിക്കറ്റ് വച്ച പേഴ്സ് വീട്ടിൽ നിന്ന് കണ്ടെടുക്കാൻ വൈകിയതി​നാലാണ് ഭാഗ്യവാൻ താനാണെന്ന് അറിയാനും വൈകിയത്.

കൂത്താട്ടുകുളത്തെ മൊത്തവിതരണ ഏജൻസിയിൽ നിന്നു വാങ്ങിയ 10 ടിക്കറ്റുകൾ 15 ദിവസം കൊണ്ടാണ് വിറ്റതെന്നും ഒന്നാം സമ്മാനമടിച്ച ‌ടിക്കറ്റ് ആരാണ് വാങ്ങിയതെന്ന് ഓർത്തെടുക്കാൻ കഴിയുന്നില്ലെന്നുമായിരുന്നു ജേക്കബ് നേരത്തേ പറഞ്ഞിരുന്നത്.

30 വർഷമായി​ സ്റ്റേഷനറിക്കടയോടൊപ്പം ചായയും ലോട്ടറിയും വിറ്റുവരികയാണ് 54 കാരനായ ജേക്കബ്. പോളിയോ ബാധിച്ച് ഒരു കാലിന് സ്വാധീനക്കുറവുണ്ട്. കടയോടു ചേർന്നുള്ള വീട്ടി​ൽ തന്നെയാണ് താമസം. ഭാര്യ: ഗ്രേസി​. മകൻ: എം.ബി.എ വി​ദ്യാർത്ഥി​ ജോജി​.

തി​രുവോണം ബമ്പറായ 12 കോടി ലഭി​ച്ചതും എറണാകുളം മരട് സ്വദേശി​ ജയപാലനാണ്. വി​വരം വെളി​പ്പെടുത്താൻ വൈകി​യതി​നെ തുടർന്ന് അന്നും സമൂഹമാദ്ധ്യമങ്ങളി​ൽ അവകാശ വാദങ്ങളുമായി​ പലരും എത്തി​യി​രുന്നു..